Хакасияның культура министерствозында Хакас Республика кӱнi хайди таныхталынаңар хабарҷыларнаң пресс-конференция ирткен.

3 июльда 19.30 часта Ағбандағы Первомайскай площадьта Хакас Республика кӱнi алғым таныхталар. Пiссер опера искусствозының саблығ ырҷылары аймах чирлердең килчелер. Олар – Россияның саблығ артизi, Мариинскай театрның ырҷызы Татьяна Павловская (сопрано); Mladеn Prodan (тенор, Сербия), Монголияның паза Бурятия Республиканың саблығ артизi Ариунбаатар Ганбаатар (баритон, Монголия); Северная Осетия-Алания Республиканың чон артизi Анна Кикнадзе (меццо-сопрано, Санкт-Петербург); Луганск Чон Республиказының саблығ артизi Сергей Чуйков (баритон, Луганск); Хакасия Республиканың чон артизi, Алтай Республиканың саблығ артизi Артур Марлужоков (баритон, Ағбан); Пётр Федотов (скрипка, Москва). Iдӧк ӱлӱкӱннi В.Г.Чаптыковтың адынаң Хакас филармониязының симфоническай оркестрi сiлiг кӧглернең чазир. Аннаң Хакасия искусствозының саблығ деятельi Вячеслав Инкижеков устир.

– Амғы туста ӧнетiн чаа операциязы парза даа, чон кӧңнiн тӱзiрбеске кирек, олар ӱлӱкӱннерге ӧрiнiп, удур-тӧдiр алғыстирға паза республикабысха поғдархирға киректер. Тӧреен-ӧскен чир-суубыс кiчiг дее полза, ол чахсы тилiпче. Iзенчебiс республика чуртағҷылары Хакас Республика ӱлӱкӱнiн чахсы паалирлар, – таныхтаан культура министрi Светлана Окольникова.

Пресс-конференцияда Луганск Чон Республиказының саблығ артизi Сергей Чуйков чоох тутхан. Ол чааны пос хараанаң кӧрген, республиказын арачылап, азымахчыларны чир-суунаң сығара сӱрген, окоптарда кӧп хараалар хонған.

– Хакасияда ааллапчатханыма тың ӧрiнчем. Луганск Чон Республиказының чуртағҷыларынаң улуғ алғызын читiрчем. Сiрер пiссер «Зори здесь тихие» операны ағылып, чоныбыстың кӧңнiн кӧдiргезер. Гастрольларың пӧзiк синде ирткен. Чир-суғҷыларым Хакасиядағы артисттердеңер чылығ ӱндескеннер. Олар сын матырлар, – теен Сергей Чуйков.

Iдӧк чоох тутхан Сербияның ырҷызы Mladеn Prodan:

– Хығырғаннарың ӱчӱн улуғ алғызым читiрчем паза мындағ чахсы мероприятиеде араласчатханыма ӧрiнчем. Республика чуртағҷыларын ӱлӱкӱннең алғыстапчам. Пеер килiп, 6-7 муң километрнi тобырарға оой полбаан, че мындағы хайхастығ чирлернi кӧрiп алғаныма чӱреемде истіг.

Mladеn Prodan орыс тiлiнең чоохтанмаза даа, че ол орыс сарыннарны чахсы сарнапча. Пресс-конференцияда Хакасияның культура министрi Светлана Окольникова, Сербияның ырҷызы Mladеn Prodan, Мариинскай театрның ырҷызы Татьяна Павловская, Хакасияның ырҷызы Артур Марлужоков, Луганск Чон Республиказының ырҷызы Сергей Чуйков хабарҷыларға «Смуглянка» сарынны толдыр пиргеннер.

Таныхтирға кирек, Россияның паза пасха хазналарның саблығ ырҷыларын Хакасиязар тартып аларға спонсорлар «КОУЛСТАР» холдинг паза «Разрез Майрыхский» хара тас аныҷаң компания хабасханнар.