Владимир Штыгашев: «Кӱзім ам даа пар»
23.06.2023
Хабарлар
![Владимир Штыгашев: «Кӱзім ам даа пар» Владимир Штыгашев: «Кӱзім ам даа пар»](/upload/iblock/409/hr792o05c7cqj6tsgw6nwq1nqmgxq67l.jpg)
Владимир Штыгашев республиканың Ӧӧркі Чӧбі тилізіне 33 чыл чарыт салған
Пос кӧрізі. Хакасияның Ӧӧркі Чӧп кнезі Владимир Штыгашев республикадағы табығ алнындағы киректерҷе позының кӧрізінең «Хакасия» искіріг агентствозынаң ӱлескен
Пӱӱл ӱртӱн айында пістің республикада ӧӧн табығлар иртерлер: Хакасия пазы орнына паза Ӧӧркі Чӧп депутаттарына. Ӧӧн кӱрезіг ікі политика партиязы аразында парча: «Единая Россия» паза КПРФ. Пу тусха теере Хакасияның Ӧӧркі Чӧп кнезі Владимир Штыгашев «Единая Россияның» ӧӧн араласчыларының пірcі полған. Че пу наада ол хазна ӱлгӱзі партиязынаң сығарға чаратхан. Ноға ол андағ чарадыға килген? Пу чарадиин ол 19rғsіnfo.rғ интернет-сығарысха піди чарыт пирген:
– Минің пір дее демарш полбаан. Табығларға хайдағ-да партия хабазиинаң парарға кирек. Арса, пірее партиядаң аралазарбын, арса, позым даа хол салғанын чыып, парарбын. Парламентті, хайзын тӧстиріне мин 33 чыл – Иисус Христостың салған чазын – чарыт салғам, хайдар-да тастабызар кӧңнім чоғыл.
Мин пос алынҷа парзам (табығлардаңар чоох), пістің тӧреен партиядаң сығарыбызарлар, анаң сірернің саба хабар пирчеткен оңдайларҷа искіріп пастирлар: мына ол, адай, ол парыбысхан, сығыбысхан, ол андағ-мындағ, ол тастабысхан. Мин аны прай пілчем. Оларға андағ оңдай пирбес ӱчӱн, мин позым пазыбысхам: мындағ-да кӱннең сығара мині партиядаң сығыбысхан тіп санирға сурынчам. Амды мин пос поларбын...
…Мин позымны сынабох кӧрерге чарат салғам. Хакасия чонына туза ағылып тоғынарға кӱзім парын пілчем. 2018 чылда политикадаң парыбызар, науканаң айғазар сағыс полған, че мині ам даа кирексің тееннер. Ам, тізең, позымның уламох ӧткін аралазар кӧңнім пар.
Чуртағҷыларға табығларда кемге ӱн пирчеткеннерін ситкіп, тирең паалирға чӧптирҷікпін. Че иң ӧӧні – оларның ӱн пирген кізідең ниме ит салғанын сурап полары. Чуртас синін, киині, экологияны, хазых хайраллирын алай чолларны чахсыландырыбысхан ма?
Владимир Штыгашев ідӧк пасха сурығларҷа сағыс-кӧрізінең ӱлесче: ноға Валентин Коноваловтың ӱлгӱзін прай пис чыл изере хомайлапчалар, позы ол чиит устағҷының тоғызында хайдағ читпестерні кӧрче, республика правительствозының хайдағ чидіглеріне чӧпсінче, ноға республиканың бюджет парызы ікі хати ӧс парған паза аның Федерация Чӧбіндегі чооғы пу алызыға хайди теелген. Хакас политиказының ах сағалы ідӧк Пірге табығ кӱнін ӱс кӱнге сӧӧ тартханынаң тоғыр турча. Ӱс кӱн ӱн пирзе, чонны хаңыртып поларлар ба? Владимир Штыгашевтің кӧрізінең, андағ ниме полбас ӱчӱн, партиялардаң кӧрҷең кізілер киректелер. Хараазын, тізең, участоктар чабыл парза, хыринда палтылығ турарға.
Владимир Штыгашевтің толдыра чооғын 19rғsіnfo.rғ сайттың «Хакасия омаларда» рубрикада таап аларға чарир.
Сом Дина Карамчаковани
Автор :
Тимнеен Наталья СЮПТЕРЕКОВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде