Хакасияның «алтын» чииттерiне чарыдып
28.06.2023
Хабарлар
![Хакасияның «алтын» чииттерiне чарыдып Хакасияның «алтын» чииттерiне чарыдып](/upload/iblock/399/frsmjesm31u7psitgwxwcf7b28zbto7b.png)
Ӱлӱкӱн. Тынағ кӱннерде Ағбандағы «Саяны» стадионда Республиканың чииттер кӱнi алғым таныхталған
Чечiме иирде, тигiр хара пулуттарнаң чорғаныбысхан полза даа, чазан салған абахай оол-хыстар «Саяны» стадионзар маңзырапчатханнар. Анда оларны чииттер ӱлӱкӱнiнең регион пазы алғыстир. Iдӧк ырҷыларның, артисттернiң чапсых кӧзiдиин кӧрiп аларға чарир.
Чыылысчатхан чонны стадионның хаалхазы хыринда волонтёрлар чалахай удурлааннар паза одырҷаң орыннарзар иртiргеннер.
Ӱлӱкӱн пасталар алнында хазыр чил кӧдiрiлiбiскен. Иирде городта хайдағ кӱн турарын Интернет пастыра азынада пiлiбiскен кiзiлер сӱӱмектерiнең зонттарын паза плащтарын сығара тартханнар. Кӱн алысчатса даа, прайзының кӧңнi кӧдiре полған.
Хакасияда ӧткiн оол-хыстар чуртапчалар – спортсменнер, халыхчылар, культура тоғынҷылары, идiнҷектер, ӱгретчiлер. Оларны Россияның паза Хакасияның гимннерi ойнаан соонаң республика пазы Валентин Коновалов алғыстаан:
– Аарлығ нанҷылар, 2023 чыл республикада Чииттер чылы тiп чарлал парған, аннаңар сiрернiң пӱӱн iкi ӱлӱкӱн. Чииттернiң тилiзi ӱчӱн пiс прай кӱзiбiс салчабыс, аймах гранттар, марығлар, мероприятиелер иртiрчебiс. Че ӧӧнi – чиит чуртағҷыларыбыс ӧткiннер, сым одырбинчалар, тӧремiл наа кӧрiстерiн читiрчелер, хынған сағыстарын чуртасха кирчелер, пӧзiк чидiглерге читчелер, алнынзар ла хаалапчалар. Юридическай саринаң позым iдӧк чииттернiң санына кiрчем. Кӧрчем, пӱӱн мында школа тоосхан оол-хыстар чыылыс парғаннар. Iзенчем, сiрер таңдағы чуртазыңарны пiстiң республиканаң палғалыстыр саларзар. Пiстiң тiспен хылиибыс, кӱзiбiс пар. Тӧреен чир-суубыстың таңдағы чарых кӱнi ӱчӱн пiс хада прай cидiксiнiстернi тобырып аларбыс. Кӧңнiлерiң чахсы ползын! Чииттер кӱнiнең!
Регион пазы чылығ сӧстер читiрген соонаң сценазар Хакасияның ӱгредiг паза наука министрi Анатолий Бутенко сыххан. Валентин Олегович паза Анатолий Алексеевич, школаны чидiглiг тоозып, ЕГЭ-ны 100 баллға тутхан выпускниктернi «Хакасияның алтын iзенiзi» медальнаң паза ахчалығ сыйыхнаң таныхтааннар. Iди медальны паза 40 муң салковай ахчалығ сертификатты Н.Ф.Катановтың адынаң Хакас национальнай гимназияның ӱгренҷiзi Данил Попияков алған. Ол орыс тiлi паза тархын предметтернi чӱзер баллға тудыбысхан. Олох гимназияның ӱгренҷiзi Аланго Сунчугашева орыс тiлiнең пiрге хазна сыныхтаанҷа иң пӧзiк балл алып алған. Ағаа iдӧк «Хакасияның алтын iзенiзi» медаль паза 20 муң салковайлығ сертификат читiргеннер.
Олох кӱнде регион пазы Валентин Коновалов Н.Ф.Катановтың адынаң Хакас гимназияда саңай «пистерге» ӱгренген Алина Шалгынованы паза Руслан Тиниковты «Хакасияның алтын iзенiзi» медальнаң таныхтаан.
Iдӧк республиканың ӧткiн чииттерiн алғыстааннар #МыВместе тиксi Россиядағы удур-тӧдiр хабазығ пирҷең чӧрiмнiң муниципальнай штабының устағҷызы Анна Медведева, Хакасияның чир-спорт федерациязының устағҷызы Виктория Толстопятова, «ЮНАРМИЯ» чӧрiмнiң региондағы штаб устағҷызы Ваагн Харатян паза «Синяя птица» тиксi Россиядағы чиит чайаачылар марииның чиңiсчiзi Анатолий Ворошилов.
Ӱлӱкӱннi В.Г.Чаптыковтың адынаң Хакас филармониязының ырҷылары, «Шейк», «Кӱн сузы» ансамбльлар, «Ынархас» паза «Час ханат» олған студиялары концертнең чазааннар. Сарын-теелбектер ӧӧнiнде пiстiң илбек хазнабысха хынысты кӧзiткеннер. Чарых пайрамға хазыр чил дее, соох наңмыр даа харығ полбаан.
Амды школа тоосхан чииттерге улуғ чуртассар хаалағ идерге халды. Олар, чахсы сағынып, ибде iҷе-пабаларынаң, аға-ууҷаларынаң чӧптезiп, хайдағ профессияа ӱгренерiн таллапчалар.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде