Чир-суубыстың ӧӧн ӱлӱкӱні
12.06.2023
Хабарлар
С.П.Кадышевтің адынаң чон чайаачызы кінінде Россия кӱніне сіліг чайаачы иир чарыдылған.
12 июнь - Россияда чуртапчатхан прай чонны піріктірчеткен ӱлӱкӱн. Украинада ӧнетін чаа операциязы парчатхан туста пістің аймах тілліг чоныбыс хада-пірге улам пик тудынча.
Россия Федерациязының гимні ойнаан соонаң Хакасия пазы Валентин Коновалов прайзын чарых кӱннең алғыстаан:
- Аарлығ нанҷылар, прай чӱреемнең сірерні Россия кӱнінең алғыстапчам. Пу ӱлӱкӱн Чир-суубыстың тархынын улуғлапчатхан, аның таңдағы амыр чуртазы ӱчӱн тіспен істенчеткен чонны піріктірче. Ибдегі очых, аал-городтардағы орамалар - ол чӱрекке иң чағын орыннар. Чуртас чолы кічіг Чир-суғдаң пасталча. Ада чирібіске полған на кізі хозым итче. Піс хада - улуғ кӱс! Піске хазнабысты паза чоныбыстың кирексіністерін хада арачылирға кирек. Прайзына пик хазых, часка, амыр чуртас алғапчам!
Анаң регион пазы Валентин Олегович республиканың
турыстығ чуртағҷыларына хазнаның пӧзік сыйыхтарын читірген. С.П.Кадышевтің адынаң чон чайаачызы кінінің "Ынархас" олған теелбек студияның балетмейстері Елена Шарай "Россия культуразының саблығ тоғынҷызы" аарластығ ат алған, Н.Ф.Катановтың адынаң Хакас национальнай гимназияның математика ӱгретчізі Ольга Балганова - "Россия Федерациязының саблығ ӱгретчізі" аарластығ ат, Асхыс аймаандағы Оңхак аалның пасталығ класстар школа ӱгретчізі Наталья Чертыкова - "Россия Федерациязының саблығ ӱгретчізі" - пӧзік ат. Хакасия искусствозының саблығ деятельі паза чон артизі, "Ӱлгер" фольклор ансамбльның хоос устағҷызы Кучен Ай Чарых Сайынға Хакасияның Н.Ф.Катановтың адынаң хазна сыйии читірілген. "Кӱн чахайағы" хакас сарын паза теелбек ансамбльның устағҷызы Анна Бурнакова Хакасия пазының алғыстастығ пічиин алған.
Сыйыхтастар соонаң Оңхак аалдағы школаның ӱгретчізі Наталья Чертыкова позының кӧңнінең ӱлескен:
- Мин Оңхак аалдағы школада 41 чыл істен парирбын. Тӧреен-ӧскен чирім Таштып пилтірі полча. Анда 8 классха теере ӱгренгем. Ортымах школаны Ис пилтірінде тоосхам. Анаң Ағбандағы ӱгретчілер тимнеҷең институтсар кіріп алғам. Хакас паза орыс тіллері ӱгретчізіне ӱгренгем. Диплом алған соонаң кöстег хоостыра Асхыс аймаанзар тоғынарға парғам. Оңхактағы пасталығ класстар школада орыс тілі ӱгретчізі полып істеніп пастаам. Пӱӱнгі кӱнде пістің школада 12 ле ӱгренҷі ӱгренче. Наа ла тоғынарға килгенімде, 1981 чылда, 38 пала полған.
Наталья Николаевна Чертыкова "Россия Федерациязы ӱгредиинің аарластығ тоғынҷызы" пастағы пӧзік сыйиин 1999 чылда алған. 2012 чылда ол Хакасияның саблығ ӱгретчізі пол парған. Ам "Россия Федерациязының саблығ ӱгретчізі" аарластығ атха турысты.
- Тоғызымны піди пӧзік паалапчатханнары ӱчӱн, ӧріністіг, чӱрекке истіг. Прай кӱсті салып, Худай пирген піліснең толдыразынаң тузаланып, прай нимені тузында итсе, толдырған тоғыс хаҷан даа паалалча, - тіпче ол.
Россия кӱніне чарыдылған ӱлӱкӱнде залға толдыра чыылысхан кӧрігҷілерге "От ыры" Чоннар аразындағы марығ-фестивальға ыраххыдаң килген аалҷылар паза чон чайаачызының ӧмелері концерт кӧзіткеннер.
Сомнар Хакасия пазының пресс-службазыни
Автор :
Татьяна Тютюбеева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде