Молаттаң даа пик кізілер
09.08.2023
Хабарлар
Игорь Чертыков (сол саринда) паза Леонид Кызласов
Сыйыхтас. Ағбанда Тимірчолҷы кӱні алнында «РЖД» ОАО-ның иң артых тоғынҷыларын таныхтааннар
Амғы туста Россияның тимір чол транспортының отрасльы тилекейде иң улуғларының пірсі полча. Тимір чол палғалызы ікі регионға – Хакасияа паза Хызылчар крайына – улуғ туза ағылча. Таарлағны паза чонны тартханы – экономиканың тилізіне кӧріндіре хозым итче.
Ағбандағы тимірчолҷыларның Культура туразында чыылысхан отрасльның тоғынҷыларынзар пастағы алғыстас сӧстерінең Хызылчардағы тимір чолның пастығының орындағы устанысча орынҷызы Александр Кожанов айланған. Ідӧк ол Хызылчардағы тимір чолның пастығының паза «РЖД» ОАО-ның ӧӧн директорының алғыстазын читірген.
– Амғы туста «Междуреченск – Тайшет» инвестиция проекті чуртасха кирілчеткені хоостыра ікінҷі чол ӧткін пӱдірілче. Ідӧк пар тимір чолларны тыхтирынҷа тоғыстар тӧреміл апарылчалар. Пӱӱл иртірілген тыхтағ тоғыстарының кӧзідии ирткен чылдағызынаң 100 азыра процентке артых. Оой нимес тустар полза даа, таарлағны паза чонны тартары ӧзіп одырча. Че мындағ салтарларға сірернің тоғызыңар, кӱстенізіңер чох чит полбасчыхпыс, – таныхтаан Александр Фёдорович.
Аның сӧстерінең, амғы туста Хызылчардағы тимір чолда 7,5 муң азыра кізі істенче. Мындағ улуғ ӧмені Тимірчолҷылар кӱнінең позының паза республика пазының адынаң Хакасияның транспорт паза чол хонии министрі Дмитрий Василиади, Хазна Думазының депутады Сергей Сокол, Ағбанның пазы Алексей Лёмин алғыстааннар. Дмитрий Пантелеевичке Хакасияның паза Хызылчардағы тимір чолның хада-пірге тоғызын чахсыландырарына паза тилідеріне улуғ хозым иткен ӱчӱн Хызылчардағы тимір чолның пастығы Алексей Туманиннің алғыстазы читірілген.
Пайрамнығ иирде тимір чолда 20, 30 чыл тоғын салған кізілерге матлама істеніс ӱчӱн танығлар читірілгеннер. «РЖД» ОАО-ның ӧӧн директорының, Хызылчардағы тимір чолның пастығының алғыстастары паза Аарластығ пічіктері пирілгеннер. Тимірчолҷылар ідӧк республиканың, Ағбанның устағ-пастааның сыйыхтарын алғаннар.
Матлама тоғызы, тимір чолның сайбағ чох тоғызына хозым иткен ӱчӱн Хакасияның транспорт паза чол хонии министерствозының Аарластығ пічиин Игорь Чертыков алған. Игорь Николаевич Ағбандағы чарытхы пирҷең дистанцияда 1993 чылдаң электромеханик полып тоғынча. Тимір чолзар, тізең, 1990 чылда кіріп алған.
Ол Тывада тӧреен, олған тузы Бурятияда ирткен. Тоғыс чолын пабазының чӧбінең таллаан. Аннаңар чиит оол, ӱгредиин тоозып, Ағбанда тоғысха кірген. 1990 чылларда мында тимір чолда ла сала ізестіг тоғыс полҷаң тіп чоохтапча Игорь Николаевич. Ол тоғызына хаҷан даа нандырығлығ хайча, наа килген чиит специалисттерге чӧптернең полысча. Аннаңар даа аны пір ле хати таныхтабааннар, ағаа алғыстастар паза Аарластығ пічіктер читірілген.
Таныхтатханнар аразында пастағы сыйыхтарын алчатханнар полғанох. Іди тимір чол транспортында матлама істенізі, тоғызын пасхазына кӧзідім полар иде толдырчатханы ӱчӱн «РЖД» ОАО-ның энергетика комплексінҷе директоры – Трансэнергоның пастығы Валентин Саньконың алғыстазынаң Леонид Кызласов таныхтатхан. Ол Ӱгечідегі тяговай подстанцияда дежурнай электромеханик полча. Чағынғы аалларға паза тимір чолға чарытхы пирчеткен станцияның тоғызы ӱчӱн нандырча. Ідӧк пу подстанцияҷа Кузбассэнергозар 220 киловольт чарытхы парча.
Леонид Анатольевич Асхыс аймаандағы Кызлас аалда тӧреен-ӧскен. Хызылчардағы чоннар аразындағы транспорт институдында ӱгренген соонаң, пастап Теба станцияда электромонтер полып тоғынған, анаң Писхамҷы станцияда істенген. Армия соонаң Ӱгечізер тоғысха кірген. Тимір чолда ол тиксі 11 чыл істен парир. Амғы туста чиит оол сӧбірезінең Асхыста чуртапча, сутка сай тоғынчатхан орнынзар чӧрче. Тимір чолда істенерін позы таллап алған, амды тоғызын таныхтааннарына ӧрінче, поғдархапча.
Ӱлӱкӱннің пайрамнығ чардығы тоозылғанда, тимірчолҷылар «Локомотив» стадионзар парғаннар. Анда кибірге кір парған спартакиада иртірілген. Тимір чол тоғынҷылары волейболда, мини-футболда, дартста, хол пазызарында, эстафетада паза пағ тартызарында кӱстерінең сынасханнар.
Сом авторни
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 26 | 27 | 28 | 29 | 30 | 31 | 1 |
| 2 | 3 | 4 | 5 | 6 | 7 | 8 |
| 9 | 10 | 11 | 12 | 13 | 14 | 15 |
| 16 | 17 | 18 | 19 | 20 | 21 | 22 |
| 23 | 24 | 25 | 26 | 27 | 28 | 29 |
| 30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде
