«Саянының» пастағы ойыны
18.08.2023
Хабарлар
![«Саянының» пастағы ойыны «Саянының» пастағы ойыны](/upload/iblock/102/fmcovt1ryhev8t49zhb1l2ll1zj7wbrs.jpg)
Спорт. Пістің хоккеисттер Россия кубогының І чардығында араласчалар. Турнир Иркутскта иртче
Пӱӱл Хакасияның спортына танығлығ чыл. «Саяны» команда Суперлигазар айланды. Анда пістің хазнаның иң кӱстіг ӧмелері ойнапчалар. Cуперлиганың марығлар календарьы саңай пасха полтыр. Улуғ турнирлер август айдох пасталчалар. Пу кӱннерде Россия кубогының І чардығы иртче.
Арға-мӧрійге 14 команда сыххан. Оларны ікі ӧмее чарыбысханнар. «Кидеркі» ӧмезер кірчеткен командалар – «Динамо» (Москва), «Ак Барс-Динамо» (Казань), «Старт» (Нижний Новгород), «Водник» (Архангельск), «Волга» (Ульяновск), «Мурман» (Мурманск), «Родина» (Киров) – Ульяновскта ойнапчалар. Анда ойыннар 12 августта пасталғаннар. «Саяны» команда «Іскеркі» ӧмеде. Хоккеисттерібіс «Байкал» пус ӧргезінде «Енисей» (Хызылчар), «Сибсельмаш» (Новосибирск), «Байкал-Энергия» (Иркутск), «Кузбасс» (Кемеров), «СКА-Нефтяник» (Хабаровск) паза «СКА-Уральский Трубник» (Первоуральск) командаларнаң тоғазарлар. Марығ оңдайларынҷа полған на ӧмедең азах меетке 4 команда сығар. Финаллар 19 – 24 сентябрьда Кемеровта иртерлер.
«Іскеркі» ӧменің пастағы ойыннары 16 августта полғаннар. Турнирні «Кузбасс» паза «Саяны» командаларға азарға ӱлӱс тӱскен. Матч 10.00 часта пасталған, тоғазығны кӧні эфирде кӧзіткеннер. «Кузбасс» – кӱстіг команда. 2023 чылда Россия чемпионадында кемеровтағылар кӱмӱс медаль холға киргеннер. Оларнаң хада ойнирға оой нимес. Чарғыҷы cығырғандох, «ыырҷы» атакаа пар сыххан. Чир-суғҷыларыбыс хаалханы арачылирына кӧп кӱс салғаннар. Че 15-ҷі минутада пастағы меспек учух килген, 45 секунда пазынаң – ікінҷі меспек. Сан – 0:2, «Кузбасс» команда алнында. Салтарлар пірдеезін ӱрӱктірбеен. Аразында комментатор пістің оолларны махтабысчаң: удурласчалар, пос салынминчалар, меспекті кире сабызарға харасчалар, ойын сайбағ чох парча. Кӧрігҷілер дее, видео алтында сағыстарынаң ӱлезіп, «Саяны» команданың кӧңнін кӧдіргеннер. Итсе, пастағы тайм 0:5 саннаң тоозылғанда, кізілернің хомзыныс полғанох.
«Кузбасстың» хаалхазынзар пастағы меспекті Никита Терёхин 12 метрдең кире сабысхан. Кӧрігҷілернің ӧрінізі пу чир полбаан. Спортсменге 23 час, ол Новосибирсктең. «Саяны» командада пастағы сезон ойнапча. 2018 – 2022 чылларда «Сибсельмаш» ӧме ӱчӱн турысхан, 2022-2023 чылларда – «Кировец» команда (Уфа) ӱчӱн. Чиит кізі, Россия чемпионадында 100 ойын иртірібізіп, 29 меспек кире сабысхан. Кемеровтағылар, ӧкпелен парып, таң, тӱрчедең нандыр пиргеннер. Сан 1:6 пол парған, 69-ҷы минутада – 1:7. Сизінгенде, «Саянының» хоккеисттері удур-тӧдір пас пир полбинчалар. Пір кізі атакаа пар сыхса, ағаа полысчаң арғыс хыринда чоғыл. Анзы команда Пӧзік лигада ойнаанда даа харахха тасталҷаң. Меспектіг хоккейде ӧменең ойнирға кирек. Ікінҷі таймда Руслан Гавричков ӧріндірген. Ол Виталий Шнайдернің полызиинаң «Кузбасстың» хаалхазынзар ікінҷі меспекті кире сабысхан. Че матчтың матырына хаалха хадағҷызы Владислав Атапинні санирға чарир. Ойын 2:8 саннаң тоозылған даа полза, ол хаалханы матап арачылаан. Атапин спорт узына кандидат полча. Пастағы тренерлері – В.В. Менжуренко паза И.Г.Лопухин. Владислав «Саяны» командада ла ойнаан. Ағаа алында Суперлигада ойнирға киліспеен. Специалисттер пістің оолның узына пӧзік паалағ пиргеннер.
16 августта пуста ідӧк «СКА-Нефтяник» паза «Сибсельмаш» ойнааннар. Тоғазығ 9:2 саннаң тоозылған. «Байкал-Энергия» команда «Уральский трубникті» 8:3 cаннаң чиңіп алған. Салтарлар киречілепче: «Саяны» пастағы ойынын хомай нимес иртірібіскен. Россия кубогының І чардығы 23 августха теере парар. Ізенчебіс, «Саяны» турнирнің финалына сығып алар. Пасха матчтар хайди ирткенін «Хакас чирі» газетаның пазағы номерінде иcкірербіс.
Пӱӱл меспектіг хоккейге хынчатхан улусты «ізіг» сезон сағыпча. Россия чемпионадының ойыннары Ағбанда иртерлерӧк. Піске, ойыннарға чахсы чыылызып, «Саяныға» хабас пирерге кирек. Команда марығларда Хакасия ӱчӱн турысча нооза.
Автор :
Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде