Кӱстіглернің cанында – Саяногорск
23.06.2023
Хабарлар
![Кӱстіглернің cанында – Саяногорск Кӱстіглернің cанында – Саяногорск](/upload/iblock/684/akdjxr7x1xejkxdcbhqumbwd1130usy8.jpg)
Виталий Карпов паза Варвара Шитова сыйыхтатхан туста
Спорт. Ағбанда суғҷа чӱзерінҷе «Сибирь кубогы» марығ ирткен
Марығ тархынын 1993 чылдаң апарчаттыр. Ол тӧрт чардыхтаң пӱтче. Ағбанда Сибирь кубогының ікінҷі чардығы иртче. Пӱӱл турнирде Сибирьдегі федеральнай округтың прай регионнарының чиит спортсменнері араласханнар. Тиксі 514 кізі.
Хакасия алнын Ағбанның, Саяногорсктың паза Абазаның саарбахтары алғаннар. Пістің республикада суғҷа чӱзерінҷе пір ле спорт школазы. Ол Ағбанда орныхча. Че спорт кініне Саяногорскты санирға чарир. Россияның спорт узы атха турысханнарның илеедезі металлургтар городынаң сыххан. Амғы туста секциянаң Елена Бобрикова устапча. Марыға Елена Андреевна 12 ӱгренҷізін ағылтыр. Олардаң прайзының хайиин Виталий Карпов тартхан. Анзы тиктең нимес. Пӱӱл 16 частығ спортсмен улуғ марығларда сыйыхтығ орыннарға сыхча. Саарбах мартта Сибирь чемпионадында, ӱзінҷі орынға сығып, Россияның спорт узы нормативін толдырыбысхан. Майда наа чидіг. Виталий Россия первенствозында кӱмӱс медаль холға кирген. Амды хайди чӱзібізер ни? Чоохтирға кирек, суғҷа чӱзерінде тӧрт cтиль: кроль, брасс, учада чӱзері паза баттерфляй. Сибирь кубогы двоеборье оңдайынаң ирткен. Андағ марығларда спортсменнерге пір оңдайнаң, че аймах дистанцияларда чӱзерге киректелче. Полған на марығда олар саннар чыыпчалар. Иң кӧп сан чыып алған спортсмен чиңіс тутча. Комплекс чӱзері дисциплинаны таныхтирға кирек. Анда спортсменнер тӧрт аймах стильнең чӱсчелер, дистанция узуны – 200 алай 400 метр.
Виталий ікі дисциплина таллап алтыр. Ол кроль оңдайынаң 100 паза 200 метр чӱскен, комплекс чӱзерінде – 200 паза 400 метр. Ағаа хоза, арғыстарынаң хада эстафеталарда араласхан. Виталий Карповтың 4 медаль: ӱс алтын паза пір хола.
Саяногорсктағылар эстафетада чиңіс тутханда, кӧбізі чапсаан. Тренер Елена Бобрикованың таниинаң, мында хайхаҷаң ниме чоғыл. Июньда кӱстіг спортсменнернің кӧбізі марыға кил полбиндыр. Кем-де школада сыныхтағлар тутча, кем-де сборларға парыбыстыр. Итсе, Елена Андреевна – улуғ чоохтанарға хынминчатхан кізі.
Ағбандағылар постарын турыстыра кӧзіткеннер. Кічіглердең Ярослав Яркинні (І орын) паза Никита Логиновты (ІІІ орын) таныхтирҷыхпын. 15-16 частығларның аразында чидіглерінең Егор Ваземиллер паза Иван Косьянов ӧріндіргеннер. Пастағы спортсмен кӱмӱс медаль утхан, Косьянов ӱзінҷізі полыбысхан. Ағбанның командазына эстафеталарда оң полған. Комплекс чӱзерінде улуғлар – Егор Ваземиллер, Антон Курган, Евгений Березин паза Иван Косьянов – чиңіс тутханнар. Пуох дисциплинада кічіг оолахтарның ӧмезі ӱзінҷі орынға сыххан. Ідӧк улуғ саарбахтар кроль оңдайынаң чӱзер ікі эстафетада хола медальлар холға киргеннер. Оларның пірcінде чир-cуғҷыбыс Екатерина Шалгинова араласхан. Катяа 14 час, ол Ағбанның 1 № школазында ӱгренче. Пӱӱл 7-ҷі класс тоос салған. Хызыҷах тренер Сергей Вадимович Бережнойның холында узын таптапча. Катя эстафеталар чӱзерге кӱс. Анзы оой нимес. Спортсмен ӧменең тоғынарға пілерге кирек. Пылтыр Сибирь кубогында хакас саарбах ӧӧрелерінең хада чиңіc тутхан. Пӱӱл ол Иван Косьяновнаң, Егор Ваземиллернең паза Варвара Безъязыкованаң хада дистанцияа сыххан.
Ағбанда иртчеткен арға-мӧрійлерде Хызылчар крайының спортсменнері ӧткін араласчалар. Зеленогорск городтаң (алында ол Хызылчар-45 адалған) команданы Руслан Сакаев ағылған. Тренернің таниинаң, городта cуғҷа чӱзері хомай нимес тиліпче. Орындағы спорт школазының ӧӧн поғдархазы Юрий Мухиннең Арина Опёнышева полчалар. Мухин 1992 чылда ирткен Олимп ойыннарында алтын медаль утхан. 24 частығ Опёнышеваа 2016 чылда Олимпиадада аралазарға ӱлӱс тӱскен. Руслан Сакаевтің ӱгренҷізі Ярослав Никулин Европа первенствозының кӱмӱс призёры полча. Зеленогорсктағылар Сибирь кубогынаң пір алтын паза пір хола медальлығ айланғаннар.
Сыйыхтас тузында, медальлардаң паза грамоталардаң пасха, чиңісчілерге хоза нымзах ойнаҷахтар читірілген. Кибір хоостыра турнирнің иң чахсы спортсменнерін Ағбан пазының сыйиинаң таныхтааннар. Артыхтарның артығына Виталий Карповнаң Варвара Шитова (Хызылчар) сыхханнар. Кічіглердең алынҷа сыйыхха Ярослав Яркин паза Олеся Яковлева (Хызылчар) турысханнар.
Сом Наталья Мальцевани
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде