«Биоробот» – наа аттракцион
03.08.2023
Хабарлар
«Орлёнок» олған паркындағы «Биоробот» аттракцион
Тынағ. Ағбандағы «Орлёнок» олған паркы – палаларның, тынанып, ойнап алҷаң хынған орны. Мында кічіглерге дее, улуғларға даа килістіре аймах чилеңместер пар
Чайғы тынағ кӱннерінде республиканың прай даа аймах-городының олғаннары «Орлёнок» паркта хайди даа тынанып алчалар. Хайзында прай класснаң, автобус чаллап, тынанарға килчелер, хайзында іҷе-пабаларынаң хада кил парчалар, аннаңар чайғызын парктағы аттракционнарда полған на пала чыларға кил парча тізе, саба полбас. Иркеҷектер ол тынағ паркына хынчатханын прай даа іҷе-паба, аға-ууҷа сизінген полар. Анзы парк тоғынҷылары чыл сай аны иптеп, наа ӱтертістер тимнепчеткеннеңер полар. Пӱӱл чайғызына анда сомға суурынҷаң аймах чарых ӧңніг орыннар илееде тимнел парған. Андағ ӧкер орындағы сом чыл ибіре кізее чалахай кӧңнін кӧдірер паза чайғы тынағ кӱннерін хаҷанға даа сағыста артызар. Ідӧк паркта сіліг чахайахтар сыбыра одыртылча паза даа пасха ниме-ноо пар.
Пӱӱл парк тоғынҷылары чир-суғҷыларын хатабох ӧріндірчелер – наа аттракцион турғысчалар. Ол позының кӧріміне паза пӱӱнгі наа технологиялар тиліпчеткен тусха килістіре адалча – «Биоробот».
Наа аттракционны Хакасиязар Волгоград городтаң ағылғаннар, анда аттракционнар сығарчатхан завод тоғынча. Ағбанзар ол 24 июльда читкен. Мында аны специалисттер чыып пастабысханнар. «Биоробот» аттракционнаңар «Орлёнок» парктың инженер-механигі Игорь Белоногов хысхаҷахти чоохтап пирген.
– Наа аттракцион парктың тоғынып алған ахчазына алылған. Аның паазы 10 миллион салковай азыра. Аны чыырға оой нимес, аннаңар аны чыырына пір неделяҷа парыбызар. Мин аттракцион чыырында пастағызын на араласчам. Таныхтирға кирек, конструкцияның кӧдірімі 20 тонна пасча, аны, кӧдіріп, турғызыбызарға кирек. Тастынаң ӧкер кӧрінер ӱчӱн, пластиктең иділген нимелер чапсырылар. Ағаа хоза, аттракцион хараазын чарып турар, анда прай 2700 лампочка турғызылар. Конструкцияның пӧзии 6 метр полар. Прай чыып алза, Санкт-Петербургтаң специалисттер киліп, сыныхтағ иртірібізерлер. Анаң Ростехнадзор, ол аттракционны санға алып, хазна номерін пирер, андада ла ол тоғынып пастир.
Мындағ аттракционны чуртағҷыларның сурынызы хоостыра таллап алғабыс. Олар парктың сайтында пасчаңнар, ӧӧнінде паркта кічіг ле палаларға кӧрілген чилеңместер пар, пірее улуғ кізее істін «хылҷығастаҷаң» аттракцион турғызыңар тіп. «Биороботсар» 14 час толдыр салғаннарға одырарға чарир. Мин чуртағҷыларзар айланчам, постың кӱзін паза сыдамағын пілінерге. Аттракционнаң тӱс килзе, хай піреезі изі чохтанча, кӧңні айланча, – чоохтаан Игорь Белоногов.
Хайди таныхтаан специалист, наа аттракцион пістің хазнада сығарылған, анда хырығ озаринаң хоза частьтар турғызылбаан. Аннаңар аны тыхтирға киліссе, сидіксіністер полбас. Кӧзідімге, паркта халғанҷызын алылған аттракционда редуктор сайбал парған, ол хоза часть Италияда сығарылған. Санкциялар ӱчӱн ол аттракцион пір чыл тыхталбин туртыр.
Наа аттракционны чыырында «Орлёнок» паркты иптепчеткен тоғынҷылар прайзы даа айғасча: электриктер, механиктер, слесарьлар, электромеханиктер, инженер-механиктер паза тыхтаҷаң механиктер. Ідӧк аттракционны тимнепчеткен заводтың ікі специализі килген, олар «Биоробот» тузаланысха кирілген соонаң на ибзер парарлар. Олар хада-пірге тоғынчалар, Ағбан город кӱніне аны тоғындырыбызарға ізенчелер. Сағынған сағыстары киліссе, ӱлӱкӱнде чуртағҷылар істін «хылҷығастаҷаң» наа аттракционда катайлан поларлар. Паркта тынанчатхан саарбахтарның аразында піл кӧргем, наа паза чапсых аттракционда катайланып аларға сағынчатханнар пар ба? Пастағызын 12 частығ Кирилл тоғасхан. Аннаң сурғам: «Наа аттракционны турғызыбызарларын сағыпчазың ма?»
– Чох. Мин «Биоробот» аттракционны тоғындырарын сағыбинчам. Мин кірлектенчетсем, изі чохтаныбысчам, аннаңар ол ӱтертіс хайиим тартпинча. Андағ аттракционда катайланмаспын, – чоохтаан Кирилл.
«Орлёноктағы» «Вальс» аттракционнаң тӱскен ӧӧрелерзер пастырып, сурғам, наа аттракционда катайланҷаң сағыс пар ба тіп.
– Піс аны тоғындырарларын чидікпин сағыпчабыс. «Ракушкаларда» айлахтанып алдыбыс, че анда сыбыра катайланза, кӧнік чӧрібісчезің, пір дее хорғыстығ пілдірбинче. Аннаңар аны тоғындырарларын чидікпин сағыпчабыс. Аны Ағбан городтың тӧреен кӱніне тоғындырарлар тіп чоох полған, хайди даа пеер килербіс. Итсе, ӱлӱкӱнде кізілер паркта тығырама полар, че піс анда пастағыох кӱнде катайланып аларға кӱстенербіс, – чоохтааннар чалахай кӧңніліг ӧӧрелер Елена паза Полина.
Сизінгенде, кізі кӧңнін паза ханын кӧдірчеткен наа аттракцион позының аудиториязын хайди даа таап алар. Арса, пістің республикада хантигірҷі поларға сағынчатханнар пар. Олар пу аттракционда постарына тренировкалар иртір поларлар. Анзын мин ойнап чоохтапчам.
Сом Дмитрий Сунчугашевти
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
