Спортнаң айғасчалар, палых ӧскірчелер
11.08.2023
Хабарлар
![Спортнаң айғасчалар, палых ӧскірчелер Спортнаң айғасчалар, палых ӧскірчелер](/upload/iblock/23a/ri211ry5ad358fkbf13oqj47zqzwf429.jpg)
Мини-футбол ачығында чон ӱзілбинче
Тоғыс чорығы. Хакасия пазы Валентин Коновалов Алтай аймаанда пол килген
Футбол ачығы
Иң пурун Валентин Олегович Хойбалзар чол тутхан. Пу аал Хубачар аал чӧбіне кірче. Сизінгенде, аал чӧбінің устағ-пастаа хойбалдағыларға истіг оңдайлар тӧстирге матап кӱстенче. Хысха тус аразына Хойбалда хоккей ачығы тимге сыххан, кӱс хосчаң тренажерлар турғызылғаннар. 7 августта, тізең, мини-футбол чазызын пайрамни асханнар. Мероприятиеде Хакасия пазы Валентин Коновалов, спорт министрі Сергей Кочан, Алтай аймааның пазы Ирина Войнова паза аал чуртағҷылары араласханнар. Валентин Олегович, чыылған чонны танығлығ кирекнең алғыстап, теен:
– Хакасия правительствозы пизінҷі чылы чонның чуртазын чахсыландырарға харасча. Кӱстенізібіc тикке парбинча. Наа объекттер тузаланысха кирілчелер. Спорт инфраструктуразынаңар чоохтаза, пӱӱл аны нааҷылирына 100 миллион артиинаң салковай позытхабыс. Амды ГТО, воркаут ачыхтары, хоккей площадкалары Хакасияның аймах аалларында паза городтарында орныхчалар. Объекттернең толдыра кӱснең тузаланарға, олох туста хайраллирға кирек. Ачыхтарда чон ӱзілбезін.
Ирина Войноваа сӧс пиргенде, ол Хубачардағы аал чӧбінің ӧмезіне чылығ сӧстер читірген. Хайди таныхтаан Ирина Ивановна, Александр Мин Те Хоның устаанынаң, министерстволарның марығларында паза программаларында аралазып, олар кирек ахча киріп алчалар. Кӧзідімге, хоккей ачығының проекті республиканың национальнай паза территориальнай политика министерствозының полызиинаң чуртасха кирілген. Воркаут ачығына ахчаны Хакасияның пӱдіріг паза ЖКХ министерствозы пиртір. Аны пӱӱл часхызын турғысханнар. Спорт министерствозы мини-футбол чазызынаң полыс пирген. Ол тимде полған, че ағаа хайди даа арған чабығ киректелген. Чабығны садызарына, тӧзиріне 2 миллион 300 муң салковай парыбыстыр. Амды Хойбалда ФАП тимге сых парир. Ідӧк «Ӱгредіг» нацпроект хоостыра орындағы школада тиксі тыхтағ тоғыстары иртірілер.
Спорт министрі Сергей Кочан кӧп чоохтанмаан. Сергей Владимирович, аалдағыларны алғыстап, кічіг футболисттерге чоон торт паза мерчіктер сыйлаан.
Хойбалда олғаннарны хазых чуртасха тартча физкультура ӱгретчізі Тельман Назаров. Тельман Телмановичтің чооғынаң, прай спорт объекттері улуғ кирексіністе. Хойбалдағылар хысхы тооза хоккей ойнаптырлар, амды футболда кӱстерін сынапчалар. Аалдағылар, Харатастағы паза Хубачардағы спортсменнерні хығырып, турнир иртірібізерге хынадырлар. Алтай аймаа волейболисттерінең ырахха сабланча. Абахай хыстар марығларда, Хакасия ӱчӱн не нимес, Россия ӱчӱн турысчалар. Тӱрчедең оларға хоккеисттер паза футболисттер хозыларлар, неке. Тельман Назаров андағ пӧгін турғысча. Кирек килізер тіп ізеніс пар.
Палых ӧскірҷең завод
Хойбал аал соонда Валентин Коновалов Хубачардағы палых ӧскірҷең заводта пол килген. Ол Ызых поселок хыринда орныхча. Завод – федеральнай предприятие, 1973 чылда тӧстелген. Пӱӱнгі кӱнде «Главрыбвод» ФГБУ-ның холында тоғынча. Аның ӧӧн пӧгіні – сарығ палыхтың, осхайның, хоораның, форельнің, нельманың хуруғ харахтарын ӧскірері. Заводтар пу тоғысты апарбаан ползалар, амғы тусха суғларда палыхтар халбасчыхтар даа. Тоғынҷылар ӱзӱргенні Хызылчар крайының алтынзархы чирлерінең чартер рейстернең ағылчалар. Ӱзӱргеннердең хуруғ харахтар сых килзе, оларны ікі ай чарым ӧскірчелер. Анаң нандыра позытчалар. Пылтыр Хубачардағы заводтың ӧмезі 2,5 миллион хуруғ харахты позыдыбысхан. Итсе, олардаң 2-3 % ле ӧзіп алчаттыр. Хоораны пылтыр ӧскіріп пастааннар. Улуғ ӱрег промышленнай предприятиелер ағылчалар. Аннаңар Хакасия пазы Валентин Коноваловха экскурсия тузында искіргеннер.
Директор Андрей Журавлев улуғ аалҷыны цехтарның тоғызынаң таныстырған. Оларның саны писке читчеттір. Полған на цехта улуғ нимес бассейнер орныхча, анда хуруғ харахтарны ӧскірчелер. Заводтың позының палыхтары парох. Сарығ палыхтарға 17-18 час, олар 22-24 килограмм пасчалар. Предприятие хоза ӱс цех пӱдірерге паза форельні садыға ӧcкірерге пӧгінче, че пічіктернең сидіксініс пар полтыр. Амғы туста заводта 45 кізі тоғынча, олардаң илеедезі чииттер. Тоғынҷыларның аразында Ағбанның, Хубачарның паза Ызых поселоктың чуртағҷылары пар. Ікі ирен, мобилизацияа хаптырып, Украинадағы ӧнетін чаа операциязында араласча. Чал ахчазының сині ортымахти 35 муң салковайға тиңнелче.
Экскурсия соонда Валентин Коновалов завод ӧмезінең чоох алысхан. Сурығлар кӧп полбаан. Кізілерні сӧп-саап сурии, СВО-да араласчатхан чааҷыларға пирілчеткен полызығ сағыссыратчаттыр. Ідӧк ол кӱн Хакасия пазы Смирновка паза Сартых аалларның чуртағҷыларынаң тоғасхан.
Сом Дмитрий Сунчугашевти
Автор :
Майя Кильчичакова
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде