Малҷылар от пилетепчелер
04.08.2023
Хабарлар
![Малҷылар от пилетепчелер Малҷылар от пилетепчелер](/upload/iblock/e7f/4ego9cpve3flgldzke5cd2kqog76abhw.jpg)
Тустығ кӧл аалдағы фермер Хагани Гасанов
Аал хонии. Республиканың хоныхтары мал азиин пилетирін узаратчалар
Хакасияның аал хонии паза ас-тамах министерствозы искіриинең, орғах айының пастағы кӱніне кресен-фермер хоныхтары паза аал хонии предприятиелері 12,5 муң тонна от пилетеп салғаннар.
Пылтырғызынаң тиңнестірзе, пӱӱл наңмыр удаа чағаннаңар, мал азиин пилетир тоғыс сӧӧ тартылча.
Орғах айының 1-ғы кӱніне 18,8 муң гектардаң от сабыл парған, 13,1 муң гектардаң тырбал парған, республикаҷа оттың ортымах сығызы 9,6 центнерге тиңнелче. Пір чыллығ оттарны сабарға пастаалахтар. Орджоникидзе аймаанда сенажты пилетеп сыхханнар. 200 гектардаң 1600 тонна саап алғаннар. Аның сығызы – 80 центнер гектардаң.
Алтай аймаандағы Тустығ кӧл аалдағы фермер Хагани Гасанов от айының 2-ҷі кӱнінде от саап пастаан. Че наңмырлар от тоғынарға харығ полчатханнаңар, ол аны ам даа читіре сапхалах.
– Пу чазыда 200 гектар чирні арендаа алып алғабыс. Амды отты саапчабыс, тӱрімнерге ораапчабыс. 250 тӱрім тимде, хыстап парыбызарға 2000 тӱрім кирек. Мин отты мында саапчам, сала оортах арах оолғым паза чеенім тоғынчалар.
Пӱӱл от уйан сыххан. Мин анзын наңмырлар тузында чағбаанынаң палғалыстырчам. Позымның чирлерімде от чоғыл даа, мында кӧмес пар. Піс отты хандых айының 20 – 22 кӱннерінде саап сыхчаңмыс. Пӱӱл аның ӧс парарын сағаабыс, аннаңар орай тоғынып пастаабыс. Че ол ӧспеен, андағох ла чабыс, сайах халған паза хуруп парған. Киҷее ле сапхан от хуруғ, аны тырбирға чарир. От чахсы сыхса, піс хуруп парарын 4-5 кӱн сағыпчабыс. Наңмырлар тоолап ла парыбысчалар, чирге сых читпинче. Таңда тырбағ полар. 10 кӱн аразына отты тоғыныбызарға сағынчабыс. Анаң орғах айының 15-ҷі кӱніне теере аны машиналығ тазыбызарбыс, – теен Хагани Гасанов.
Пӱӱл фермер пір гектардаң алты тӱрім чыып алча. Пір тӱрімнің кӧдірімі – 350 – 400 килограмм.
Хагани Гасанов 130 гектар чирде кӧп чыллығ оттар таараан. Че наңмырлар чағбааннаңар, олар ӧспееннер.
Хагани Гасанов 2012 чылдаң сығара фермер полча. Ол мал ӧcкірерінең айғасча. Пӱӱнгі кӱнге аның 60 пас інек саналча.
Сом Станислав Побеляевти
Автор :
Оксана Челтыгмашева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде