Тиксі тоғыс ӱчӱн нандырча
12.08.2023
Хабарлар
Андрей Чебодаев паза Александр Смирнов тоғыс тузында
13 августта – Пӱдірігҷі кӱні. 1956 чылдаң сығара пістің хазнада Пӱдірігҷі кӱні таныхталча
Пӱдірігҷілернің профессия кӱніне удур Ағбан городтың муниципальнай чурт чыындызы коммерческай нимес пірігістің (МЖФ) тимір-бетон ниме-нооларның 4 разрядтығ формовщигі Андрей Чебодаевнең таныстырчабыс. Ол пу пӱдіріг организациязында 14-ҷі чылы істенче. Тӱзімніг тоғызы ӱчӱн киҷее ағаа Хакас Республиканың Аарластығ пічии читірілген.
Пӱдірігҷінең тоғазып алар ӱчӱн, МЖФ-тың тимір-бетон заводынзар чол тутхабыс. Цехта тоғынҷылар улуғ маң чохха тӱсчеткеннер. Тимір-бетон блоктарны формадаң сығарчатханнар.
– Пу тоғыста усанабастаң пол парғам. Хакас техническай институттың машина пӱдірері факультедінде инженер-механикке ӱгреніп алғам. Армия соонаң ӱгредиим хоостыра мехзаводта ӱс чылҷа тоғынғам. Анаң чахығлар кірбинібіскенде, тоғыс чох полыбысхам. Ағбанның тимір-бетон ниме-ноо сығарҷаң заводынзар олаңай тоғысчаа, бетон-смесительнай тиріглер узына кірібіскем. Анаң пастығым мині мастерге турғыс салған. Амды мин мастер-бригадир полчам. Пір сменада 22 кізі тоғынчабыс. Ӱс кӱн тоғынчабыс, ӱс кӱн тынанчабыс. Тоғыс кӱні 8.00 частаң 21.00 часха читіре. Пу аар тоғыс. Кӱн тооза хыймыранарға кирек. Камераларда киинің ізии 80 градусха читіре кӧдіріл парча. Чайғызын иртен камера ізиин ассаң, ол чылығ уламох цехтарҷа тарапча. Тимір-бетонны, тимірні хаап чӧрерге, бетонны холнаң кӱрирге килісче, – теен Андрей Чебодаев.
Тимір-бетон заводында аймах синніг бетон ниме-ноолар сығарылча – 0,1 кубометрдең 1,5 кубометрге теере. Технолог Любовь Васильевна Рябинушкина бригадаа чахығ пирче. Ӱс кӱнге ол чахығны толдырыбызарға киректер. Тимір-бетон блокты урыбысхан соонда, кочегарлар аны камерада оорда ізітчелер. Ікінҷі кӱнінде иртен тимір-бетонны формадаң сығарарға чарир. Че ол 28 кӱн пазынаң на сыныхталар. Пу син тус аразына ол, тыып, пик пол парча. Заводта 50 маркадаң 450 маркаа теере тимір-бетон ниме-ноо тимнелче. Ол санда кӧп хадыллығ туралар пӱдіриинде киректелчеткен блоктар, бордюрлар паза пасха даа ниме-ноо.
Андрей Чебодаев 10 чылҷа мастер-бригадир полча. Ол цехтағы тиксі тоғыс ӱчӱн нандырча: тоғынҷыларның хорғыс чох тоғызы паза тимір-бетон ниме-ноолар сығарызы ӱчӱн.
Халғанҷы чылларда пӱдірігде наа технологиялар чуртасха кирілчелер. МЖФ-тың тимір-бетон заводында даа кӧп алызығ пар. Андрей Чебодаев андар тоғынарға килгенде, формовщиктер бетонны холнаң урҷаңнар паза весыда кӧдірҷеңнер. Ол туста пір сменаа иң килкім, 3х3 метр, алты плита тимнебісчеңнер. Амды сменаа андағ – 43 блок.
– Ам бетон компьютер пастыра урылча. Ідӧк бетон тимнеҷең наа тиріг алылған. Он чыл мының алнында иргі полған, слесарьлар аны тыхтап майыхчаңнар. Амды кранның пульты батарейкадаң тоғынча, мының алнында пульттар эмектіг полғаннар. Піс аны, тудып, хаап чӧрҷеңміс, – таныхтаан Андрей Чебодаев.
Тимір-бетон заводының иң маң чох тузы – хысхы. Хысхыда завод пӱдіріг тузына тимненче. Чайғыда формовщиктер ӧӧнінде чоллар хастада салылчатхан бордюрлар сығарызынаң айғасчалар.
Андрей Чебодаев тимір-бетон сығарҷаң заводта, 13 чыл тоғынып, позын нандырығлығ тоғынҷы чіли кӧзіт пирген. Ағбан городтың муниципальнай чурт чыындызының устағ-пастаа, тӱзімніг тоғызы ӱчӱн, аны алғыстас паза Аарластығ пічіктернең таныхтаан.
Андрей Чебодаев Пии аймаанда Маткичіг аалда улуғ сӧбіреде тӧреен-ӧcкен. Аның ікі пиҷезі Валентинанаң Вера паза Алёна туңмазы пар. Пабазы Максим Яковлевич чиитте Ағбанда мехзаводта тоғынған, анаң Маткичіг аалзар кӧзібіскенде, Бондаревтегі совхозта механизатор полып істенген. Іҷезі Елизавета Михайловна совхозтох хойларны хадарҷаң паза хырыхчаң. Андрей Максимович хада хонғаны Инга Владимировнанаң ӱс палалығлар: 14 частығ Анатолий, 8 частығ Софья паза 1 час 10 айлығ Максим. Пос туста сӧбіре дачазар паза кӧллерзер тынанарға чӧрче.
Пӱдірігҷі кӱні чағдапчатханда, Андрей Чебодаев прай пӱдірігҷілерні профессия ӱлӱкӱнінең алғыстаан:
– Мындағ ӱлӱкӱн таныхталчатханы ӧріндірче. Пӱдірігҷінің тоғызы аар, матап хыймыранарға кирек. Мында арғаас кізі тоғын полбас. Аннаңар прайзына кӱс алғапчам, пик хазыхтығ ползыннар паза тоғыс ӱчӱн чал ахчазы чахсы тӧлелзін. Прай пӱдірігҷілерні ӱлӱкӱннең алғыстапчам!
Сом Дмитрий Сунчугашевти
Автор :
Оксана Челтыгмашева
| Пн | Вт | Ср | Чт | Пт | Сб | Вс |
| 27 | 28 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
