ПАСХАЗЫНА КӦЗІДІМ ПОЛЧАЛАР
07.06.2023
Хабарлар
Асхыс аймааның командазы
Хазых чуртас. Пу наада муниципальнай пӱдістер чӧбінің Cпартакиадазы ирткен. Марығда 150 артиинаң кізі араласхан
Ағбанның тынағ паркында чон ӱзілбинче. Анда спортнаң айғазар чахсы оңдайлар тӧстелген нооза. Кізілер велосипедтіг ойлатчалар, чӱгӱріснең айғасчатханнарның саны илееде. Тренажёрлар ачығында иртеннең иирге теере суум-саам турча. Ідӧк паркта тӧреміл спорт фестивальлары, марығлар иртчелер. 2 июньда анда Хакасияның муниципальнай пӱдістерінің тоғынҷылары Спартакиадаа чыылысханнар.
Пу кибірліг мероприятие. 2023 чылда ол сигізінҷі хати иртірілді. Спартакиадада Хакасияның прай город-аймахтары араласчалар. Марығ командаларның чӧрімінең азылған. Полған на муниципалитеттің спортта чидіглері пар. Кӧзідімге, Боград аймаан Даниела Колесник (пауэрлифтинг) ырахха сабландырча, Харатасты – Михаил Мамаев (дзюдо), Фёдор Жибинов (гиря кӧдірері). Пии аймаанаң Денис Чертыковнаң Артём Попов (ниик атлетика) сыхханнар. Асхыстағыларның пӱӱл чиңістерге пай чыл. Орындағы хызыҷахтар мини-футболҷа, аар атлетикаҷа Россия синінде ирткен марығларда Хакасияа медальлар ағылғаннар. Чидіглер аннаңох кӧп ползын тіп муниципалитеттер Спартакиада иртірчелер. Ӧсчеткен тӧлге кӧзідім поларға кирек.
Марығны пайрамни азарында Хакасия пазы Валентин Коновалов, Хазна Думазының депутаттары Николай Коломейцевнең Сергей Сокол, спорт министрі Сергей Кочан, Ағбанның пазы Алексей Лёмин араласханнар. Хайди таныхтаан Валентин Олегович, Спартакиаданың ӧӧн пӧгіні – чонны хазых чуртасха тартары. Мында марығда араласханы чиңістең аарлығ. Хакасия пазы чыылған чонға чахсы тынанып аларға алғаан. Хазна Думазының депутады Николай Коломейцев муниципальнай пӱдістернің тоғызына пӧзік паалағ пирген. Олар сидік тустарда даа чонның чуртазын чахсыландырарға оңдай таапчалар. Николай Васильевич, студент полғанда, спорт кӱрезінең айғастыр. Кибісте ағаа хакас оолларнаң тоғазарға киліскен. Ідӧк чоох тутхан Асхыс аймаа пазы, «Хакас Республиканың муниципальнай пӱдіcтерінің чӧбі» ассоциацияның кнезі Абрек Челтыгмашев. Абрек Васильевич Спартакиаданың тархынынаңар хысхаҷахти искір пирген. Марығ чылда ікі хати иртірілчеттір. Хысхызын город-аймахтарның ӧмелері Тӧӧ пазында тоғасчатсалар, чайғыдағы Спартакиада – кӧс чӧрчеткен мероприятие. Аны полған на чыл наа орында иртірчелер.
Спорт пайрамының программазы улуғ полған. Ікі кӱн аразына пос оңдайлығ спортсменнер дартста, стол теннизінде, пневматическай винтовканаң атыста, узунға сегірерінде, азах хаптыр салып посты кӧдірерінде, улуғ теннисте, чайғыдағы кёрлингте, хол пазызында устарын кӧзідерге маңнанғаннар. Че пастағы марығ турист эстафетазы полған. Аның тузында чыылған чонға кӧрілген орынға кимеліг чӱзерге, тартылған арғамҷыларҷа cығарға, чирде салылған чардыҷахтарҷа сегірерге киректелген. Эстафетада араласханнардаң Пыдырах аал чӧбінің пазы Семён Боргояковты таныхтирҷыхпын. Семён Михайлович Спартакиадада тӧреміл араласчаттыр. Аның чооғынаң, командазар 12 кізі кірче, эстафетада 10 спортсмен араластыр. Пыдырахтағылар спортха хынчалар. Пӱӱл майда аал чӧбінде грек-рим кӱрезінҷе паза футболҷа турнирлер ирткеннер.
Салтарлардаңар чоохтаза, пастағы орынға Ағбанның ӧмезі сыххан, ікінҷізі Ағбан пилтірі аймаа полыбысхан. Таштыптағыларның хола медаль. Пазағы чылда Спартакиада Саяногорскта иртер.
Сом Дина КАРАМЧАКОВАНИ
Автор :
Майя КИЛЬЧИЧАКОВА
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
