ИДІНҶЕКТЕРНІҢ КӰЗІ
07.06.2023
Хабарлар
Владимир СОРОКИН паза Михаил КРУТСКИХ
пірігістер хада-пірге тоғынарлар тіп чӧптес салдылар
Кӧзідіг. Пу наада «Хакасияның бизнес-платформазы-2023» регионнар аразындағы кӧзідіг Л.Р.Кызласовтың адынаң Хакас национальнай чир-суғ ӱгренҷең музейде иртті
ИРТКЕН ЧЫЛДА ХАКАСИЯНЫҢ САДЫҒ-ПРОМЫШЛЕННОСТЬ ПАЛАТАЗЫ «ХАКАСИЯНЫҢ БИЗНЕС-ПЛАТФОРМАЗЫ» КӦЗІДІГНІ ПАСТАҒЫЗЫН НА ИРТІРГЕН, ПӰӰЛ, ТІЗЕҢ, ОЛ РЕГИОННАР АРАЗЫНДАҒЫ СИНГЕ КӦДІРІЛЕ ХАЛҒАН. АНДА КІЧІГ ПАЗА ОРТЫН ПОС КИРЕЕНЕҢ АЙҒАСЧАТХАННАР ХАКАСИЯДАҢ НА НИМЕС, ЧЕ ІДӦК ХОНҶЫХ РЕГИОННАРДАҢ ЧЫЫЛЫСХАННАР: ХЫЗЫЛЧАР КРАЙЫНАҢ, ТОМСК, КЕМЕРОВ ОБЛАСТЬТАРЫНАҢ ПАЗА ПАСХА РЕГИОННАРДАҢ. АННАҢ ПАСХА, ХЫРЫҒ ОЗАРИНАҢ МООЛ ЧИРІНІҢ ДЕЛЕГАЦИЯЗЫ АРАЛАСХАН.
Музейнің ікінҷі хадылында «Хысхы сад» адалчатхан улуғ паза чарых зал пар. Анда аймах-пасха чыылығлар удаа иртірілче. Идінҷектернің регионнар кӧзідии андох полған. Залның иркінін алтаанда, Павел Боргояков позы сығарчатхан талғанынаң удурлаан. Аннаң андар кӧзідіг араласчыларының столлары ікі саринҷа изере турғаннар. Оларның аразында ӧдік, кип-азах сығарчатханнар полғаннар. Пастағылары ӧдікті Турцияда чахыпчатсалар, ікінҷілерінің цехтары пістің республикада орныхчалар. Пӱдіріг ниме-ноозын сығарчатхан илееде идінҷек полған. Олар кірпис, цемент, аймах блоктар, тимір ниме-ноо сығарчалар. Чурт садиинда, право сурығларынҷа, страхованиеҷе полызығлар читірчеткеннер полғаннарох.
Кӧзідіг орны кистінде, залның ортызында ӧнетін ачых тимнелген. Улуғ нимес сцена алнында одырчыхтар турғызылған. Мында «Хакасияның бизнес-платформазы-2023» регионнар аразындағы кӧзідіг пайрамни азылған. «Алтыр» мода театрының абахай хыстары «Архай» ӧменің «Нымах» сарынына кӧзідіг турғысханнар. Анаң Хакасияның Садығ-промышленность палатазының (ТПП) тоғызынаңар кӧзідіг кӧртізілген. 1990 чылларда пірігіcтің тоғызы хара тас, алюминий кӧcтеглерінҷе тоғынчатхан килкім промышленность предприятиелерінең палғалыстығ полған полза, пӱӱнгі кӱнде ол кічіг паза ортын пос киреенең хада регион тилізіне тоғынча. Пірігістің 100 азыра араласчызы саналча, ол санда идінҷектер паза аймах компаниялар. Хакасияның ТПП президенті Владимир Сорокиннің чооғынаң, амғы туста идінҷектернең хада килкім пос киреенең айғасчатханнарнаң тиң тоғыс апарылча. Оларның алнында пос киреен тилідерінең пасха, ідӧк ибіркі чуртас оңдайларын чахсыландырар, чонға киректелчеткен сурығларны пӧгер пӧгін турча. Идінҷектер дее пірігістің тузазын таныхтапчалар. Ол араласчыларына искірігліг, право паза ахча сурығларынҷа полысча.
Кӧзідігні пайрамни азарында араласханнар Россияның Хазна Думазының депутады, істенісче, социальнай политикаҷа паза ветераннарның киректерінҷе комитет кнезінің пастағы орынҷызы Николай Коломейцев, Хакасия пазы Валентин Коновалов, Ӧӧркі Чӧп кнезі Владимир Штыгашев, Ортын Сибирьдегі ТПП президенті Рафаэль Шагеев паза Томск облазының ТПП президенті Максим Костарев, Моол чирінің делегация устағҷызы Санж Сержим. Олар прайзы пос киреенең айғасчатхан улустың пӱӱнгі кӱнде киректелчеткенін паза «Хакасияның бизнес-платформазы-2023» кӧзідігнің тузазын таныхтааннар. Санж Сержим, тізең, Моол чирінің пос киреенеңер чоохтап, Хакасияның паза пасха регионнарның идінҷектерін оларнаң танызарға паза хада-пірге тоғынар оңдайлар табарға хығырған.
Аалҷылар чоохтанған соонаң Хакасияның ТПП-зының президенті Владимир Сорокин паза «Кимдегі Сибирьнің тиліс корпорациязы» коммерческай нимес автономнай пірігіcтің ӧӧн директор орынҷызы Михаил Крутских пірігіcтернің хада-пірге тоғынарларынаңар чӧптезігде хол салыбысханнар. Анаң аалҷылар идінҷектернің кӧзідиинең танысханнар.
Кӧзідігде ӱс сурығҷа ӱзӱріг ирткен: кооперацияларның тузазы паза хазна хабазии; команданы тӧстирі паза тилідері; ипчінің паза сӧбіренің пос киреен тилідері. Полған на ӱзӱрігні Владимир Сорокин апарған, араласчылар санында кӧп чыл маңнаныстығ тоғынчатхан идінҷектер, ученайлар араласханнар. Ідӧк идінҷектернің посты сценадаң таныстырар оңдай полған. Кем, тізең, пос киреене тузалығ идінҷекті таап алған, ағаа чӧптезіг орны тимнелген.
Сомнар Дина Карамчаковани
Автор :
Наталья СЮПТЕРЕКОВА
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
