Амыр чуртас ӱчӱн
16.08.2023
Хабарлар
Хакасия пазы Валентин Коновалов паза Ӧӧркі Чӧп кнезі Владимир Штыгашев Дмитрий Ивановтың ипчізі Анастасия Гровернең хада
Хумартхылас. Хакасия пазы Валентин Коновалов ӧнетін чаа операциязында араласхан, республиканың Ӧӧркі Чӧп депутады паза КПРФ кізізі полған Дмитрий Ивановтың «Хакасияа чахсы киректері ӱчӱн» орденін (ӱреен соонда) хонғаны Анастасия Гроверге читірген
Дмитрий Анатольевич СВО-зар пӱӱл азығ айында пос кӧңнінең парыбысхан. Ибде одыр полбаан. Аның чаалазығларда аралазар опыды пар полған. Ол Чечен чаазында араласхан. Хайди сағысха кирче Хакасияның Ӧӧркі Чӧп кнезі Владимир Штыгашев, Дмитрий Анатольевич мобилизацияҷа парарға хынмаан. Хайди ол тіптір, мобилизацияҷа парчатханнар ӱр ызылчалар. Д. Иванов, тізең, маңзырап, «Вагнер» хазнани нимес чааҷы компанияа хозылған. Краснодар крайында пір ай ӱгредіг иртіп, штурмовиктер ӧмезінде фронтсар парған. Артемовскты неонацисттердең позыдарында араласхан. Тӱрчедең чара чачырасха контузия алған, че чаалазығнаң устирын тохтатпаан. Сидік туста ол позы, РПГ-даң атып, ыырҷының БМП-зын чох иткен. Че анаң ыырҷы тастаан граната чара чачыразына аар палығлат салған. Чаалазығда чат халған... Д. Иванов устаан отряд махачы чааласхан сылтаанда чағдапчатхан ыырҷы тохтадылған, аның ікі БМП-зы паза 30 чааҷызы чох иділген.
– Дмитрий Анатольевичті мин чахсы танаам. Ол сын кізі, чоннаң азых тудыныстығ полған. Хаҷан даа кӧдіре сабынмаҷаң, артых сӧстер чоохтанмаҷаң. Фронтсар ол звание, сыйых, сабланыс ӱчӱн парбаан. Ол Чир-сууна хынған, пос сӧбірезі, палалары паза амыр чуртас ӱчӱн парған. Минің кӧрізімнең, ол «Россия Матыры» аарластығ атха турызарға кирек. Ағаа андағ ат пирердеңер піс федеральнай кінзер республикадаң ходатайство ызыбысхабыс, подразделение, хайда Дмитрий Иванов служба ирткен, ағаа Мужество орденін пирердеңер сағыснаң сыххан, – чоохтапча Хакасия пазы Валентин Коновалов.
Дмитрий Ивановтың пис палазы ӧкіс халған. Иң кічии пабазы СВО-зар парар алнында ла тӧреен. Хакасия правительствозы чааҷының сӧбірезінің социальнай паспортын тимнеен. Аны хоостыра ол-пу полызығ пирілер, ол санда тураны читіре иптирі паза палаларны ӱгредері.
Дмитрий Ивановтың сӧбірезіне «Хакасияа чахсы киректері ӱчӱн» орден читірер мероприятиеде ідӧк «Боевое братство» чааҷы ветераннарның халых пірігізінің кізілері, «Юнармия» чӧрімнің чииттері араласханнар. «Боевое братствоның» ветераннары Харатаста чаада чат халған чааҷыларның хумартхы тазын турғызарына ахча чыылча тіп искіргеннер. Анда оларның сомнары паза хайда чааласханнарынаңар искіріг полар. Чииттер матырларыбысты пілерге киректер нооза. Ідӧк чыылығ араласчылары Дмитрий Иванов ӱгренген школаа аның адын пирер чӧпнең сыхханнар.
Сом Дмитрий Сунчугашевти
Автор :
Оксана Сунчугашева
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 30 | 1 | 2 |
Кӱн таңмазы
Хакасияда
Россияда
Тилекейде
