СААРБАХТАРҒА – ХАЗНАНЫҢ ӦӦН ПІЧИИ
16.06.2023
Хабарлар
![СААРБАХТАРҒА – ХАЗНАНЫҢ ӦӦН ПІЧИИ СААРБАХТАРҒА – ХАЗНАНЫҢ ӦӦН ПІЧИИ](/upload/iblock/71d/71ddf2385a6379b2d3183a51b111f425.jpg)
Алексей КОКОВ (Асхыстағы лицей), Арина ЕРКИБЕЕВА (Московскайдағы школа), Тарина КОТЮШЕВА (Хакас гимназиязы), Майя ЧЕБОДАЕВА
(Хакас гимназиязы) паза Дмитрий МОРОЗОВ (Сорсктағы 3 № школа)
Танығлығ кӱн. Чыл сай Россия кӱніне Хакасия правительствозының туразында Хакасия пазы Валентин Коновалов ӱгредігде, спортта, наукада, чайаачы тоғыста пӧзік чидіглерге читкен 14 частығ ӱгренҷілерге паспорттар читірче
Хакасия правительствозының туразынзар сигіс оолағас паза 10 хызыҷах хығыртылған. Муниципалитеттер андар иң артыхтарын, таллап, ысханнар. Пу олғаннар чахсы ӱгреністерінең пасха, ідӧк аймах-пасха киректернең айғасчалар. Кӧзідімге, Ағбан пилтірі аймаандағы Московскай аалның ортымах школазының ӱгренҷізі Арина Еркибеева прай предметтерҷе «4-5» паалағларға ӱгренче, ідӧк ол компьютер моделированиезінең, робототехниканаң, мультипликациянаң хынып айғасча. Ағаа хоза спортха хынча. Ол волейбол паза пейнтбол чалтырама ойнапча.
– Че аймах предметтерҷе олимпиадаларда аралазарға иң артых хынчам. Ӧӧнінде математикаҷа паза биологияҷа. Чуртазымны программированиенең палғалыстырарға пӧгінчем. Аннаңар мин программированиеҷе кружокка чӧрчем, – чоохтапча Арина.
Асхыстағы лицей-интернаттың ӱгренҷізі Алексей Коков пӱӱл 7-ҷі ле класс тоосты, че сағызы паза чооғы улуғларни ле осхас.
– Хакасия правительствозында паспорттар алғаны піске уғаа танығлығ. Амды полған на хаалағ ӱчӱн закон алнында нандырығлығбыс, – таныхтаан ӱгренҷі.
Алексей самбо, баскетбол секцияларына чӧрче. Ідӧк ікі чыл мының алнында «Юнармия» чӧрімге алылған. Андар кӱстенҷік, сидіксіністердең хорыхпинчатхан паза пик сындырлығ олғаннарны алчалар. Пу кирексіністерге Алексей прай нандырча.
– Мыннаң мындар мин пилот поларға сағынчам. Аймах чирлер кӧрерге хынчам. Сағызым толар ӱчӱн, чахсы ӱгренерге паза турғысхан пӧгіннерге чидерге кирек, – чооғын узаратча паспорт ээзі.
Аринанаң Алексейні паза даа пасха олғаннарны паспорттар алғанынаң Хакасия пазы Валентин Коновалов алғыстаан.
– Паспорт – ол хайдағ даа хазнаның иң ӧӧн пічии. Аны алғаны уғаа чӱрексіністіг, че олох туста нандырығлығ кирек. Ол улуғ чуртассар пастағы хаалағ, хайзында праволар ла нимес, ідӧк нандырығлар кӧп. Аарлығ олғаннар, сірер Россия чуртағҷызы полчатханын ундутпаңар. Ол уғаа аарластығ. Паспортты иптіг тудыңар паза Россия гражданині полчатханыңарға поғдархаңар! – айланған саарбахтарзар Валентин Олегович.
Сомнар Дина КАРАМЧАКОВАНИ
Автор :
Оксана СУНЧУГАШЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде