Ӱгретчі тоғызына аарласты кӧдірчелер
18.08.2023
Хабарлар
Маргарита Гавриловна Байкалова паза Олеся Илларионовна Улугбашева аарластығ сыйыхтарға турысханнар
Конференция. Киҷее Ағбанда ӱгредіг кирее тоғынҷыларының улуғ конференциязы тоғынып пастаан
Ол кибірли чыл сай август айда иртірілче. Анда ӱгретчілер, ӱгредіг организацияларының устағҷылары ӱгредіг киреен тилідер оңдайларны, кирілген алызығларны ӱзӱрчелер. Ідӧк аймах площадкаларда наа проекттер чуртасха кирер, ӱгредіг кӧстегҷізінің тоғызын апарар паза пасха даа аймах сурығлар кӧдірілчелер. Пӱӱл конференция араласчыларының саны 5 муңнаң ас парған.
Конференция тоғызы М.Ю.Лермонтовтың адынаң орыс драма театрында пайрамни азылған. Аның араласчыларын Хакасия пазы Валентин Коновалов, ӱгредіг паза наука министрі Анатолий Бутенко удурлааннар.
Валентин Олегович конференция араласчыларын палаларға пілістер пиреріне, оларны чуртаста посты орта тудынарға ӱгредеріне, чир-сууна хыныстарын тилідеріне улуғ хозым итчеткен ӱчӱн алғыстаан.
Анаң Хакасияның ӱгредіг киреен тилідеріне улуғ хозым ит салған, кӧп чыл матлама істенген кізілерні таныхтааннар. Оларға «Хакасияның істеніс сабланызы» медальлар, «Хакасияның саблығ ӱгретчізі» аттар, Хакасия правительствозының, Ӧӧркі Чӧбінің, ӱгредіг паза наука министерствозының Аарластығ паза алғыстас пічіктері читірілгеннер.
«Хакасияның істеніс сабланызы» медальны алғаннарның санында Маргарита Байкалова полған. Маргарита Гавриловна ӱгредіг киреенде 60 чыл тоғын салған, оларның 40 чылын школа директоры пол салған. Прай тоғыс чолы пір школада – Пии аймааның Хызыл хара суғ аалындағы школада – ирткен.
10-ҷы классты тоосчатханда, пис хызыҷах немец тілінең сыныхтағны писке тудыбысхан. Ол тустарда школаларда пасха хан тілі ӱгретчілері чидіспинчеткен, аннаңар оларны аалларзар тоғынарға ысхлабысханнар. Іди Маргарита Гавриловна ӱгредіг киреенде пол парған.
– Мин позым ӱгренген школамзар айланғам. 22 чыл немец тілі уроктарын апарғам. Пістің, он класс соонаң тоғысха кірген кізілернің, дипломнарыбыс таа чох полған. Соонаң на Ағбандағы ӱгретчілер училищезінзер орыс тілі паза литература ӱгретчізі специальностьча заочно ӱгренерге кіргем. 1983 чылда, аны тоосханда, мині директорға турғыс салғаннар, – сағысха кирче ол.
«Хакасияның саблығ ӱгретчізі» аарластығ ат Олеся Улугбашеваа пирілген. Олеся Илларионовна институт тоосхан соонаң Ағбандағы 24№ школазар тоғынарға кірген, ол тустаң сығара ӱгретчі анда 27 чыл істен парир. Ол хакас тілі паза литература уроктарын апарча. Аймах проекттерде ӧткін аралазып, халых пірігістерінең хада-пірге тоғынып, ӱгретчі олғаннарның тӧреен тіліне хынызын тыыдарына кӧстегліг улуғ тоғыс апарча. Ідӧк ол чиит специалисттің ӱгредіг кӧстегҷізі полча. Удур-тӧдір наа пілістер аларға полызызып, олар ынағ ӧменең тоғын парчалар.
Олеся Илларионовна, ӱгретчілернің августтағы конференциязы пасталчатханда, ӱгредіг кирее тоғынҷыларына мындағ улуғ хайығ салылчатханына ӧрінген. Анзы ӱгретчі профессиязын кӧдірерге полысча паза ӱгреністе наа кӧстеглер пиреріне уғаа тузалығ полча тіп таныхтаан ол.
Сом Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 29 | 30 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде
