ЧОННАР АРАЗЫНДАҒЫ МАРЫҒНЫҢ ЧИҢІCЧІЛЕРІ
07.06.2023
Хабарлар
![ЧОННАР АРАЗЫНДАҒЫ МАРЫҒНЫҢ ЧИҢІCЧІЛЕРІ ЧОННАР АРАЗЫНДАҒЫ МАРЫҒНЫҢ ЧИҢІCЧІЛЕРІ](/upload/iblock/ad6/ad635a33a830818555ecb19a77728e9b.jpg)
Хакасия пазының орынҷызы Юрий КУРЛАЕВ чиңісчілернең хада
Поғдархас. Хандых айының 5-ҷі кӱнінде Хакасия пазының орынҷызы Юрий Курлаев «Пробуждая сердца» чоннар аразындағы чайаачы марығның региондағы чардығының чиңісчілерін таныхтаан
Пу марығ, «Россияның ӧлімі чох полкы» тиксі Россиядағы халых чӧрімінің ӧӧн штабы кнезінің пірcі, СССР-ның чон артизі, Россия Федерациязының Істеніс Матыры Василий Семёнович Лановойны хумартхылап, ікінҷі хати иртірілче.
Хакасияның правительство туразында «Пробуждая сердца» марығның «Илбек Ада чаа темазынҷа чайаачы тоғыстарны, кӧрбин, ӧтіг хығырары» номинацияда регион чиңісчілеріне дипломнар паза сыйыхтар читірілгеннер. Анда алты кізі чиңіске турысхан: 19 частаң улуғлар аразында Шира чуртағҷызы Людмила Антоновна Котельникова, 10 – 18 частығлар аразында Ағбан городтаң Торнике Хрикули, Лилия Ломакина, Матвей Гольцев, Анна Елисеева, 5 – 9 частығлар аразында Шира аймаандағы Хутухтығ аалдағы Дарина Айтбаева.
– Чоннар аразындағы марығда улуғ частығлардаң пасха, олғаннар паза чииттер араласчатханы ӧріндірче. Анзы ӧсчеткен тӧл Илбек Ада чаа матырларын сабландырчатханынаңар паза оларны хумартхылапчатханынаңар чоохтапча. «Пробуждая сердца» чайаачы марығ «Ӧлімі чох полк» тиксі Россиядағы чӧрім тӧстеен паза саблығ артист Василий Семёнович Лановойның хумартхызына чарыдылған. Василий Семёнович Илбек Ада чаадаңар онарлап рольлар ойнаан паза хоос сӧстің узы полған. Піс аның прай фильмнерін пілчебіс. Ол уғаа таланттығ, чайаачы кізі полған. Илбек Ада чааға чарыдылған произведениелер сценада иң удаа истілчелер, пасха темаларнаң тиңнестірзе. Пістің пӧгінібіс – чаада чат халғаннарны ундутпасха.
Аарлығ арғыстар, Ада чир-суу литературазына хайығ айландырчатхан ӱчӱн, хоос сӧстер полызиинаң чонға паарсастарың читірчеткен ӱчӱн сірерге улуғ алғыс! Марығның регион чардығында чиңіс тутханынаң алғыстапчам! – теен Юрий Курлаев.
Людмила Антоновна Котельникова чиңісчілер аразында иң улуғ частығ. Пу марығда аралазарға аны хызы чӧптеп алған. Аның ӱчӱн Людмила Антоновна хызына улуғ алғызын читірген.
– Мағаа 67 час. Марығда хынып араласхам. Чуртас тооза культурада тоғын салғам. Чаа темазына уғаа хынчам. Хызым сылтаанда мин пӱӱн мындабын. Чиңісчі олғаннарның сағызында пу кӱн хаҷанға даа халар тіп сағынчам. Мындағ палаларнаң поғдархапчам, – сағыстарынаң ӱлескен Л.А.Котельникова.
«Россияның ӧлімі чох полкы» тиксі Россиядағы халых чӧрімнің Хакасиядағы пӧлиинің устағҷызы Тамара Сосновскаяның чооғынаң, пӱӱл пістің регионнаң марығда 100 азыра кізі араласхан. Прай араласчылар чайаачы тоғыстарын Москвазар кӧні ысханнар.
Пылтыр «Пробуждая сердца» марығда Хакасиядаң 80 азыра кізі араласхан. Чоннар аразындағы марығда пістің республика ікінҷі чылы изере чиңісчілер санында. Пылтыр Саяногорсктағы чиит поэтесса Татьяна Кутунина позы пас салған кибелізінең чиңісчі полған. Пӱӱл Ағбанның 9№ школазының ӱгретчі-организаторы Илбек Ада чааға чарыдылған кибелісті кӧрбин хығырған ӱчӱн ікінҷі орын алған. Пӱӱл марығда, пістің хазнадаң пасха, хонҷых 15 хазна араласхан. Араласчыларның саны 12 муң кізее чит парған. Чарғыҷылар аразында саблығ поэттер, писательлер, артисттер полғаннар.
Ағбанның 14 частығ чуртағҷызы, 29№ школаның кадет клазының ӱгренҷізі Матвей Гольцев Татьяна Сергеевна Овчинникованың «Амбар» кибелізін кӧрбин хығырған ӱчӱн чиңіске турысхан.
– Марығда араласхан туста мағаа 13 час полған. Ӱгретчім Ольга Николаевна Школинанаң хада кибелісті ӱр таллаабыс. Татьяна Овчинникованың кибелізі кӧңніме кірген. Аны ӱр ӱгренгем. Матап тимненгем. Ол уғаа ӧтіг, аны хайди орта хығырарын пілерге кирек. Килер чылда пу марығда хатап аралазарбын.
Минің ағам Анатолий Александрович Гольцев Илбек Ада чаада араласхан. Чаадаң айланған паза узах чазына читіре чуртаан. 1997 чылда ӱреен. Че ууҷамның паза тай іҷемнің харындастары Константин Поликарпович, Дмитрий Поликарпович Фокиннер, Михаил Устинович Воронов Илбек Ада чаадаң айланмааннар, – теен Матвей Гольцев.
Сом Дмитрий СУНЧУГАШЕВТИ
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде