Кӧп палалығ сӧбірелерге – микроавтобустар
11.08.2023
Хабарлар
Александр Асочаковтың паза Анастасия Тормозакованың ынағ сӧбірезі
Сыйыхтас. Хакасияның ӱлгӱ туразы алнындағы Пастағы май ачығында республика пазы Валентин Коновалов читі паза аннаң кӧп пала ӧскірчеткен сӧбірелерге наа автомобильлер клӱстерін читірген
Хакасияда улуғ сӧбірелерге наа транспорт клӱстерін 12 чыл пайрамни читірчелер. Кӧп орыннығ автомобиль 100 азыра сӧбірее сыйлал парған. Республика бюджедінең ол хорадығларға 126,2 миллион салковай позыдылған. Пӱӱл кӧп палалығ сӧбірелерге 23 микроавтобус алылған, тиксі 43,5 миллион салковай хорадылған. Улуғ сӧбірелерні алғыстап, «Соболь» микроавтобус клӱстерін читірген Хакасия пазы Валентин Коновалов.
– Улуғ сӧбірелерге хабазары паза палаларны турыстығ ӧскірер оңдайлар тӧстирі Хакас Республика правительствозының ӧӧн пӧгіннерінің пірсі полча. Кӧп палалығ сӧбірелерге читі орыннығ микроавтобустар алчатханы – чахсы паза тузалығ хабазығ. Таныхтирға кирек, пӱӱл піс ол кӧстеге ахча cинін тӧрт хати ӧскірібіскебіс. Ҷағынғы чылларда автомобильге теесті чох идіп аларға, кӧп палалығ сӧбірелерге микроавтобустар клӱстерін теес чох пир турарға ізенчебіс.
Прай сӧбірелерге палалар ӧскірчеткен ӱчӱн алғызым читірчем. Олғаннарны ӧскірері – оой нимес паза уғаа нандырығлығ кирек. Сӧбірелеріңде прайзы часкалығ паза хазых ползын, – чоохтаан Хакасия пазы Валентин Коновалов.
Анаң Валентин Олегович клӱстерні пайрамни читіріп пастаан. Пастағы клӱс Шира аймаандағы матыр іҷе Ольга Столбоваа пирілген. Аның сӧбірезінде 23 пала ӧсче, ипчі оларны иб аразында хайынарға кӧніктірче паза ӱгреністеріне хайығ салча. Палаларын удур-тӧдір пілізізіп, ӧмелезіп тудынарға паза улуғларны улуғлирға ӱгретче.
Таныхтирға кирек, Шира аймаанаң автомобильні тӧрт кӧп палалығ сӧбіре алған. Ікілер сӧбіре Таштып аймаанаң паза Харатас городтаң полған. Пірер сӧбіре Ағбан, Саяногорск, Сорск городтардаң, Пии паза Боград аймахтарынаң. Иң кӧп сӧбіре Асхыс аймаанаң килген, оларға сигіс клӱс читірілген. Постарынаңар Анастасия Тормозакова паза Александр Асочаков хысхаҷахти чоохтап пиргеннер. Олар танығлығ сыйых аларға прай сӧбіренең чиде салғаннар. Ирепчі прай 11 пала ӧскірче, постарының читі пала. Анастасияның пиҷезі ӱреен соонаң аның тӧрт палазын, сӧбірезер алып, ӧскір сыхханнар. Пӱӱл 11-ҷі чылы оларда чуртап парирлар. Тун палаларына 26 час тол парған, иң кічиине алты ла ай. Микроавтобус алар теесте олар читі чыл тур салтырлар.
– Піс 2016 чылда кӧп палалығ сӧбірелерге автомобиль пирер тееске кіргебіс. ГАЗель клӱзі читірілгені – прайзына улуғ ӧрініс. Сӧбіренең ікі машиналығ чӧрчебіс. Итсе, піс оларзар прайзы сыңминохчабыс. Улуғ палаларның автомобильнең чӧрҷең правалары пар. Олар тоғынчалар, ортын палалар студент полчалар, кічіглері школада ӱгренчелер, кічии – ыңааҷах. Амды студенттерні пір транспорттығ Асхыссар паза Ағбанзар апар сал турарға оңдай пар, – cағыстарынаң ӱлескен Анастасия Тормозакова.
Читі орыннығ «Соболь» микроавтобустығ чӧрерге «В» категория чарапча, аннаңар, ниикке чӧрҷең машинаа права пар полза, хоза ӱгренерге киректелбинче. Александр Асочаковтаң сӧбірезін хайдар апар килерге сағыс тутча тіп сурғам.
– Иң пастағызын ибзер чол полар (Кӱлімзірепче. – Авт.). Пӱӱн ізіг кӱн, аннаңар чолда парчатса, кӧл хыринда турып, сомып аларбыс. Анаң ӱгредіг чылы пасталғанҷа палаларнаң пірее чирзер тынанарға чит пар килербіс, – чарытхан сӧбіре пазы.
Хакасия правительствозы халғанҷы чылларда кӧп палалығ сӧбірелерге социальнай хабазығларға позыдылчатхан ахча синін ӧскірерге кӱстенче, пӱӱл республика бюджедінең ол хорадығларға 800 миллион салковай кӧріл парған.
– Пӱӱл Ағбан город кӱнінде микроавтобус ікі сӧбірее читірілген, пӱӱн, тізең, танығлығ сыйыхты 21 сӧбіре алды. Читі орыннығ автомобиль улуғ сӧбірее, пір саңай читі кізее одырып, киректер хоостыра чӧрерге оңдай пирче. Ағаа хоза «Соболь» микроавтобус хомай чолларҷа сидіксіністер чох чӧр полча. Аннаңар олар тайғазар тынанарға даа, чистектеп тее пар поларлар. Кӧп палалығ сӧбірелерге мындағ транспорт тузалығ полар тіп сағынчам.
Прай улуғ сӧбірелерні мындағ хабазығ алғанынаң алғыстапчам. Ідӧк палаларны ӧскірчеткеннері ӱчӱн алғызым читірчем. Ол оой нимес кирек. Пӱӱн, тізең, піс танызып алдыбыс сӧбірелернең, хайда он азыра пала ӧсче, чибіргі азыра палалығ сӧбірелер парох. Ол син пала ӧскірчеткен іҷе- пабаларны махтирға кирек. Ағаа хоза, палаларны кӧріп, сизінчезің, прай сӧбірелер часкалығлар паза ынағлазып чуртапчалар, – чоохтаан Хакасияның істеніс паза социальнай арачыланыс министрі Татьяна Раменская.
Кӧп палалығ сӧбірелерге клӱстер пайрамни читірілген соонаң кибірли прайзы сомға суурынып алған. Анаң полған на сӧбіре Хакасия пазы Валентин Коноваловнаң алынҷа сомға суурынған.
Сомнар Дмитрий Сунчугашевти
Автор :
Наталья Тюкпеева
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
