Сағыста ӱрге халар
09.08.2023
Хабарлар
![Сағыста ӱрге халар Сағыста ӱрге халар](/upload/iblock/14c/q53zu5f86o40qqemw22a78nb597rsqfh.png)
Олған лагерьіндегі палалар
Чайғы тынағ. Асхыс аймааның Пуланнығ кӧлдегі «Орлёнок» лагерьінде пу кӱннерде «Чир-суғ арачылағҷылары» кӧстегліг смена иртче. Анда СВО араласчыларының палалары паза хазии уйан олғаннар тынанчалар
Тынағ тузына олар «Юнармия» чӧрімнің тархынынаң, культуразынаң, ӱлӱкӱннерінең паза кибірлерінең танызарлар, ідӧк Россияның кӱс структураларының тоғызынаңар, пӱдізінеңер, Россия Армиязының тиріглерінеңер, техниказынаңар паза чааҷыларның чурт оңдайларынаңар піліп аларлар. Чир-сууна хынысха чарыдылған сменаның ӧӧн пӧгіні – олғаннарға посты орта тудынарынаңар, чааҷылар этикедінеңер чоохтиры. Ідӧк чиит тӧлні хазых чуртас оңдайына тудынарға, хазнаа паза аның танығларына, чааҷы кибірлеріне паза профессиязына поғдархирға ӱгретчелер, чир-сууна туза ағыларға кирек полчатханын читірчелер.
Аннаң пасха, олғаннар хада-пірге тоғынарға, чайаачы сариларын тилідерге ӱгренчелер.
Смена тоозылза, олғаннарны улуғ пайрам сахтапча: олар Холи сырларнаң ойнирлар, барабанщиктің кӧзідиин кӧрерлер паза кӧбіктіг иир иртер.
– Тӱрче полза, чайғы тоозыл парар. Аннаңар олғаннарға, чахсы тынанып, наа ӱгредіг чылына кӧп кӱс алынып аларға алғапчам! Пу тус хынығ иртсін! Ізенчем, пу смена полғанына ла чапсых полар паза сағыста ӱрге халар! – таныхтаан Хакасияның істеніс паза социальнай арачыланыс министрі Татьяна Раменская.
«Орлёноктың» директоры Валерьян Барашков республика лагерьлерінің устағҷылары аразында иң чиит полча. Ол хаҷан-да позы пу лагерьде тынанған, соонаң тоғынған. Аннаңар лагерьге, аның тоғынҷыларына паза тынанчатхан олғаннарға улуғ паарсаснаң хайча.
– Лагерьнің ӧӧн пӧгіні – олғаннарға паза тоғынҷыларға чахсы оңдайлар тӧстирі. Піс полған на палаа полызарға, аның позына киртінізін пиктирге, тиң частығларнаң чоох алызарға, турғысхан пӧгіннеріне чидерге ӱгредерге кӱстенчебіс. Олар иткен киректері ӱчӱн нандыр поларға паза халых чон аразында посты орта тудын пілерге киректер. Мында аймах-пасха тузалығ паза кӧп піліс пирчеткен сменалар иртірілчеткені – лагерьнің чидии. Пу сменада піс чир-сууна хынарға ӱгредеріне ӧӧн кӧстег иткебіс, амғы туста анзы полған на кізее кирек, – искірген лагерь директоры.
Таныхтирға кирек, пӱӱл Хакасияда олғаннар 16 город тастындағы лагерьде тынанчалар. Чайғының пастағы ікі айына оларда 6 муң азыра пала пол килген.
Сом Хакасияның істеніс министерствозы пресс-службазыни
Автор :
Оксана Мерзликина
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде