Фермерлерге – ахчалығ хабазығ
28.06.2023
Хабарлар
![Фермерлерге – ахчалығ хабазығ Фермерлерге – ахчалығ хабазығ](/upload/iblock/ab5/gqa4v1mqpokjimlieqm7ymmd3t1c5dd1.png)
Сыйыхтас. Хакасия пазы Валентин Коновалов республиканың идiнҷектерiне паза фермерлерiне хоныхтарын тилiдерге грант сертификаттарын читiрген
Россияда аал хонии экономиканың ӧӧн кӧстее полча, аннаңар ағаа хабазарына улуғ хайығ айландырылча. Iди «Кiчiг паза ортын пос кирее паза идiнҷектiң пастаана хабазары» нацпроектче пос хониин тилiдерге сағынчатхан чуртағҷыларның «Агростартап» грантты алҷаң оңдай пар. Хабазығ iдӧк сӧбiре фермаларына паза аал хонии кооперативтерiне пирiлче. Пу наада Хакасия ӱлгӱлерi гранттарға турысхан фермерлернi чеестедiлер.
– Хоныхты алғытчаң тус читтi, – андағ сағысха килiп, фермер Дмитрий Чаптыков грант аларға пiчiктер тимнебiскен. – Пiс пабам Александр Дмитриевичнең хада кресен-фермер хониин 2010 чылдох тӧстеебiс. Пу тусха теере пос кӱзiнең тоғынғабыс. Ӧӧн кӧстег – иттiг тӧл малын ӧскiрерi. Хазна хабазиина мал санын хозарға паза киректелчеткен ис-пайны нааҷылирға сағынчабыс.
Дмитрий Чаптыковтың хонии Пуланнығ кӧл аал хыринда орныхчатса, Зинаида Казагашеваның хонии – Асхыс чоғархы аалда. Зинаида Петровна сӧбiре фермазын тилiдерiне 11 миллион салковай алған. Пу iкӧлең, паза пасха алты фермер чiли, сӧбiренiң мал ӧскiрҷең хониин тилiдерiне грантха сертификатты республика пазы Валентин Коноваловтың холынаң алған. Пу сӧбiре фермаларында ӧӧнiнде иттiг тӧл малын ӧскiрерге пӧгiнчелер, пiр хоныхта – сӱттiг тӧл малын паза пiрciнде – хойларны. Хоныхтар тӧллiг малларны садызарлар, ол санда 297 пас иттiг тӧл малын, 2050 пас хойны, техника паза тирiг аларлар, iдӧк мал хазааларын тыхтирлар. Сӧбiре фермалары хабазыға 4 миллион салковайдаң пасти 16 миллион азыра салковайға теере алғаннар.
Пуох кӧстеглерге алған гранттарын хорадарға пӧгiнчелер «Агростартап» марығ чиңiсчiлерi. Хакасияда пӱӱл пу грантты 8 идiнҷек алча, ол санда Андрей Миндибеков. Олар хазнадаң 3 миллион салковайдаң 5 миллион салковайға теере ахчалығ хабазығны аларлар. Фермерлернiң хоныхтарында 177 пас иттiг тӧл малы паза 550 хой хозыл парар. Чоохтирға кирек, «Агростартап» грант пос хониин наа ла тӧстепчеткен фермерлерге пирiлче. Оларға, грант аларына таллағны иртiп алза, фермер алай идiнҷек чiли санға турарға чарадылча.
12 миллион 380 муң салковайға сертификат Марина Поздняковаа читiрiлген. Марина Валерьевна «Хызыл чазыдағы холдинг» аал хонии кооперативiнiң кнезi полча. Кооператив хазна хабазиин мал сохчаң модульнай цех паза чарбаны сығарҷаң тирiг садызарына хорадарға пӧгiн тутча.
Аал хонии пiрiгicтерiне паза фермерлерге хазна хабазии пу кӧстегнi тилiдерiнең пасха, аал чуртазын чахсыландырар пӧгiннең читiрiлче. Iди ӧӧн кирексiнiстернiң пiрсi – пос хониинда тоғыс орнын тӧстирi. Пӱӱл грант алған хоныхтар, тилiс проекттерiн чуртасха кирiп, тиксi 36 тоғыс орнын тӧстеп саларға киректер.
Таллағны маңнаныстығ иртiп алған марығ араласчыларын Хакасия пазы Валентин Коновалов, аның орынҷызы Сергей Комаров паза аал хонии паза ас-тамах министрi Сергей Труфанов алғыстааннар.
– Алғыстапчам прайзын пу аар паза iзестiг нимес кирекнең айғасчатхан ӱчӱн. Аал хонии – ол сынында сидiк кирек. Че олох туста, пiлчем, пӱӱн сiрерге пос хониин тилiдерiне пирiлген хабазығ хазнаа паза республикаа уламох чахсы салтарларнаң айландырылар. Сiрерге сағыстарыңны чуртасха маңнаныстығ кирiп аларға паза хоныхтарыңны тилiдерiнҷе пӧзiк чидiглерге чидерге алғапчабыс, – айланған фермерлерзер республика пазы Валентин Коновалов.
Сергей Труфановтың искiриинең, хазнада аал хониина тӧремiл хабазығ читiрiлче. Iди пӱӱл ле федеральнай паза республика бюджеттерiнең 141 миллион 660 муң салковай кӧрiл парған. Аннаң пасха, аалда чуртас оңдайларын чахсыландырарынҷа чахсы программа чуртасха кирiлче. 2023 чылда «Аалларның тиксi тилiзi» хазна программазынҷа республиканың аалларына 4 миллиард азыра салковай позыдылча. Ол ахчаа школалар, культура кiннерi, олғаннарға паза чииттерге чайаачы туралар, имнег туралары паза чоллар пӱдiрiлче, чурт-коммунальнай хоных инфраструктуразы нааҷылалча. Прай ол аалдағыларның чуртас оңдайларын городтағызынаң тиңнестiрер ӱчӱн идiлче.
Сомда: Хакасияның аал хонии паза ас-тамах министрi Сергей Труфанов сертификат алған фермерлер Зинаида Казагашеванаң, Наталья Гагельганцнаң паза Дмитрий Чаптыковнаң хада
Автор :
Наталья Сюптерекова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде