Кем-де оңдай тілепче, хайзы – сылтағ
02.08.2023
Хабарлар
Артём Гаврилович паза Анастасия Юрьевна палаҷахтарынаң хада
Пос кирее. Хакасияда, тиксі Россияның регионнарындағы чіли, 2021 чылдаң чуға чуртапчатханнарның санын хызырар пӧгіннең чуртағҷыларға хазна полызии – социальнай контракт – пирілче
Аны хоостыра пос киреен азарға, мал-хус тударға сағынчатханнарға, тоғыс тілепчеткеннерге паза чуртаста сидіксініске кір парғаннарға хазнанаң чӧптезіг идерге чарир. Пу полызығдаңар піліп алар ӱчӱн чуртапчатхан орындағы социальнай арачыланыс устанызынзар айланарға кирек.
Пӱӱл хазнанаң мындағ чӧптезіг иткеннернің санына Ағбан городтың чуртағҷызы Артём Боргояков кірген. Прай кирек пічіктерні чыып, ол бизнес-план тимнеен. Чӧптезіг февральда иділген, майда ахча позыдылған. Ағаа Артём Гаврилович тӧзек-частых тігерге кирек оборудование, иcтер алған.
Социальнай чӧптезігнің кирексіністері хоостыра алған нимелердеңер сан пиріс идерге кирек. Артём Боргояков амғы тусха прай пічіктерін пир салған. Амды ағаа ай сай парыс иділгеннеңер сан пирістер тимнирге кирек полча. Мындағ оңдайнаң пір чылдаң асхынах нимес тоғынарға кирек.
Таныхтирға кирек, пос киреен азарынаңар сағыс матырыбыстың 2019 чылдох тӧреен. Андада ол пӱдіріг киреенең айғасчатхан, че ол официальнай тоғыс полбаан. Ағаа хоза, хысхызын пӱдірігҷілер ӧӧнінде тоғыс чох одырчалар нооза. Аннаңар Артём Гаврилович позының ахчазына тікчең машинка алып алған. Иң пурун ол простыньнар тігерге ӱгренген. Оларны таныстарына, туғаннарына сатчаң. Соонаң, интернетте видеолар кӧріп, подушка хыптарын тігерге ӱгрен сыххан. Оларнаң айғазып пастабысханда, оверлок кирек полыбысхан. Аарлыға турчатхан тирігні алыбызар оңдай чох полған. Аннаңар Артём Боргояков хазна полызиина айлан кӧрерге чаратхан.
Хада хонғаны Анастасия Топоева аның сағызынаң чарасхан. Социальнай чӧптезігдеңер піл килген. Аны хоостыра ӱгредіге ахча пирілібӧкчеттір. Іди Артём Гаврилович пос киреен тилідер, садығны алғыдар оңдайларнаң танысхан.
Сағам пос киреен наа пастапчатхан ирен тӧзек-частыхты ибде тікче. Истерні Иваново городтаң чахааннар, олар чахсы качестволығлар, сыттар. Чіптер ідӧк Россияда сығарылғаннар. Ынағ ирепчі тіккен нимелерін таныстарына, туғаннарына сатча. Тоғыстарын алған кізілер сығдыратчалар, изі дее, тіккені дее уғаа маңат тіп чоохтапчаттырлар, алғыстарын читірчеттірлер.
Пастағы хаалағлар килісче тіп ӱлесчелер сағыстарынаң Анастасия Юрьевнанаң Артём Гаврилович. Мыннаң мындар іди ле парза, чииттер цех азып аларға сағынчалар. Андада оларның тоғысха хоза кізі алып алар оңдай полар.
Артём Гаврилович паза Анастасия Юрьевна ӱс паланың іҷе-пабазы полчалар. Улуғ оолғыҷахтары – Марат, пӱӱл 5 классха парар. Аның кічии Кристина, очылары Лиза – олған садынзар наа ла чӧріп пастады.
Ӧткін іҷе-пабаның палалары ідӧк сым одырбинчалар. Чайғы полза даа, тренировкаларға чӧрчелер. Марат футбол ойнапча, бассейнзер чӧріп, чӱзерінең айғасча.
Кристина хоос гимнастикаа чӧрче. Пу спорт кӧрімін хызыҷах позы таллап алған, телевизорда кӧр салған. Іҷезі Ағбанда хоос гимнастика апарылчатхан орынны тапхан, пастағы тикке занятиее чӧр килгеннер. Анда пол килгенде, хызыҷахтың кӧңні кӧдірілген. Аннаң пеер пір чылҷа ирт парды, че Кристинаның чидіглері амох пар. Ол Ағбанда марығда араласхан, ӱзінҷі орында пол парған. Анаң, Барнаулзар чӧргенде, ікінҷі орынға турысхан, соонаң Новокузнецкте пастағы орынны холға кирген.
Анастасия Юрьевна хызыҷағы сыдамах хылиинаң пабазына кӧктеен полар, идіп пастаан нимелерін хайди даа тоозар тіп чоохтапча. Артём Гаврилович ідӧк пос туста спортнаң айғасчаттыр. Футбол ойнапчаттыр паза палаларынаң хада школа стадионында чӱгӱр чӧрчеттір.
Тиктең нимес чайаачы кізі прай киректерде таланттығ полча тидірлер. Пӱдірігнең, тӧзек-частых тігерінең пасха, матырыбыс чир тамаан, чахайахтар ӧскірерге хынча. Тураларында комната чахайахтары пірееде кӧзенек иркініне сыыспиныбысчалар тіп кӱлімзірепче Анастасия Топоева. Андада олар порчоларын харындас-пиҷелеріне сыйлапчалар. Чир тамаан Индіркі Тӧӧде ӧскірчелер, ирепчінің ікізі анда тӧреен-ӧскен. Аннаңар олар полған на тынағ кӱннерінде аалзар чӧрчелер. Палалар даа ууҷаларында хынып ааллапчалар. Паба-іҷезі оларны ідӧк кӧместең тоғысха кӧніктірче, от одалирға, огород суғлирға ӱгретче.
Сағынчам, мындағ матырлар прайзына кӧзідім полчалар. Сым одырып, пилен пирілер нимені сахтабаза, тилир оңдайлар табарға чарир ла. Социальнай чӧптезігде кізілер аймах кӧстеглерҷе араласчаттырлар. Кем-де пӱдірігнең айғазарына тиріглер аларына, кем-де теплицалар пӱдіреріне алай мал тударына ахча алчаттыр. Пір сӧснең – сағынған сағысты толдырар оңдайнаң тузалан кӧрерге чарир.
Сом Артём Боргояковтың архивінең
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
