ЧОН ХАЗИИ ӰЧӰН – УЙҒУ ДАА ЧОХ
16.06.2023
Хабарлар
![ЧОН ХАЗИИ ӰЧӰН – УЙҒУ ДАА ЧОХ ЧОН ХАЗИИ ӰЧӰН – УЙҒУ ДАА ЧОХ](/upload/iblock/8db/8db37246510d3ce92486578c860e90e9.jpg)
Хакас Республиканың Аарластығ пічиин алған имнег киреенің тоғынҷылары: (сол саринаң) Ирина ТОПОЕВА, Лариса КЫСТОЯКОВА, Александра КАРАМЧАКОВА, Маргарита ЧЕБОДАЕВА
Имнег тоғынҷызы кӱні. Профессия ӱлӱкӱніне удур хандых айының 14-ҷі кӱнінде М.Ю.Лермонтовтың адынаң Орыс драма театрында пӧзік чидіглерге читкен паза тӱзімніг істенчеткен имнег тоғынҷыларын таныхтааннар
ИМҶІЛЕРНІ ПАЗА ИМНЕГ ТОҒЫНҶЫЛАРЫН ӰЛӰКӰННЕҢ АЛҒЫСТАП, ОЛАРҒА ТАНЫҒЛЫҒ СЫЙЫХТАР ЧИТІРЕРІНДЕ ХАКАСИЯ ПАЗЫ ВАЛЕНТИН КОНОВАЛОВ, АНЫҢ ОРЫНҶЫЗЫ МИХАИЛ ПОБЫЗАКОВ, РЕГИОННЫҢ ХАЗЫХ ХАЙРАЛЛАҶАҢ МИНИСТРІ ОЛЕГ АНАНЬЕВСКИЙ, РЕСПУБЛИКАНЫҢ ӦӦРКІ ЧӦБІНІҢ ХАЗЫХ ХАЙРАЛЛИРЫНҶА ПАЗА СОЦИАЛЬНАЙ ПОЛИТИКАҶА КОМИТЕДІНІҢ КНЕЗІ ЕВГЕНИЙ МОЛОСТОВ АРАЛАСХАННАР.
Амғы туста Хакасияның имнег киреенде тиксі 11829 тоғынҷы істенче, оларның санында 1714 имҷі, 4724 ортын паза 1012 кічіг имнег персоналы.
Хакасия пазы Валентин Коновалов пӧзік чидіглерге читкен паза тоғыстарын матлама толдырчатхан имнег тоғынҷыларына танығлығ сыйыхтар читірер алнында имнег киреенде істенчеткеннерні ӱлӱкӱннең алғыстаан.
– Хакасия правительствозы республиканың полған на чуртағҷызына имнег полызии оой читірілер ӱчӱн кӧп ниме итче. Ол тоғыс иң пастап имнег тоғынҷыларына аймах хабазығлардаң пасталча. Кӧзідімге, ирткен чылда имҷілерге 31 квартира алылған. Ідӧк республикада «Земский доктор» паза «Земский фельдшер» программалар чуртасха кирілчелер. Ол хабазығлар полызиинаң піске республиканың имҷілерін, Россияның пасха субъекттерінзер позытпин, тут халарға полысча. Хакасияның город-аймахтарында имнег учреждениелері пӱдірілче. Ирткен чылда 16 ФАП паза амбулатория азылған, пӱӱл, тізең, алты хазых хайраллаҷаң объект тузаланысха кирілер тіп кӧрілче. Республикада ідӧк амғы тусха килістіре наа оборудование ӧткін алылча. Хакасияда аймах сылтағларнаң ӱрепчеткеннернің саны синче, онкология ағырығларынаң пасти чоллардағы саайларға теере. Сірернің оой нимес тоғыстарың полбаан полза, мындағ чидіглерге піс читпесчікпіс. Аннаңар позымның паза Хакасия правительствозы адынаң сірерге улуғ алғызыбысты читірчем, – чоохтаан республика пазы.
Хакасияның хазых хайраллир киреенің тилізіне улуғ хозым иткен ӱчӱн «Хакасияның істеніс сабланызы» медальлар Хакасияның хайди даа итчең имнег страхованиезі чыындызының директоры Любовь Бурнаковаа паза Г.Я.Ремишевскаяның адынаң имнег туразындағы сурдология кабинедінің устағҷызы Наталья Локотковаа читірілгеннер. «Хакасияның саблығ имҷізі» атха турысханнар: Харатастағы аймахтар аразындағы имнег туразының терапевті Жанна Толмашева, республиканың олған имнег туразының анестезиолог-реаниматологы Павел Коков, республиканың клиническай чарғы-имнег сыныхтағ бюрозының пӧлік устағҷызы Анжелика Ильясова, республикадағы реабилитация паза спорт-имнег кінінің устағҷызы Светлана Овчаренко, Копьевтағы имнег туразының тиксі практикалығ имҷізі Ирина Петренко, Саяногорсктағы аймахтар аразындағы имнег туразының ӧӧн имҷізі Людмила Мартюшова, республикадағы тіс имнеҷең поликлиниканың ӧӧн имҷізі Анна Сухих. Наталья Белоусоваа «Хакасияның хазых хайраллирының саблығ тоғынҷызы» ат пирілген.
Хакасияның Аарластығ пічии 44 имнег тоғынҷызына читірілген. Олар, республикадағы аймах-городтарның имнег тураларында илееде чыл істеніп, чуртағҷыларның хазиин хайраллир ӱчӱн прай кӱстерін салчалар. Хакасия Ӧӧркі Чӧбінің алғыстас пічиин алты имнег тоғынҷызы алған.
Министр Олег Ананьевский, имнег киреенде тоғынчатханнарны ӱлӱкӱннең алғыстап, «Хазых хайраллирының отличнигі» танығны паза Хакасияның хазых хайраллаҷаң министерствозының Аарластығ пічиин имнег тоғынҷыларына читірген.
Чыл сай республикада имнег тоғынҷылары аразында иртірілчеткен марығның чиңісчілеріне сыйыхтар читірілче. Пӱӱл «Иң артых чыл имҷізі» номинацияда Г.Я.Ремишевскаяның адынаң республиканың имнег туразының неврология пӧлиинің устағҷызы, имҷі-невролог Елена Безляк чиңісчі полыбысхан, «Иң артых ортын ӱгредігліг специалист» номинацияда – перинатальнай кіннің анестезиология-реанимация пӧлиинің ӧӧн медсестразы Елена Середина. «Тоғысха тӱгеде пирін салған ӱчӱн» номинацияда Саяногорсктағы аймахтар аразындағы имнег туразының кічіг медсестразы Наталья Москвина утхан.
Сом Дмитрий СУНЧУГАШЕВТИ
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде