Чуртасты чахсыландырчатхан кӱс
26.07.2023
Хабарлар
![Чуртасты чахсыландырчатхан кӱс Чуртасты чахсыландырчатхан кӱс](/upload/iblock/4b8/5t74gyf5dzc9u11io79tvjasxfptnem6.jpg)
Олған площадказын тимнеен араласчыларны таныхтааннар
Тоғыс чорығы. Хакасияның национальнай паза территориальнай политика министерствозының кізілері пу наада Таштып аймаанда сыныхтағлар иртіргеннер
Министр орынҷызы Виталий Кунучаков, ӧӧн эксперт Ольга Киштеева, ӧӧн эксперт Екатерина Бушкина ТОС-тар 2021-2022 чылларда пирілген ахчаны хайди хорат салғанын сыныхтааннар.
Пастағызын пастыхтар Чоғархы Хурлығас аалзар килгеннер, ол Таштыптаң ырах нимес орныхча. Анда «Чоғархы Хурлығас» ТОС чоо хайын парчаттыр, аал ортызында хакас ибіҷекке тӧӧй тура пӱдірібіскеннер, аның хыринда олған площадказы паза спортнаң айғасчаң тиріглер. Ибіҷекте аалдағы чуртағҷылар ӱлӱкӱннерге, пайрамнарға чыылысчалар, андох чайаачы устар пос холынаң ниме-ноолар итчелер, кӧзідімге, тостаң иділген ідіс-хамыс, харачахтар. Олғаннарға мында мастер-класстар иртірілче. Чоғархы Хурлығаста хайхастығ чон чуртапча, ӧӧнінде олар пеер пасха чирлердең кӧскен кізілер. Халғанҷы чылларда кічіг аалзар килген чон пик, пай туралар пӱдірінче. ТОС-ты Израильдең килген Алексей Рабиханукаев тӧстеен. Таштып аймаанда ол иң пастағызы полған, кем ТОС хоостыра чонны хада-пірге тоғынарға чӧптеен. Пылтыр «Чоғархы Хурлығас» ТОС национальнай паза территориальнай политика министерствозы хоостыра 720 муң салковай грант утып алған. Ол чолны тыхтирына парыбысхан. Аны, сайнаң урып, чалбах иткеннер. Паза ТОС 100 муң салковай утып алған, ол ахчаа орыс чонның кип-азаан тіктірібіскеннер, хурлығастағыларға ӱлӱкӱнде ам чазанҷаң костюмнар полар. Теелбектенерге паза сарнирға орындағы чон пілче.
Халғанҷы сыныхтағларны министерствоның кізілері Таштып аалда иртіргеннер. «Инициатива» ТОС-тың тоғызын алза, мында 2021 чылда «Живи, цвети село родное» марығҷа 720 муң салковай утып алтырлар. Ол ахчаа Мария Цуканованың орамазында чарытхы тартылған, паза пу матыр ипчее чарыдылған хумартхы тас ибіре сиденнелген, олох аллеяда чахайахтар алтына сіліг вазоннар алылған. Ідӧк пирілген ахчаа теплица пӱдірілген, анда пӱӱл чахайахтар рассадазы ӧскірілген, ағаа хоза триммер алылған. 2022 чылда «Инициатива» пасха проект арачылап алған, ол «Спорт для всех!» адалча, аны хоостыра 240 муң салковай утып алғаннар. Таштып аал ортызындағы аллеяда тӧрт наа тренажер турғызылған, анзы полған наа кізее хазиин тыыдарға оңдай пирче.
«Саяны» ТОС ибіркіні арығ хайраллап аларға тіп проект пас салған, ол проектче министерство оларға 100 муң салковайлығ грант пирген. Ол ахчаа сӧп-сап чығҷаң читі контейнер алылған, анзы «Аэросити»-ның машиналарын китеп чӧрбеске оңдай пирче (ол, кӧбізі тоғыста полза, иртен килче нооза). Піди сӧп-сап иптіг ле чыыл парча, анда-мында чайылбинча. «Часкалығ олған тузы – полған на туразар» проектті «Наа чуртас» ӧме тимнеен, аны чуртасха кирер ӱчӱн министерство 240 муң салковай грант пирген. Ол ахчаа «Наа чуртас» ӧме олғаннар ойнаҷаң тиріглер пылтыр кӱскӱзінӧк ал салған. Чир участогын тимнеенҷе, часхызын на прай тоғыстар иділ парған. Ам Таштып аалның наа орамаларының палаларына ойнаҷаң паза чыылысчаң орын пар. ТОС-тың кӱзі улуғ. Хакасияның национальнай паза территориальнай политика министерствозы ол чонның кӱзін тилідерге паза тыыдарға полысча. «Наа чуртас» ӧменің устағҷызы Надежда Троцкая аал чӧбі устанызын, министерствоны паза олған площадказын тимнирге хабасхан чуртағҷыларны аарластығ пічіктернең таныхтаан, андағ хайығ оларның чӱрее-паарларын нымзатхан, неке.
Сом авторни
Автор :
Тарина Бутонаева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде