«ЧИИТТЕР КӰЗІ» – ТАСХАРХЫ ФЕСТИВАЛЬ
07.06.2023
Хабарлар
![«ЧИИТТЕР КӰЗІ» – ТАСХАРХЫ ФЕСТИВАЛЬ «ЧИИТТЕР КӰЗІ» – ТАСХАРХЫ ФЕСТИВАЛЬ](/upload/iblock/2f3/2f34bd129ef38579b96d8c2fc6f5d816.jpg)
Панна футболҷа ойын парча
Спорт. Ағбанның тынағ паркында «Чииттер кӱзі» тасхархы спорттың республика синіндегі фестивальы ирткен
Пір ачыхта «Панна!» тіп хысхырчалар, ікінҷізінде теелбекчілер марығласчалар. Спорт пайрамына килген чонның пір ле сағыс: «Хайди прай чирде маңнанҷаң?» «Чииттер кӱзі» фестивальның программазы сынап хайхатхан. Андар панна футболны, самокат спортын, гиря кӧдірерін, джампинг фитнесті, брейкингті паза пасха даа спорт кӧрімнерін кир салтырлар. Пістің республикада аймах спартакиадалар иртірерге хынадырлар. Че тасхархы спорттың фестивальы Хакасияда пастағызын на иртті. Аның тӧстегҷілері – республиканың правительствозы, физическай культура паза спорт министерствозы, Ағбанның устағ-пастаа.
Мероприятиені пайрамни азарында Хакасияның пазы Валентин Коновалов, спорт министрі Сергей Кочан, Ағбанның пазы Алексей Лёмин араласханнар. Валентин Олегович, чоох тудып, теен:
– Пу фестиваль саарбахтарға паза чииттерге кӧрілген. Ӧӧн пӧгін – оол-хыстарны хазых чуртасха тартары. Пӱӱн 10 ачых тоғынча. Ізенчем, чӱрекке чағын спорт кӧрімін таллап аларзар.
Ідӧк боксёр Сергей Слободянға сӧс пирілген. Чиит кізі Россия чемпионадында ікі хати хола медаль утхан. 2023 чылда, тізең, боксёр Боливариан ойыннарында чиңіс тутхан. Пу наада Хабаровскта ирткен чоннар аразындағы марығда ікінҷізі полыбысхан. Слободян чииттерге спортнаң айғазарға, чидіглерге чидерге алғаан.
Ачыхтар тоғызы киречілеен: Хакасия чуртағҷылары хайдағ даа спорт кӧрімінде устарын сынирға кӱстер. Кӧзідімге, хакас саарбах Даниил Шишпанов райдер полтыр. Іди кикскутерингнең алай самокат спортынаң айғасчатханнарны адапчалар. Райдерлер, скейт-паркта турғызылған рампаларҷа самокатнаң ойладып, аймах трюктар толдырчалар. Даниил – Ағбанның 24 № школазының ӱгренҷізі. Пӱӱл 7-ҷі классты тоос салтыр. Самокат спортынаң тӧртінҷі чылы айғас парир. Хайди таныхтаан саарбах, кикскутерингнең наа ла айғазарға пастапчатханнарға арачыланҷаң тиріг киректелче. Чиит спортсмен, рампаның пір пазынаң пір пазына читкенҷе, cамокаттың деказын (кізі турчатхан платформа. – Авт.) кииде нинҷе-де хати толғабызарға маңнанған. Морсымнығ кӧрінче.
Фестиваль тузында кізілер панна футбол парынаңар піліп алғаннар. Аннаң чыылған улусты Хызылчардағы тренер Борис Емельянов таныстырған. Пу спорт кӧрімі Нидерландыда тӧстелтір. Панна футболда ікі кізі ойнапча. Ойнаҷаң ачых паза хаалхалар улуғ ниместер. Мында ӧӧні меспекті «ыырҷының» азах аразына тебізерге кирек. Чиңісчілер «Panna!» хысхырчалар. Пу сӧс «чох идібіскем» тіп тілбестелчеттір. Саблығ спортсменнердең панна футболға Поль Погба паза Неймар хынчаттырлар. Аның полызиинаң олар устарын таптапчалар. Борис Емельяновтың таниинаң, пістің хазнада панна футболҷа чемпионаттар иртче. Ӱр ниместе ирткен турнирде Хызылчардағы футболист чиңіс туттыр.
Кибірліг спорт кӧрімнері – хапчаң тас паза гиря кӧдірері – фестивальда хайығ чох халбааннар. Итсе, тастың орнына араласчыларға 40 кг кӧдірімніг хапты иңні азыра тастирға киліскен. Анда чииттер устарын кӧзіткеннер. Гиря кӧдірерінде алызығлар пол партыр. 2019 чылдаң дисциплиналар санына гирянаң ойниры (жонглирование) кірче. Кізілер пу дисциплинаҷа спорт узына нормативті толдырар оңдайлығлар. Таныхтирға кирек, пӱӱл Хакасияның гиря кӧдірерінҷе федерациязына танығлығ чыл. Апрельде пістің республикада пастағызын на Сибирьнің чемпионады паза первенствозы ирткен. Улуғ турнирге удур федерация наа гирялар, помосттар, санаҷаң тиріглер ал салтыр. Бородино аалдағы тренер Александр Шипилёвтың чооғынаң, оборудованиені нааҷылабысханда, тоғынарға хай-хай оой. Амғы туста гиря кӧдірерінең Cорығда, Харатаста, Ширада, Ағбан пилтірі поселокта паза Бородино аалда айғасчалар. Спорт кӧрімі чахсы тиліпчеткенінде федерацияның амғы устағҷызы Кирилл Жибиновтың хозымы улуғ. Аның туңмазы Фёдор аймах-пасха синде иртчеткен марығларда Хакасия ла ӱчӱн нимес, Россия ӱчӱн турысча.
Брейкинг фестивальның ӧӧн танииның пірсі полған. «Skіll Flң» теелбек школазының устағҷызы Прокопий Тормозаков тренер тоғызынаң 13-ҷі чылы айғас парир. Че пу спорт кӧрімінеңер Хакасияның чуртағҷыларының кӧбізі пылтыр піліп алған. 2022 чылда Тормозаковтың ӱгренҷізі Анатолий Ворошилов «Синяя птица» тиксі Россия синіндегі марығда чиңіc тутхан. Таланттығ саарбахха пір миллион салковай читіргеннер. Толя «Чииттер кӱзі» фестивальда аралас полбаан. Теелбекчі пӱӱл 9-ҷы классты тоосча. Ағаа сыныхтағлар тударға кирек. Брейкинг ачығында чон ӱзілбинчеткен. Школада теелбекчілер саны хозылар, неке.
Тиксі алза, «Чииттер кӱзі» спорт пайрамында 4 муң артиинаң кізі узын сынаан. Сизінгенде, мындағ фестиваль улуғ кирексіністе. Ол чонны піріктірче, наа спорт кӧрімнерінең таныстырча, олох туста кибірліг ойыннарны хайраллирға полысча.
Сом Валерия ТАМБОВЦЕВАНИ
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде