Аал хонии iстенҷiлерiн тимнепче
![Аал хонии iстенҷiлерiн тимнепче Аал хонии iстенҷiлерiн тимнепче](/upload/iblock/a10/e6u6k3btkwcsie6ulu4n4y7r4sbfjrrq.png)
Ӱлӱкӱн. Таштыптағы 16 № профессиональнай училищее 60 чыл толған, пайрам 23 июньда ирткен
Училищенiң актовай залына кiзi толдыра чыыл парғаны кӧрiнген. Пайрамға килгеннер: Хакасия пазы паза Хакасия правительствозы аппарады устағҷызының орынҷызы Ирина Емельянова, ӱгредiг министрiнiң орынҷызы Алла Идимешева, Ӧӧркi Чӧп депутады Василий Шулбаев, Таштып аймаа пазы Николай Чебодаев, аал чӧптерiнiң пастары, училищеде кӧп чыл тоғын салған ветераннар паза даа пасхазы.
Училище 27 мартта 1963 чылда тӧстелген, ол аал хонии тоғынҷылары чидiспинчеткен сылтаанда азылған. Пастағы директоры Алексей Майнашев полған. Пастап училищенiң iкi ле трактор полған, аннаңар ӱгредiг совхозтарның тыхтағ иртiрҷең орыннарында апарылған. Паза таныхтирға кирек, училищенiң позының туразы 11 чыл чох полған, ол анда-мында орныххан. Ӱгредiг корпузы 1974 чылда ла азылған, анаң общежитие, чылығ гараж, библиотека, лабораториялар пӱдiрiлгеннер.
60 чылға училищенең устааннар: Степан Топоев, Андрей Асочаков, Владимир Масловский, Андрей Узназаков, Юрий Юрьев, Анатолий Артемьев, Олег Сагалаков, Лев Чильчигашев, Ирина Карамашева, Анатолий Тодояков, Фёдор Боргояков, Василий Матеров, Евгений Сафьянов. Амғы туста училищенiң устағҷызы Вера Сазанакова полча.
Анда 80-ҷа кiзi тоғынча, оларның аразында 11 ӱгретчi, 12 ус. Хай пiреезi, училищенi тоозып, пӧзiк ӱгредiг алып, олғаннарны ӱгредерге нандыра айланча. Iди килгеннер – Г.Н.Чучумаков, А.М.Тохтобин, В.А.Куюков, М.Н.Султреков, А.А.Тюкпиеков, Л.Д.Чильчигашев.
Ӱлӱкӱнде сыйыхтастар кӧп полған. Училищеде iстенчеткеннерге паза оларнаң чӧптезiп тоғынчатханнарға Аарластығ паза алғыстас пiчiктерiн читiргеннер, прайзын адап таа полбас. Че хай пiреезiн хынзаң даа сыйыхтап полбассың, олар мында хаҷан-да ӱгренгеннер, че ах чарыхтаң матыр полып парыбысханнар. Олардаңар хумартхыны училищедегiлер хайраллирға кӱстенчелер. Сергей Чебочаков, милицияның улуғ сержанты, Чечняда 1996 чылда чат халған, Мужество орденiнең ӱреен соонаң сыйыхтатхан, училище iстiнде ағаа чарыдылған хумартхы чарды iлiлген. Владислав Бозыков аал хонииның тракторист-машинизiне ӱгренген, 18 июньда 2022 чылда Украинада апарылчатхан ӧнетiн чаа операциязында аның чуртазы ӱзiлген. Позын турыстыра, матыр чiли тудынған ӱчӱн ағаа Мужество орденi чат халған соонаң пирiлген. Андағох орден ӧӧн корабельнай старшина Вячеслав Майнагашевке (ӱреен соонаң) пирiлген, ол «Курск» суғ алтындағы кимеде службазын апарчатханда, Баренцево талайда чат халған.
Пӱӱл хайдағ специальностьтарға Таштыптағы профессиональнай училищеде ӱгренiп аларға чарир? Кӧк хоныхтың тоғынҷызы, штукатур, аал хонии узы, пӱдiрiг паза iстiндегi тоғыстарның узы, ағас хонии узы, ас-тамах тимнеҷең ус. Тiкчең тирiгнiң операторы паза «Технология лесозаготовок» кӧстеглерҷе пӱӱл халғанҷы сығарыс полар. Училищезер прай Хакасиядаң олғаннар ӱгренерге килчелер, Таштып аймаанаң на нимес. Кирексiпчеткеннерге общежитиеде орын пирiлче, воспитательлер, ӱгретчiлер чииттернең кӧп тоғыс апарчалар, оларны столовайда азырапчалар. Студенттернi аймах-пасха марығларда, мероприятиелерде аралазарға кӧнiктiрчелер. 60 чылға училищенi 16 муң азыра кiзi тоосхан...
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |