Ибiгде – наа амбулатория
![Ибiгде – наа амбулатория Ибiгде – наа амбулатория](/upload/iblock/919/sg4nktb9lcolw3o1rvt00f0ef2em304m.png)
Тоғыс чорығы. Хакасия пазы Валентин Коновалов Таштып аймаанзар паза Абаза городсар тоғыс чорығынаң чӧрген
Ибiг аалда наа имнег амбулаториязы азылды. Ӱлӱкӱнге Хакасия пазы Валентин Коновалов, республиканың хазых хайраллаҷаң министрi Олег Ананьевский, Таштып аймаа пазы Николай Чебодаев килгеннер.
Амбулаторияның кӧк туразы аал чӧбi паза Культура туразы аразында орныхча. Аның пӱдiрии «Хазых хайраллиры» нацпроектче пылтыр пасталған. Таштып аймаа имнег туразының ӧӧн имҷiзi Нина Иптышева чарытча:
– Пу амбулаторияны пылтырох тоозыбызарға кирек полғаннар, че подрядчик «КрасСтройМонтаж» ООО тоғыстарны сӧӧ тартхан. Че пӱӱн ол азылча, аннаң устир Маргарита Михайловна Боргоякова.
200 квадрат метрлiг имнег амбулаториязы прай саринаң тоғысха тимде: наа мебель турғызылған, имнег тирiглерi, вакцинация иртiрҷең, кӧрҷең, прием апарҷаң кабинеттер, кӱнӧрткi стационар палатазында iкi орған, аптека пар. Пӱдiрiге 10 миллион артиинаң салковай хорадылған. Ол федеральнай паза республика бюджеттерiнең позыдылған ахча. Мындағ имнег орыннары Хакасияның аймах пулуңнарында пӱдiрiлчелер, 2022 чылда аалларда 16 амбулатория паза ФАП тимге сыххан. «Чон хазиин хайраллиры паза кiзiлер чуртазының тилiзi – пiстiң кӧстеглерiбiстiң ӧӧнi...» – таныхтаан чооғында Валентин Коновалов.
Амбулаторияда iкi медсестра паза пiр терапевт Маргарита Боргоякова тоғынар. Ол чарым кӱнге Таштыптаң кил турар.
Ибiг аал соонаң Хакасия пазы Абазазар чорыхха сығыбысхан. Андағы культура кiнiнде Сӧбiре, кӧӧленiс паза киртiнiс кӱнiне удур 50 чыл хада чуртап салған ирепчiлернi сыйыхтааннар. Мына оларның аттары: Виктор паза Зоя Симоновтар, Григорий паза Надежда Захваткиннер, Николай паза Людмила Друговыхтар, Юрий паза Полуферья Боровскихтер, Сергей паза Татьяна Дороховыхтар. Пайрам соонаң Валентин Олегович Абазадағы психоневрология интернадының тоғынҷыларынаң тоғазығ иртiрген.
Анаң республика пазының чолы Таштып аймаа кiнiнзер чадыбысхан. Анда ол Культура туразында 50 чыл хада чуртап салған ирепчiлернi алғыстаан. Кӧп чыл хада тудынчатхан сӧбiрелер чахсы кӧзiдiм полчалар, чон аразында улуғласнаң тузаланчалар.
Диментий паза Анна Топоевтернiң сӧбiрезi Ис аал чӧбiнде тӧстелген. Олар ӱс хыс ӧскiр салғаннар, амды алты парханы паза iкi кӧргенектi ӧскiрерге полысчалар. Анна Арсентьевна аймахтағы депутаттар чӧбiнең устаан, аймах пазының полысчызы, социальнай полызығ пирчеткен устаныстың устағҷызы полған. Амғы туста социальнай полызығ пирҷең кiннiң устағҷызы полча. Диментий Ананьевич Улуғ Сии паза Таштып аал чӧптерiнең устаан, iкiзi «Iстенiс ветераны» ат алған.
Николай паза Нина Горбачёвтар ӱс пала ӧскiр салғаннар. Нина Георгиевна экономист, бухгалтер полып тоғынған. Николай Андреевич совхозта паза коммунхозта водитель полып iстенген, «Ударник коммунистического труда» аарластығ ат, «За трудовые отличия» медальлар алған.
Юрий паза Татьяна Ольховскийлер Таштыпсар 1977 чылда кӧс килгеннер. Юрий Иванович «Авиалесоохрана» предприятиенiң Таштыптағы пӧлиинең устаан, Татьяна Митрофановна библиотекада тоғынған.
Роберт Субраков паза Валентина Уварова тӧрт пала кiзi аразына кир салғаннар. Оларның читi парха, тоғыс кӧргенек пар. Роберт Николаевич чуртас тооза пӱдiрiгҷi полған, Валентина Георгиевна ас-тамах тимнеп iстенген.
Iдӧк 50 чыл хада чуртап салғаннар Михаил паза Светлана Дьяченколар, Геннадий паза Анна Стряпковтар, Иван паза Людмила Васильевтер. Полған на сӧбiре Аарлас киндезiнде хол салыбысхан. Сыйыхтастар соонаң аға-ууҷалар пастыхтарнаң хада чей iзерге одырғаннар.
Анаң Таштып аал чӧбi пазы Рустам Салимов Хакасия пазы Валентин Коноваловнаң аал аразынҷа кӧмес чазағ чӧргеннер. Культура туразынаң чол кизiре пастыр парыбыссаң, кӧп квартиралығ тураның (Луначарскийнiң ор., 4) хыринда олған площадказында апарылчатхан тыхтағ тоғыстарын кӧрiп аларға чарир. Олар «Городтағы осхас истiг оңдайлар тӧстирi» хазна программазынҷа идiлчелер. Иргi ойнаҷаң ниме-ноо орнына наалар турғызылған. Теестегi тоғыстарға нымзах резина тӧзирi паза брусчатка салары кiрче. Iдӧк Рустам Салимов Валентин Коноваловха суғ хазындағы ачыхта апарылчатхан тоғыстарны кӧзiткен, анда тыхтағ олох программаҷа парча.
Аның соонаң Валентин Олегович Таштып аймааның имнег туразында тоғынҷыларнаң тоғазығ иртiрген. Аннаң хада сурығларға хазых хайраллаҷаң министр Олег Ананьевский паза аймах пазы Николай Чебодаев нандырғаннар. Сурығлар имнег киреене ле теелбееннер.
Олег Васильевич iзестiг алызығлардаңар чоохтаан:
– Халғанҷы ӱс чылға сiрернiң имнег тураларыңа 84 миллион салковай пирiлген, 2023 чылда, тiзең, 85 миллион салковай! Ол ахчаа поликлиникада тиксi тыхтағ апарылған, тоғыс автомобиль алылған, наа имнег оборудованиезi турғызылған, гинекология пӧлиинде кӧзенектер алыстырылған, морг тыхталған, автостоянкада асфальт салылған, iстiндегi чолларда iдӧк. Амғы туста тыхтағ тоғыстары гаражта, ас-тамах тимнеҷең, кип-азах чуғҷаң пӧлiктерде апарылча.
2024 чылда Валентин Коновалов Хакасияның финанстар министерствозына хирургия паза чуғынҷах ағырығлар пӧлиин тыхтирына, канализация паза суғ системазын нааҷылирына ахча кӧр саларға чахаан.
Сомнар Тарина Бутонаевани
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |