Иң артыхтарына – аарлас
09.08.2023
Хабарлар
![Иң артыхтарына – аарлас Иң артыхтарына – аарлас](/upload/iblock/ed9/6ewasfuvek464thc1fj1vrxk2gyh1j88.jpg)
Сыйыхтарға турысхан чуртағҷылар Хакасия пазы Валентин Коноваловнаң
Сыйыхтас. Хакасияның ӱлгӱ туразында істеністе паза сӧбіреде улуғ чидіглерге читкен чуртағҷыларға аарластығ аттар пирілген паза сыйыхтар читірілген
Таныхтатханнарның аразында имҷілер, идінҷектер, правительстводағылар, аал чӧбі пастары, транспорт киреенде істенчеткеннер паза даа пасха специалисттер полғаннар. Сыйых алғаннарның санына Асхыс аал чуртағҷылары Владислав паза Елена Толмашовтар кіргеннер. Оларға «Родительская слава» орденнің медальы читірілген. Ирепчі пис пала ӧскірче.
– Піс Еленанаң аның тоғызында танызып алғабыс. Мин аны кӧр салғанымдох, чӱреем ачи тӱскен. Андағ абахай хыс хайди харахха тасталбас паза кізі чӱреен тибіретпес?! Елена минің ікінҷі чардығым полар тіп сағын салғам. Пір ай пазынаң мағаа ирге парарзың ма тіп сурғам, тӱрче полғанда, піс ЗАГС-та полғабыс. Амды пістің пис пала. Улиина 11 час, кічиине пис ай,– хынғанынаң харах албинча сӧбіре пазы Владислав Александрович.
Елена Евгеньевна позына тоғыс таапчатхан полча. Ол таңахтар ӧскірерінең айғасча. Сӧбіре пазы полиция тоғынҷызы полып істенген, амды отставкада, подполковник званиеліг.
Школада ӱгренерінең паза олған садына чӧрерінең пасха, Толмашовтарның палалары англия тілі кружогына чӧрчелер, теелбекнең, суғда чӱзерінең, музыканаң айғасчалар. Паба-іҷее оларны кӧп тарт чӧрерге килісче. Палаларына кӧп тус хоратчатса даа, олар майыхпинчалар.
– Палаларны піс посха сыданарға, ах сағыстығ поларға, постарының сағыс-кӧрістері ползын, оларнаң піснең ӱлессіннер, чӧптессіннер, алҷаастар идерге хорыхпазыннар тіп ӱгретчебіс. «Родительская слава» орден медальы – ол пістің палаларыбыстың cыйии. Олар школаның, аймахтың чуртазында ӧткін араласчалар, грамота-дипломнар, кубоктар алчалар. Палаларның чидіглерін чыып, орден аларына сурыныс пічиин ысхабыс. Пістің сӧбіребісті пӧзік паалааннар. Анзына поғдархапчабыс, – ӧрінізін чазырбинча кӧп палалығ іҷе Елена Толмашова.
Сӧбіреде пала кӧп полза даа паза хоныхха кӧп кӱc хоратчатса даа, Елена Толмашова уғаа абахай, иптіг кӧрімніг. Хайди ол тіпче, ипчі хаҷан даа иптіг поларға кирек. Хонғаны, тізең, ағаа хабассын, ипчінің сурынызына тоғыр полбазын.
Сыйыхтар алғаннарның санында ідӧк Хакасия пазы аппарады устағҷызының орынҷызы Ирина Емельянова полған. Ол «Хакасияның істеніс сабланызы» медаль алған. Ирина Николаевна правительство туразында илееде чыл істен салған. Хакасия пазының социальнай сурығларҷа орынҷызы Михаил Побызаков, Пыдырах аал чӧбінің пазы Семён Боргояков Аарластығ пічіктер алғаннар.
Олох кӱн Хакасия пазы Валентин Коновалов, спорт ветераннарынаң тоғазып, оларны чағдапчатхан Физкультурник кӱнінең алғыстаан. Хакасияның ӱлгӱ туразында спортта кӧп чыл істен салған, турыстығ спортсменнер ӧскірген, пӧзік чидіглерге читкен тренерлер паза ветераннар чыылысханнар, хайзылары спортсменнерні ле нимес, ідӧк олаңай чуртағҷыларны спортха паза хазых чуртасха кӧніктіргеннер.
– Хакасияның правительствозы физическай культура паза спорт тилізіне улуғ хайығ салча. Піс он азыра спорт объектін пӱдір салғабыс паза тыхтаабыс, 2030 чылға теере тиліс стратегиязын, тимнеп, алыбысхабыс, национальнай спорт кӧрімнерінҷе федерация тӧстеебіс паза ахча синін хосхабыс, – таныхтаан чооғында Валентин Олегович.
Хакасия пазы Валентин Коноваловтың чарадиинаң пӱӱл республиканың 11 муниципальнай пӱдізінде спорт площадказы тӧстелер. Олар «Спорт тузы!» адаларлар. Анда тасхархы тренажерлар, штангалар турғызыларлар. Асхыс, Ағбан пилтірі, Таштып аймахтарында паза Ағбанда – ікілер площадка, Алтай, Орджоникидзе аймахтарында паза Нымырттығ поселокта – пірер. Орғах айы тоозылғанҷа спорт площадкалары тимге сых парарға киректер.
Хубачарда паза Тойымда «хыйға» спорт площадкалары турғызыларлар. Анда футбол, баскетбол, волейбол паза стол теннизін ойнир оңдайлар полар.
Хайди таныхтааннар спорт ветераннары, тренерлер республикада спортха паза физическай культураа улуғ хайығ салчатханда, халғанҷы чылларда Хакасияның спортсменнері Россия паза чоннар аразындағы марығларда пӧзік чидіглерге читчелер, сыйыхтығ орыннар алчалар, пістің регионны сабландырчалар.
Сом Дмитрий Сунчугашевти
Автор :
Оксана Сунчугашева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде