Гранттар тилирге полысчалар
04.08.2023
Хабарлар
«Хазыңнығ арығ плюс» дача пірігізінің
кнезі Александр Карамышев насосты кӧзітче
Хазна хабазии. Пӱӱл Хакасияның аал хонии паза ас-тамах министерствозы 20 дача пірігізі тилізіне 15,2 миллион салковай хазна хабазиин пирген
Ол ахчаа садтығ коммерческай нимес пірігістер чарытхы тартчалар, суғ скважиналарын саапчалар, суғ ағысчаң трубалар алыстырчалар, чоллар тыхтапчалар. Хабазығ программазы 2011 чылдаң сығара тоғынча.
Саяногорсктағы «Хазыңнығ арығ плюс» ТСН-ға 1 миллион салковай грант алып аларға ӱлӱс тӱскен. Пірігістің кізілері 152 муң салковайны пос ахчазынаң хосханнар.
«Хазыңнығ арығ плюс» пірігіс уғаа истіг орында орныхча, Саяногорск город хыриндағы тағлығ чирде. Дачаларда чистектіг ағастар, чир тамаа аймаа ӧсчеткені, кізілер хайынысчатханы пілдірче.
Пӱӱнгі кӱнде дача пірігізінің кнезі Александр Николаевич Карамышев полча. Аннаң ол 15 чыл устап парир.
– Пірігіс 1972 чылда тӧстелген. «Саянмрамор» комбинат тоғынҷыларына 3,5 муң чир участогын таратхан. Дачаларның улии 6-лар сотка полған. Кізілерге 2-3-ер чир участогы пирілҷең. Пастағы чылларда прай дачалар тузаланылғаннар. Анаң піреезі «тос парған», чир тамаан кӧп одыртпиныбысхан алай дачазынаң саңай айғаспиныбысхан.
Пастап пу пірігісте 3,5 муң участок тузаланылған полза, амды – 720 ле. Улуғ частығлар сын чирзер парғлапчалар, чииттер дачанаң айғазарға хынминчалар. Дачниктернің 80% – ол тынағдағы кізілер. Тастал парған чир илееде. Хомай нимес чир кӧп, че пірее дачалар иніс орында орныхчалар. Андағ чирлер тастал парғаннар. Амды пістің пірігісте бухгалтер, суғ пирчеткен ікі кізі, электрик паза кнес саналча. Дачанаң айғасчатханнар пір сотка чир ӱчӱн 400 салковай тӧлепчелер, – теен Александр Карамышев.
«Хазыңнығ арығ плюс» пірігіс грант мариинда пис хати аралазып, хазна хабазиин алған. 2011 чылда ағаа 1 миллион салковай пирілген. 500 муң салковайға Садовая паза Энергетиков орамаларда 500 метр чарытхы линиялары тартылған. Олох чыл 500 муң салковайға Дорожников паза Энергетиков орамаларда суғ пирҷең трубалар салылғаннар. 2015 чылда Горнятскай паза Дорожников орамаларда чарытхы тартылған. 2019 чылда Полевая паза Восточная орамаларда чарытхы тартарына 1 миллион салковай пирілген.
– Пӱӱл пизінҷі хати грант мариинда аралазып, 1 миллион салковай утып алғабыс. Пос ахчазынаң 152 муң салковай хосхабыс. Проектті бухгалтернең хада тимнеебіс, мин аны республиканың аал хонии министерствозында арачылаам. Проект хоостыра Полевая орамада пір километр узун труба алыстырылған. Ол ӧӧн орама полча. Подряд организациязы, тоғыстарны табырах толдырыбызар ӱчӱн, пос ахчазын хоратхан. Трубаларны алыстырыбысханда, піс ағаа 152 муң салковай тӧлеп пиргебіс. Кӱскӱде подрядчикнең хада трубаларны сыныхтирбыс. Килер чылда аал хонии министерствозы сыныхтир. Сыныхтағ соонаң иргі трубаларны сайабызарбыс. Чахсы кизектерінең иргі трубаларны тыхтапчабыс.
Амғы туста грант чох дача пірігістерін тиліт полбас. Прай ниме аарлығ. Дача ӱчӱн тӧлегні грант аларына хозыбысчабыс.
Килер чылда грант мариинда аралазарға сағынчабыс. Пасха даа орамаларда суғ пирҷең трубаларны алыстырарға пӧгінчебіс. Олар 1974 чылда салылғаннаң пір дее алыстырылбааннар. Піс оларны часхы сай сыныхтапчабыс паза тыхтапчабыс. Кізілер трубаларны хайраллаан ползалар, оларнаң уламох ӱр тузаланарҷыхпыс. Ӧӧн труба орамада салыл парған. Ағаа дача участоктарының трубалары піріктірілгеннер, хайзылары ӱӱҷіктің ортызынҷа салыл парғаннар. Дача ээлері аның ӱстӱне от тастап салчалар. Іди труба табырах таттапча, – сағыстарынаң ӱлескен Александр Карамышев.
Дача пірігізі чолларны пос ахчазына тыхтапча. Че ӧӧн орамалар муниципалитеттің холында.
Александр Николаевичтің чооғынаң, амғы туста «Хазыңнығ арығ плюс» дача пірігізінде илееде тура пӱдірілче. Чыл ибіре асхынах кізі чуртапча. Че хысхыда даа тынағ кӱннерде дачаларда чон тол парча. Кізілер дачаларынзар мылчаа кірерге, ит сістирге кил парчалар, хона даа халчалар.
Сом авторни
Автор :
Оксана Челтыгмашева
Пн | Вт | Ср | Чт | Пт | Сб | Вс |
28 | 29 | 30 | 31 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде