Иң ізестіг паза махачы чааҷылар
04.08.2023
Хабарлар
Кии-десант войсколары кӱнінде
Ағбандағы Чиңіс паркында пайрамнығ мероприятие ирткен
ВДВ кӱні. 2 августта Ағбандағы Чиңіс паркында Успас от хыринда Россияның Кии-десант войсколарының 93 чылына чарыдылған пайрамнығ митинг ирткен
Митинг пасталар алнында ВДВ чааҷызы, 38 частығ Алексаңдр Тюмерековнаң чоох алысхабыс. Ол, ӧнетін чаа операциязында аралазып, ам кічіг чир-суунзар, позының сӧбірезінзер отпускка килтір.
– Минің тӧреен аалым – Таштып аймаандағы Ибіг аал. Ағбанда 24№ школаны тоозып, алты номер профтехучилищеде автомеханик специальнозын алғам. СТО-да 10 чылҷа пу профессияҷа тоғынғам. 2022 чылда Украинада ӧнетін чаа операциязы пасталғанда, мин, пос кӧңнінең военкоматсар парып, контракт идіп алғам. Срочнай службаны иртпеен дее ползам, ам служба иртчем. Украинада Изюм город хыринда 150-ҷі мотострелковай частьта чааласхам. Амды 108-ҷі десант-штурмовой полктабын, ол сағам Новороссийскте орныхча. 11 июльда мағаа, чааласхан соонда, 45 кӱнге отпуск пиргеннер, – хысхаҷахти чоохтаан Алексаңдр Тюмереков.
Ағбанда аның сӧбірезі чуртапча, ипчізі Евгения бухгалтер полып тоғынча. Ікі оолағы пар: улии Сашаа – 8 час, кічии Кириллге – 4 час. Алексаңдр хазии хоостыра срочнай службаа хабылбин халтыр, контракт идіп алғанда, чаа тимненізін Ростов городта ирткен. Чаалазығларда аралазып, ӱс медальға турысхан: «СВО араласчызы», ікізі ам даа килгелек. Отпуск тоозылза, ол частьынзар айланар.
СВО араласчызы, десантник Александр Тюмереков оолғынаң хада
Десантниктер постарының ӱлӱкӱнін хайди алғым таныхтапчатханын прайзы даа пілче. Іди иртеннең город орамаларынҷа ВДВ флагтары чалбырапчатхан автомобильлер ойлатчатханы кӧрінген. Чиңіс паркында кӧгілбей пӧріктіг паза тельняшкалығ кізілер кӧп чыылысхан, оларнаң хада олаңай кӧрігҷілер дее толдыра полған. Кибірге кір парған оңдайҷа пу кӱнде Чааҷылар сабланызы мемориал алнында пайрамнығ мероприятие иртче.
Ам даа десантниктерні паза Кии-десант войсколарының служба иртчеткеннерні ле нимес, оларнаң хада Украинада иртірілчеткен ӧнетін чаа операциязының араласчыларын паза ветераннарын алғыстирға паза чеестирге килгеннер Хакасия пазы Валентин Коновалов, Ӧӧркі Чӧп кнезі Владимир Штыгашев, Хакасия пазының орынҷызы Юрий Курлаев, Россияның Хазна Думазының депутады, генерал-лейтенант Виктор Соболев, чааҷылар комиссариадының, ветераннар пірігістерінің кізілері.
Парадха кисчең кип-азахтығ чааҷылар строевой хаалағнаң площадьсар Россияның, Хакасияның, Кии-десант войсколарының, Познаньскай тимір чол бригадазының флагтарын паза Чиңіс флагының хобырғанын ағылғаннар. Россияның паза Хакасияның гимннері толдырылған соонаң митинг пасталған. Мероприятиені апарчатхан тоғынҷы Кии-десант войсколарының тархындағы саблығ чолын искірген, хайдағ чаалазығларда аның чааҷылары махачыларын кӧзіткеннеңер чоохтаан.
Іди «Пістең пасха пірдеезі!» хыйғынаң кии-десант войсколары хазнаны арачылир сидік пӧгіннерні толдырчалар. Пӱӱн ізестіг войсколарға 93 чыл толча.
Хакасия пазы Валентин Коновалов чааҷыларзар паза ветераннарзар айланған:
– Россияның Кии-десант войсколары – хазнаның, аның чонының поғдархазы, армияның элитазы. Хайда сидік, махачыланыс кирек, анда десантниктер полчалар. Ам Украинада ӧнетін чаа операциязы иртірілчеткенде, десантниктер матыр тудынызын кӧзідіп, иң ізіг точкаларда чааласчалар, Чир-суубыстың пос алынҷа чуртазы ӱчӱн турысчалар. Олар, патриотизмін кӧзідіп, иң сидік пӧгіннерні толдырчалар. Піди прайзыбыс, хада-пірге тудынып ла, чиңіс тударбыс. Хайди 80 чыл мының алнында оларның ағалары фашизмнең, расизмнең паза нацизмнең тоғыр кӱрескеннер, амды оларның пархалары бандеровщинаны чох итчелер.
Прай чӱреемнең сірерні Россияның Кии-десант войсколары кӱнінең алғыстапчам! Пик хазых, часка, сӧбіреңерде чахсы чуртас алғапчам! Десантниктернің пик пірігізі хаҷан даа Чир-суубыстың ізестіг кӱзі ползын!
Хакасияның Ӧӧркі Чӧп кнезі Владимир Штыгашев ідӧк десантниктерні алғыстаан:
– Піс Кии-десант войсколары тӧстелгенінің 93-ҷі чылын таныхтапчабыс. Оларны чеестир кибір піcтің хаҷаннаң салыл парған. Ағбанда кадрированнай бригада орныххан. Молдавиядаң Ағбанзар ВДВ-ның 300-ҷі полкы килген, аның командирі Алексей Лебедь полған. Ӱc чыл пазынаң чон аны республика пазына тапхан, аны ВДВ командирі тіп аарлаҷаңнар. Хакасияа ол кӧп туза ағылған, хомзынысха, Алексей Иванович ирте ӱреен. Афганистанда чааласхан, десантниктер ротазынаң устаан, батальон командирінің орынҷызы полған, улуғ харындазы Александр полк командирі полған. Десантниктер, хайда даа ползалар, пӧгіннерні турыстыра толдырчалар. Амды ӧнетін чаа операциязы парча, піc Россияның чирлерін чыыпчабыс. Хада-пірге тудынып, піс чиңіс тударбыс.
Митингте ідӧк чоох тудып, десантниктерні ӱлӱкӱннең алғыстааннар Хазна Думазының депутады Виктор Соболев, военкомат тоғынҷылары паза ветераннар пірігістерінің кізілері.
Чаалазығларда чуртастарын пир салғаннарны сағысха киріп, пір минута сым турған соонаң Успас от хыринзар веноктар, чахайахтар салылған. Чааҷылар, автоматтардаң киизер атып, салют иткен соонда, десантниктер паза ветераннар кибірли площадьча пайрамнығ маршнаң ирткеннер.
Сомнар Станислав Побеляевти паза авторни
Автор :
Николай Султреков
| Пн | Вт | Ср | Чт | Пт | Сб | Вс |
| 28 | 29 | 30 | 31 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 1 |
Кӱн таңмазы
Хакасияда
Россияда
Тилекейде
