Аал чуртир ӱчӱн, аал хониин тилідерге
23.08.2023
Хабарлар
![Аал чуртир ӱчӱн, аал хониин тилідерге Аал чуртир ӱчӱн, аал хониин тилідерге](/upload/iblock/b6c/xuna7o396ph68yd6v5h79xs6md1wr10n.jpg)
Хазна Думазының депутады Владимир Кашин аал хонии рыногында ноңных садысча
Аалҷы. Россияның Хазна Думазының аал хонии сурығларынҷа комитедінің кнезі Владимир Кашин, тоғыс чорығынаң Хакасияда полып, орындағы предприятиелерге, фермаларға паалағ пирген
Владимир Иванович аал хонии наукаларының докторы, профессор, Россияның академия наукаларының академигі, Россияның аал хонии наукалары академиязының кізізі, Россия Федерациязы наукаларының саблығ деятельі паза Россияның саблығ аал хонии тоғынҷызы полча.
Ирткен неделяда Владимир Кашин Хакасия пазы Валентин Коноваловнаң, аал хонии предприятиелері паза кресен-фермер хоныхтары пастарынаң, тоғынҷыларынаң тоғазып, аал хонии сурығларын ӱзӱргеннер.
Валентин Коноваловтың таниинаң, аал хонии паза аалларның тилізі Хакасия ӱлгӱлерінің ӧӧн тоғыстарының пірсі полча. Республика «Аалларның тиксі тилізі» программада араласча. Владимир Кашин ол программа тӧстегҷілерінің пірсі полча паза пістің регионда аны чуртасха кирерге ӧткін полысча.
2017 чылнаң тиңнестірзе, 2023 чылда ааллар хабазиина хорадығлар тӧрт хати ӧс парғаннар. Хыраҷыларға, фермерлерге, аал хониии кооперативтеріне, сад паза дача пірігістеріне хабазығ сині хозылған.
Хакасия пазы Владимир Кашинге хада-пірге тоғынчатхан, хабасчатхан паза пістің республикаа хайығ салчатхан ӱчӱн алғызын читірген.
Пастағы кӱнде Владимир Кашин «Воскресенский» теплица комплексінзер чӧр килген. Ол предприятие тоғынҷыларының тоғызын пӧзік паалаан паза пасха регионнардағы теплица хоныхтарынаңар, мындағ предприятиелерге чарытхы тарифтері тӧбін полчатханнаңар чоохтап пирген.
Ікінҷі кӱнде Хакасияның ӱлгӱ туразында аал хонии предприятиелері паза кресен-фермер хоныхтары пастарынаң тоғазығ ирткен. Аал хониинаң айғасчатханнар Владимир Кашиннең сидіксіністерінең ӱлескеннер – тузаланылбинчатхан чирлерні тузаланысха кирердеңер, аал хонии тоғынҷылары чидіспинчеткеннеңер.
Владимир Кашиннің таниинаң, пӱӱнгі кӱнде тиксі хазнада аал хонии тоғынҷылары чидіспинче, аннаңар чииттер аалларда халар ӱчӱн, чуртаҷаң чахсы оңдайлар тӧстирге кирек. «Аалларның тиксі тилізі» программа полызиинаң андағ оңдайлар тӧстелче. Піcтің регион анда ӧткін аралаcчатхан сылтаанда, аалларда социальнай учреждениелер тиксі тыхталчалар паза пӱдірілчелер. «Аалларның тиксі тилізі» программаҷа проекттерні чуртасха кирерінҷе Хакасия хазнаның иң чахсы пис регионы санында полча.
Ідӧк Владимир Кашин «Саянмолоко» ООО-да пол килген. Предприятие директоры Валерий Левицкий, ағаа экскурсия иртіріп, сӱттең тимнелген ас-тамах сығарызынаң таныстырған. Владимир Иванович мындағ заводха кӧп сӱт киректелче тіп чапсаан. Предприятие тоғынҷыларынаң тоғасханда, оларға алғызын читірген.
– Сірерге сӱттең аймах ас-тамах сығарызынаң айғасчатхан паза хысхаҷах тус аразына улуғ нимес заводтаң амғы тусха килістіре мындағ килкім предприятие тӧстебіскен ӱчӱн алғызым читірчем. Мал ӧскірері паза сӱт сығарызы аал хонии комплексінің фундаменті полча. Ол уғаа аар тоғыс. Аннаңар хазна ағаа хабазарға кирек тіп сағынчам.
Аалда ферма полза, аал чуртир. Cӱт кізее хайди даа кирек, уламох палаларға. Аннаңар піс кічіг класстар ӱгренҷілерін школада тикке азырирынҷа законны алар ӱчӱн кӱрескебіс.
Амғы туста чылда 18 миллион тонна сӱт сығарылча. Совет тузында 56 миллион тонна полған. Ол туста чал ахчазы даа, пенсия даа чахсы тӧлелҷең, паалар даа ниик полҷаңнар, – таныхтаан Владимир Кашин.
«Саянмолоко» ООО-да пол килген соонда Хазна Думазының депутады фермерлер Василий паза Наталья Хисматуллиннернің хоныхтарында полған. Алтай аймаандағы Тустығ кӧл аалдағы Василий Хисматуллин маллар, хойлар ӧскірерінең айғасча, тоңастығлар таарыпча. Пӱӱнгі кӱнге 104 пас мал паза 800 пас хой тутча. Пӱӱл фермер турлағда тоғынҷыларына тура пӱдір пирген. Аның хонии пик паза тиліпчеткен фермаларның санында. Хада хонғаны Наталья ідӧк фермер полча, маллар ӧскірче. Владимир Иванович ферма хоныхтарын пӧзік паалаан.
Орғах айының 19-ҷы кӱнінде Владимир Кашин республиканың аал хонии рыногын кӧріп алған. Рынокта ит, чир тамаа аймаа садылчатханын таныхтаан. Анда ол ноңных паза чеснок садызып алған. Чеснокты дачазында одыртып саларбын теен.
Владимир Кашин Хакасияда аал хонии тиліпчеткенін таныхтаан паза хазна хабазиин кирексіпчеткен сурығлар пӧгеріне мыннаң мындар хабазарға молҷаан.
Сом Алексей Баиновти
Автор :
Оксана Челтыгмашева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде