Палаларға тӧлеглер халар
23.06.2023
Хабарлар
Ӧӧркі Чӧп. Хакасияның Ӧӧркі Чӧп кнезі Владимир Штыгашевтің устаанынаң республика парламентінің президиумының теестегі чыылии ирткен
Президиум араласчылары хайиина 17 сурығ сығарылған, ол санда Хакасия правительствозы паза Ӧӧркі Чӧп комитеттері тимнеен закон проекттері, парламент чарадииның проекттері, федеральнай закон проекттеріне тӧрт ӱндезіг паза пасха регионнарның устағ-пастааның федеральнай ӱлгӱлерзер айланыстарына хабазары.
Республика правительствозы тимнеен закон проекттері аразында «Ниме-ноо сығарызының паза тузаланғанының сӧп-сабынаңар» Хакасия законының 6-ҷы статьязына алызығлар кирерінеңер» закон проекті хайығ тартхан. Искірігнең чоох тутхан республиканың чир-чайаан ис-пайы паза экология министрінің пастағы орынҷызының тоғызын толдырчатхан Алик Картин. Наа алызығлар Хакасия правительствозына регион операторын толдырчатхан тоғызынаң позыдарға оңдай пирер. Депутаттар пу закон проекті ам на тимнелгеніне чапсааннар. Хакасияда федеральнай законҷа регион операторы писче чыл мының алнындох табылған, пу тус аразына «хаңаа ам даа орнында турча», сынны чоохтаза, сӧп-сапты чыырынҷа, сығарарынҷа паза чох идерінҷе алызығлар кирілбеен. Ағаа хоза, регион операторы позының кӧні тоғызын даа иптеп полбаан. Итсе, ол хуруғ орынзар килбеен.
Хакасия пазының чарадиина тӧстеніп, хазых хайраллирынҷа паза социальнай политикаҷа комитет депутаттары «Хакасиядағы олғаннарға хазна пособиезінеңер» закон проектін тимнебіскеннер. Хазнада палаларға 17 час толғанҷа пірге пособие тӧлелче. Федеральнай законда, тізең, олғаннарға хазна пособиезі хыйа иділген. Че республика пазының чахиинҷа Хакасияда аны хайраллап халарға чарадылған. Ол чуға чуртапчатханнарға ай сай тӧлел турар. Законға ідӧк килістіре алызығлар кирілер.
Россия правительствозы «Килкім парысха налогтаңар» федеральнай закон проектін тимнебіскен. Аны хоостыра 1 миллиард салковай азыра парыстығ предприятиелерге хоза налог кӧрілер. Республиканың Ӧӧркі Чӧп депутаттары наа алызығларға чӧпсінгеннер. Че хара тас предприятиелері ол пічікке кирілбезі прайзын на чӧпсіндірбеен. Бюджетче паза налог политиказынҷа комитет кнезі Олег Ивановтың таниинаң, анзы пу кӧcтеге кидеркі хатығластар теелчеткенінең палғалыстығ.
Президиум кізілері Хакасияның Ӧӧркі Чӧбінің читінҷі хығыртииның пайрамнығ 50-ҷі сессиязын от айының 5-ҷі кӱніне хығыртарға чарат салғаннар.
Сом Ӧӧркі Чӧп сайтынаң
Автор :
Наталья СЮПТЕРЕКОВА
| Пн | Вт | Ср | Чт | Пт | Сб | Вс |
| 27 | 28 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
