Хакасияда "От ыры" Чоннар аразындағы VI марығ-фестиваль парча
10.06.2023
Хабарлар
30 чыл мының алнында Хакасияның чон артизі Герман Танбаев ырҷыларның аразында "От ыры" марығны чуртасха кирген. Пу сынап уғаа сіліг, чарых, чылығ фестиваль.
Пӱӱл ол алғым таныхталча. Хакас чирінзер марығҷылар Азербайджаннаң, Казахстаннаң, Кыргызстаннаң, Хыдаттаң, Моол чирінең, Крымнаң, Белоруссиядаң, Тывадаң, Алтайдаң килгеннер. Ідӧк пістің ӧткін хакас чайаачыларыбыс араласчалар.
- 12 июньда хазнаның ӧӧн ӱлӱкӱні - Россия кӱні - таныхталча. Ағаа пістің чарых "От ыры" Чоннар аразындағы фестиваль чарыдылча. Чыл сай 12 июньда марығның халғанҷы чардығы иртче. Анда Россияның аймах регионнарының паза хырығ озариндағы хазналарның ырҷылары араласчалар. Олар пос чонының сіліг сарыннарын толдырчалар. Прайзының кӧңні чахсы ползын! - пресс-конференцияда "От ыры" марығның араласчыларын удурлап, чоох тутхан Хакасияның культура министрі Светлана Окольникова.
Тоғазыға ыраххыдаң килген аалҷылар сыйыхтығ килгеннер. Ол сыйыхтарны алып, Светлана Анатольевна амды "От ыры" фестивальның музейін азарға кирек теен.
Амды С.П.Кадышевтің адынаң чон чайаачызы кінінде "От ыры" фестивальның полуфиналы иртче. Таңда, 11 июньда, аалҷылар Сойан-Сус ГЭС-ты паза "Улуғ Хуртуйах тас" музейні кӧрерге парарлар.
Улуғ марығның чиңісчізінің адын 12 июньда, Россия кӱнінде, піліп аларбыстар.
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 1 | 2 |
| 3 | 4 | 5 | 6 | 7 | 8 | 9 |
| 10 | 11 | 12 | 13 | 14 | 15 | 16 |
| 17 | 18 | 19 | 20 | 21 | 22 | 23 |
| 24 | 25 | 26 | 27 | 28 | 29 | 30 |
| 31 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
