Орден улуғ сӧбірезінде хайраллалар
09.08.2023
Хабарлар
Чааҷы комиссары Николай Видяйкин Иван Чульжановтың ипчізі Лилия Валерьяновнаа Мужество орденін читірче
Хумартхылас. Ағбан городтың устағ-пастаанда, ӧнетін чаа операциязында махачы чаалазып, чуртазын пир салған Иван Чульжановтың сӧбірезіне Мужество ордені читірілген
Сержант Иван Семёнович Чульжанов ӧнетін чаа операциязында аралазарға пос кӧңнінең парыбысхан. Анда ол позы чӧрчеткен гаубицалар взводында механик-водитель полып чааласхан. Иван Семёнович Донбассты неонацисттер холынаң позыдар чаалазығда 13 мартта 2023 чылда сын матыр чіли чуртазын пир салған. Ол Россияның Матыры Аймир Миягашевтің чағын туғаны полған.
Хакасияның чааҷы комиссары Николай Видяйкин, Россия президентінің Указын хығырып, Иван Чульжановтың ипчізі Лилия Валерьяновнаа Мужество орденін читірген:
– Россия Федерациязы президентінің 13 майда 2023 чылда алылған 345 номер Указы: чааҷы службазын толдырчадып, позына айабин, махачы чааласхан ӱчӱн, сержант Иван Семёнович Чульжановты Мужество орденінең cыйыхтирға, ӱреен соонда...
Лилия Чульжанова позының ирінең поғдархапча, ідӧк ол чааҷыларны чиңіснең ибзер айланарын сағыпчатхан сӧбірелерге паза, чағыннарын чідіріп, чобалчатханнарға хабазығ cӧстерін читірче:
– Иван пос кӧңнінең чаалазарға парарға чарадығ алған. Піс таңнап таа парғабыс. Пӱӱн піске уғаа кирек, хумартхы сыйых читірділер, ол матырның хумартхылас тании полар. Хайди ол служба апарғанын мин чахсы пілчем, піс аннаң сыбыра палғалыс тутхабыс. Хайди ол Чир-суубысты арачылаанын пілібӧкчем, прай ирткен туста піс хада полғабыс. Піснең хада полған, піске полысхан, ам даа піснең хада полчатхан прай кізілерге алғызым читірчем. Ідӧк хабазарға сағынчам ол сӧбірелерге, хайзыларының чағыннары ӧнетін чаа операциязында араласчалар. Прай чӱреебіснең піс оларнаң хадабыс.
Сержант Иван Чульжановтың ӱс палазы ӧсче: ікі хызыҷах паза пір оол. Пабазы ниме ӱчӱн чаалазып, чуртазын пир салғанын Глеб оолғы чахсы пілче, позы даа армияа парарға тимненче:
– Чааҷы службазы мағаа – Ада чир-суубысты арачылиры, сӧбіре, таңдағы чуртас ӱчӱн турызары. Пабам ниме ӱчӱн чааласханын чахсы пілчем, мин ідӧк тудынарға сағынчам, пабамнаң тың поғдархапчам.
Ағбан город пазы Алексей Лёмин Иван Чульжановтың сӧбірезіне хомзынызын читірген:
– Сірернің иріңер, пабаңар, иң чағын кізіңер Чир-суубысты сабландырчатхан матыр полчатханын піліңер. Ол – сын матыр, пір дее нимедең чалтанмин, пос кӧңнінең Чир-суубысты арачылирға парған. Иван Семёнович Чульжанов – Россияның Матыры Аймир Миягашевтің абаазы. Сірернің родыңар – махачы, саблығ чааҷылар роды. Пу орден, сірернің сӧбіреңерде хумартхылас тании полып, сірерні хайраллазын. Аны тӧлдең тӧлге пир турыңар. Сірернең хада чобалчабыс. Ниме дее полза, чуртас хайди даа парчатса, пістің ізіктерібіс сірерге сыбыра азых. Хайдағ даа сидіксініс полза, хайдағ даа сурығ сығысса, піс сірерге тӧреміл полыс турарбыс.
Пістің матырларыбысха сабланыс хаҷанға даа!
Сомнар Ағбан город устағ-пастаа сайтынаң
Автор :
Николай Султреков
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
