Чонға чағын полчатханнаңар – алғыс
04.08.2023
Хабарлар
![Чонға чағын полчатханнаңар – алғыс Чонға чағын полчатханнаңар – алғыс](/upload/iblock/2c6/amfau0kzpli7sc0hnsbfrxg3tsz31yi1.jpg)
Улуғ Арбыттағы тоғазығ тузында
Тоғыс чорығы. Август айның пастағы кӱнінде Хакасия пазы Валентин Коновалов паза Ӧӧркі Чӧп кнезі Владимир Штыгашев Таштып аймаанда пол пар килгеннер. Чорыхтың ӧӧн кӧстее – аал чуртағҷыларынаң тоғазығ
Че иң пастағызын Валентин Олегович паза Владимир Николаевич Арбыттағы пӱдірілчеткен школаны кӧріп алғаннар. Аны пӱӱл пастааннар, 2024 чылда тоос саларға киректер. Школа 150 орынға кӧріл парған. Амғы ағас школа хаҷанох иргілен парған. Арбыттағылар наа школаны ӱр сахтааннар. Тиксі пӱдірігнің улии – 3000 кв.м азыра, ікі хадыллығ тура. Тастыхти турчатхан корпустарда пищеблок паза спортзал полар. Тоғыстарны «ХакасГражданСтрой» ООО апарча, Пирікчулда олох школа пӱдірген, ідӧк Асхыстағы спортнаң айғасчаң залны, Ағбан пилтірі аймаандағы Калинин аалда олған садын кӧдірген. Ӧменің директоры Олег Манжула Хакасия пазына пӱдіріг хайди парчатханын чарыт пирген. Аның сӧстерінең, пӱдірігде 30 кізі тоғынча, графиктең тың на халбинчалар, улуғ сидіксіністерге урунминчалар. Школаны «Аалларның тиксі тилізі» хазна программазынҷа пӱдірчелер. Контрактча 300 млн салковай хорадыл парарға кирек.
Улуғ Арбыт аалда, тізең, пасталығ школа пӱдірии апарылча (20 орынға), фундаменті тимде, кірписнең стенелер салылча. Паза ФАП пӱдірии пасталыбысхан. Прай орамаларда чарытхы иділген. Аал чуртағҷылары ахчазына Илбек Ада чаада чат халған чааҷыларға паза тыл істенҷілеріне хумартхы тас турғызары тимнелче. Пылтыр паза пӱӱл Кічіг Арбытта Культура туразы, школа, олған сады паза аал аразындағы чарытхы тиксі тыхталғаннар.
Валентин Коновалов Арбыт аал чӧбінде ікі тоғазығ иртірген – Улуғ паза Кічіг Арбыттарда. Кічіг Арбыттың чуртағҷылары аймах сурығлар пиргеннер. Кӧбізін почта тоғызы хомзындырча. Почтальоннарның ставкаларын хызырчалар, садығнаң айғазарын сыындырчалар. Хакасия пазы ол сидіксіністернең чахсы таныс. Аның кӧрізінең, Россияның Почтазы хазна ӧмезі чіли тоғынарға кирек, коммерция саринаң тың айғаспин. Ол сурығны ӱлгӱ хайығда тутча. Пасха сурығ – льготалығ автобустар хомай чӧрчеткені. Таныхтирға кирек, тиксі республиканы алза, Таштып аймаанда ла муниципальнай ӧме халған. Аны прай кӱснең хайраллап халарға кӱстенчелер. «Таштыптағы автоколонна» МУП устағҷызы Виктор Азараков чуртағҷыларға чарыт пирген: «Ирткен пятницада ла сірернің саринзар чӧрчеткен автобус оодыл парған, часхызын оодылғанох. Анзы автопарктың тың иргілен парғанынаң палғалыстығ. Автобустар удаа оодыл парчалар. Че пу чағында піс тӧрт ГАЗель аларбыс, аннаңар пу сурығ пӧгіл парар. Иргі автобустар паза чӧрбес».
![](/upload/main/2.jpg)
Хакасия пазы Валентин Коновалов
паза Ӧӧркі Чӧп кнезі Владимир Штыгашев школа пӱдіриин кӧрчелер
Арбыттағыларның хоптанызы хоостыра Валентин Олегович чахығ пирген – автобус кил полбаза, аал чӧбі чуртағҷыларға тузында искір турзын.
Имнег киреене теелчеткен сурығлар хоостыра Хакасия пазы теен: «Имҷілер прай чирде киректелче, тиксі республикаҷа 35% имҷі чидіспинче. Хазнаҷа пу сан пасхалалбинча. Чииттерібіс ӱгредіг соонаң республиказар нандыра айланмаза, пу сурығны пӧк полбаспыс. Правительство халғанҷы пис чылға имнег киреене (тыхтағларға, наа имнег тиріглеріне паза пасха нимее) хорадығларны 40 хати ӧскіріп алған. Пылтыр имҷілерге 31 квартира ал пиргебіс, амғы тусха оларға 15 хабазығ оңдайы пирілче.
Аалда олған площадкалары чидіспинчеттір. Тастыхти турчатхан ораманың чуртағҷылары олған площадказын пӱдір пирерге сурынчалар. Валентин Коновалов аал чӧбін Хакасияның национальнай паза территориальнай политика министерствозының мариинда аралазарға чӧптеен. Проект тимде полза, марығ комиссиязынаң чоохтазып аларбын тіп молҷаан. Пӱӱл Арбыт аал чӧбі марығда араласханох. Іди 1 млн 200 муң салковайға Культура туразы хыринда олған площадказын пӱдірген паза ибіркі ачыхты иптеен.
Кічіг арбыттағыларның паза арбыттағыларның пасха сидіксініс – тахталар изелчеткені. Ол улуғ пӱдіріг апарылчатханынаң палғалыстығ. Аар техника, андар-пеер чӧріп, тахталарны оотча, аннаңар наа тахталар пӱдірерге килізер. Оларға проект-смета пічіктерін тимнирге кирек, андада республика хабазығ пир полар. Школа автобустарына гараж чоғыл, анзын даа пӧгерге кирек. Чуртағҷылар хоптанчалар, чарытхыны удаа ӱзірібісчелер, холодильниктегі чиис прай ардап парча. Чоғархы Ибігде дее чон ирееленче. Чарытхы ӱзірчеткен сурығларға Валентин Коновалов нандырған: «Чарытхы ӱчӱн «Россети» нандырча, пір чылда 72 час азыра ӱзірчетселер, минің чӧбім – анзын санға алып, хоп пічиин андар ызарға. Ол хоптанысты постарында пас салғаннарын сыныхтабызыңар, андада оларға улуғ штраф салылар».
Чоғархы Ибігдегі тоғазығда тӧӧй сурығлар полған – изелчеткен чоллар, чарытхы, сӧп-сап, имҷілер чидіспинчеткені, автобустар чӧрізі.
Тынағдағы ипчі, ылғап, Валентин Коноваловтаң чуртнаң полыс пирерге сурынған. Ікі чыл мының алнында, часхызын, палалар, спичканаң ойнап, тӧрт кізінің чуртын кӧйдірібіскеннер. Ам тӧрт пенсионер тура чох ирееленче. Хакасия пазы хабасчаң оңдай таап пирерге молҷаан.
Паза мындағы пасталығ школаны читіре тыхтабызарға кирек. Ікі чыл мының алнында ағаа Таштып аймаа чарымызын тыхтабызарға полысхан: чарым хырын ит салғаннар, кӧзенектер алыстырыбысханнар. Школаны чылығлирға кирек, хысхызын соох.
Кӧп сурығларҷа Валентин Олегович нандырчатхан министерстволарға чахығлар пир салған. Оларны хайди даа пӧгерге кирек. Хай пірее сурығларны аал чӧбі алай аймах позына артынар. Кізілер Хакасия пазын оларнаң тоғазарға, чоохтазарға килген ӱчӱн алғыстааннар. Валентин Олегович чонға чағын полчатханын сизінче полбастар ба.
Сомнар авторни
Автор :
Тарина Бутонаева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде