Сыйыхтар алғаннар, наа спорт кӧрімнерінең таныстырғаннар
16.08.2023
Хабарлар
Хакасия пазы Валентин Коновалов
тренер Геннадий Бурнаковха алғыстас читірче
Спорт. 11 августта Ағбанның тынағ паркында Физкультурник кӱніне чарыдылған пайрам ирткен
Салтарлар
Чибіргі артиинаң ачых, аймах спорт кӧрімнері, мастер-класстар... Ӱлӱкӱн программазы наа ойыннарнаң, хынығ марығларнаң таңнатхан. Пӱӱл Хакасияның физическай культура паза спорт министерствозы ӱлӱкӱнні алғым иртірерге чаратхан. Физкультурник кӱні спортсменнернің паза тренерлернің не пайрамы нимес нооза. Аны ідӧк хазых чуртасха тартылчатхан, ӧткін тынаға хынчатхан улус таныхтапча. Спорт ведомствозының танығларынаң, амғы туста Хакасияда физкультуранаң паза спортнаң 250 муң артиинаң кізі айғасча.
Кибір хоостыра пайрам сыйыхтаснаң азылған. Че артыхтарның артығын чеестир алнында чыылған чонға хысхаҷахти салтарлар искіргеннер. 2023 чылның пастағы чардығы республиканың спорт сферазына уғаа тӱзімніг ирттір. «Демография» нацпроекттің «Спорт – чуртас сині» федеральнай программазы хоостыра пӱӱл Ағбандағы ниик атлетика манежі тузаланысха кирілген. Аның пӱдерін город чуртағҷылары кӧп чыл сағааннар. Тӧӧ пазы посёлокта «Дельфин» бассейн тимге сых парир, Ағбан пилтірінде – улуғ спортзал. Ікі объектті ӱлгӱдегілер ноябрьда азарға пӧгінчелер. Республика бюджедінең позыдылған ахчаа город-аймахтарда мини-футбол паза спорт ачыхтары турғызылғаннар. Олар улуғ кирексіністе. Хакасияның прай аймахтарында ГТО площадкалары пар.
Чарым чыл аразына пістің cпортсменнер чоннар аразындағы марығларда 100 хати пьедесталға сыхханнар. Республикада пастағызын на гиря кӧдірерінҷе паза чир-спортча Сибирь марығлары ирткеннер. Кӧп чон араласчатхан мероприятиелер санына «Чилдең табырах» чӱгӱріс фестивальы паза Олимп кӱні кірчелер. Оларны иртірері кибірге кір парир. Ікінҷі чылы изере кізілер «Спорт пятницазы», «Шахмат – прайзына», «Хакасияны піліп ал», «Спортта узах чуртас» проекттерде хынып араласчалар. Чылның иң танығлығ хабары – «Саяны» команда пазох Суперлигада ойнапча. Хоккеисттерібіс сіліг ойын кӧзідеріне ізенчебіс.
Футболдағы чидіглерні алынҷа таныхтирға кирек. Часхызын Асхыс аймааның хызыҷахтары «Мини-футбол школазар» проект хоостыра иртірілчеткен тиксі Россия мариинда алтын паза кӱмӱс медальлар холға киргеннер. Чайғызын, тізең, абазадағылар «Тууп меспек» турнирде ӱзінҷі орынға сыхханнар. Марығ Иваново городта ирткен. Анда 12-13 частығ хызыҷахтар устарын кӧзіткеннер. Саарбахтар тренер Евгений Кашицтің устаанынаң ойнапчалар. Пӱӱл Хакасиязар улуғ футбол айланды. Июльда пістің спортсменнер «Саяны» стадионда Туваның паза Хызылчар крайының футболисттерінең тоғасханнар. Пастағы ойын 3:1 саннаң тоозылған, ікінҷізі – 4:1 саннаң. Матчтар «Кимдегі Сибирь» Хакасияның, Хызылчар крайының паза Туваның аразында иділген чӧптезіг хоостыра иртірілче.
Хакасия правительствозы паза спорт министерствозы национальнай спорт кӧрімнерін улуғ хайығда тутчалар. 8 июльда Асхыста «Спорт Тун пайрамы» фестиваль ирткен. Программаа кӱрес, тобит, хапчаң тас, ағаc тартызары паза охчаадаң атары кіргеннер. Августта «Хакас Республиканың кибірліг спорт кӧрімнері паза ойыннары» кинде чарыхха сыхты. Аны тимнирінде улуғ ӧме араласхан. Че иң пурнада спорт министрі Сергей Кочанны махтирға кирек. Сергей Владимировичтің пастаанынаң пособие хакас паза орыс тіллерінең сығарылған.
Сыйыхтас
Улуғ пайрам аарлығ аалҷылар чох иртпинче. Чыылған чонны Физкультурник кӱнінең Хакасия пазы Валентин Коновалов алғыстаан. Чоох тудып, Валентин Олегович теен:
– Cпорт чоннарны піріктірче, кізі хазиин пиктепче. Республикада спортха хынчатхан чон чуртапча. Ӱлгӱдегілер кізілерге cпортнаң айғазар истіг оңдайлар тӧстирге киректер. Халғанҷы чылларда Хакасияда футбол чазылары, тренажёрлар ачыхтары хозыл парғаннар. Піс пу тоғысты аннаң андар апарарбыс. Объекттер саны ӧзер. Спортсменнерге пик хазыхтығ поларға, «ағырчатхан» улусты наа чидіглернең ӧріндірерге алғапчам. Прайзын ӱлӱкӱннең!
Алғыстас соонда Валентин Коновалов тӱзімніг тоғынчатхан тренерлерге сыйыхтар читірген. Ирина Золотухина «Хакасияның физическай культураҷа паза спортча саблығ тоғынҷызы» аарластығ атха турысхан. Республикада Ирина Петровнаны таныбинчатхан кізі чоғыл даа, неке. Аның устаанынаң хызыҷахтар волейболҷа Сибирь паза Россия первенстволарында сыйыхтығ орыннарға тӧреміл сыхчалар. Нинҷе-де ӱгренҷі Россияның піріктірілген командазынзар кірче. 15 специалист Хакасия пазының алғыстазынаң таныхтатхан. Оларның санында СССР-ның спорт узы, тренер Геннадий Бурнаков.
Геннадий Леонтьевич Асхыс чоғархы аалда 1995 чылдаң грек-рим кӱрезінҷе секцияны апарча. Амғы туста секцияа 30-ча пала чӧрчеттір. Тренернің устаанынаң ікі кізі – Валерий Чочиев паза Андрей Ахпашев – Россияның спорт узы нормативін толдырыбысхан. Ізестіг кӱресчі Сергей Чочиев полча. Хакас оол 2022 чылда Сибирь мариинда чиңіс тутхан, Россия первенствозында пизінҷі орынға сыххан. Пӱӱл армиядаң айланды. Амды пазох грек-рим кӱрезінең айғазарға пӧгінче. Тренер хакас кӱрезі хоостыра сағыстарынаң ӱлескен:
– Пӱӱл кӱресче ӱс марығ иртті. 5 майда Ис аалда 18 часха читкелек чииттернің аразында турнир полған. Анда араласхабыс. Итсе, ӱгренҷілеріме оң полбаан. «Спорт Тун пайрамына» оолларымны сығарбаам. Спорт министерствозы хакас кӱрезін хайығда тутчатханы чахсы. Пасха республикаларда кибірліг спорт кӧрімнері улуғласта. Марығлар тӧреміл иртселер, олғаннарны турнирлерге тимнирбіс.
Ідӧк алғыстас тузында Хакасияның спортына улуғ хозым иткен улусты чеестееннер. Спорт ветераннарына, кӧп чыл тоғын салған тренерлерге сыйыхтар читірілген.
Ачыхтар тоғызы
Спорт министерствозы кӱстенізінең 11 августта Ағбанның тынағ паркы улуғ спорт ачығына айлан парған тиирге чарир. Суғда сапбордингче марығ парған, тренажёрлар ачығында кічіглер паза улуғлар, турникте тартынып, устарын кӧзіткеннер. Олғаннар кічіг батуттардаң тӱзерге ынабинчатханнар. Тынағдағы улус «ФитнесФиеста» клубтың тренері Галина Эбельнің устаанынаң йоганың чазыттарын асхан. Ортымах частығ абахайлар чонны хот-айроннаң таныстырғаннар. Че сынап хоббихорсинг чапсытхан. Ноғадаңар? Олған тузымда прай даа оолахтар сымыхха мӱніп чалаңнарға кӧгісчеңнер. Амғы туста пу ойын алынҷа спорт кӧрімі полчаттыр. Спортсменнер ідӧк ойнаҷахха мӱнчелер, аның пазына истең тігілген ат пазы хаптырылча. Хорсерлерге (іди адапчалар хоббихорсингнең айғасчатхан улусты. – Авт.) барьерлер азыра сіліг паза табырах сегірерге кирек. Оларның пӧзии 1,5 метрге читчеттір. Пу спорт кӧрімі Финляндияда тӧстелген тіп саналча. Халғанҷы туста Россияда хорсерлер саны пілдірте ӧс парған. Ат спорты школазының тренері Олеся Мордвина хоббихорсингті ӱтертіске санапча. Итсе, аның тузазы пар. Аттарны майыхтырбасха тіп, олғаннар манежтегі сіліг чӧріcке ойнаҷахтар полызиинаң ӱгренчеттірлер.
Хоббихорсингче марығ парча
Тикcі алза, Физкультурник кӱні Ағбанда уғаа чахсы ирткен. 12 августта чӧрімге город-аймахтар хозылғаннар. Прай муниципалитеттерде ӱлӱкӱнге чарыдылған спартакиадалар, марығлар ирткеннер.
Сомнар спорт министерствозы пресс-службазыни
Автор :
Майя Кильчичакова
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
