Алыптар ойыннары
23.08.2023
Хабарлар
![Алыптар ойыннары Алыптар ойыннары](/upload/iblock/681/zn80fzc7y3auoxmwczme1py9gniqtrh1.jpg)
Пётр Мартыненко Атлас тазын кӧдірче
Спорт. Тынағ кӱннерінде Ағбанда кӱс экстримінҷе «Хакас парыс» фестиваль ирткен
Кӱс экстримі Россияда наа спорт кӧріміне саналча. Ол пістің хазнада 2021 чылда ла санға алылған. Аннаң айғасчатханнарны стронгмен тіп адапчалар. Спортсменнер марығ тузында аар пасчатхан тиріглерні – гиряларны, тастарны, покрышкаларны – кӧдірчелер. Хакасия – улуғ нимес республика. Че пістің постарыбыстың стронгменнері пар. Чоннар аразындағы турнирлерде кӧп хати сыйыхтығ орыннарға сыххан Владимир Муравлёв. Пётр Мартыненко, тізең, пылтыр Тилекей кубогында хола призер полыбысхан. Олар арғыстарынаң хада ікінҷі чылы изере Ағбанда кӱс экстримінҷе «Хакас парыс» фестиваль иртірчелер. Ідӧк чоннар аразындағы турнирнің тӧcтегҷілері полчалар Хакасияның правительствозы, республиканың физическай культура паза спорт министерствозы, «Сибирьдегі чӧптезіг» регионнар аразындағы пірігіс паза «Тилекейнің кӱстіг нациязы» алыптар лигазы.
Марығны пайрамни азарында Хакасия пазы Валентин Коновалов араласхан. Валентин Олегович, кӱс экстриміне пӧзік паалағ пиріп, турнир араласчыларына чиңіс тударға алғаан. Пӱӱл арға-мӧрійде Казахстанның, Киргизияның паза Россияның стронгменнері устарын кӧзіткеннер. Тиксі алза, 9 кізі. Марығ пис чардыхтаң пӱткен. Пастап спортсменнер эстафетада кӱстерін cынааннар. Аның оңдайларынҷа араласчылар пір минута аразына соон сӱрістіре ікі штанганы паза ікі тӧгені кӧдірібізерге киректер. Пастағы тиріг 120 кг пасхан полза, халғанҷызы 150 кг кӧдірімніг полған. Иң пурун пас меетке сыххан Дмитрий Скосырский. Омсктың чуртағҷызы прай тиріглерні, ойнаҷахтарны чіли кӧдіріп, чирге тастаан. Аның соонда Мартыненко сыхты. Алып кізі ідӧк дистанцияны сидіксінмин иртібіскен. Чон ікінҷілебіскен: «Тиріглер сынап аар пасчалар ба?» Кізілернің cағыстары харығ пол парған, таң, че cпортсменнердең паза пірдеезі эстафетаны читіре ирт полбаан. Кӧбізінің халғанҷы тирігні кӧдірер кӱзі читпиндір. 140 кг пасчатхан штангаа сыданмаан улус полғанох.
Чоохтирға кирек, кӱс экстримінде пос оңдайлығ инвентарь. «Тӧге» адалчатхан тиріг тимірдең иділген. Андар дисктер хаптырарға чарир. Дисктер чох «тӧге» 35 кг пасча. Аар атлетикада паза пауэрлифтингте штанга грифінің диаметрі 28 мм, пу спорт кӧрімінде ол 51 мм читче. Андағ грифтерні «Аксель» адапчалар.
Ікінҷі марығ пазох эстафета полған. Стронгменнер 150-ер кг пасчатхан ікі «чемоданны» азах меетке читірерге кирек полғаннар, нандыра 100 кг кӧдірімніг «кеганы» ағыл килерге. Дистанцияның тиксі узуны – 40 м. Нинҷе-де ле кізі аны толдыразынаң иртібіскен. Оларның санында Вячеслав Алексеев (Хабаровск), Дмитрий Скосырский паза Пётр Мартыненко. Ідӧк турнир программазынзар 80 кг алай 100 кг пасчатхан гантельні кӧдірері, покрышкаларны айландырары паза Атлас тастарын иңнес (перекладина) азыра тастиры кіргеннер. Атлас тастары оңдайынаң хакастарның хапчаң тазына тӧӧй. Че олар топ-тоғылах полчаттырлар. Андағ тирігні кӧдірерге хай-хай сидік. Спортсменнер пос кӧңнінең 160 кг алай 180 кг пасчатхан тасты таллааннар. Иңнестің пӧзии 143 см тиңнелген. Сизінгенде, халғанҷы марығ сидік парған. Ӱc час аразына пик хуйахтығлар майых парғаннар. Кинеп парарға ӱр нимес. Пір минута аразына 180 кг пасчатхан Атлас тазын Евгений Гавриленко (Саратов) пір хати тастабысхан, Мухаммад-Али Тохтоматов (Киргизия) – ікі хати, Петр Мартыненко – ӱс хати, Дмитрий Скосырский – тӧрт хати.
Кӱс экстримі – хынығ спорт кӧрімі. Пастап кӧрігҷі пос спортсменнері ле ӱчӱн «ағырча». Че марығ тоозылғанҷа сағаа полған на араласчы аарлығ. Мухаммад-Али Тохтоматовха 21 ле час. Хайди ағаа ачынмассың? Прайзын ачых-чарых кӧңніліг Егор Сороколетов аптап алған. Спортсмен Керчь городтаң, «Хакас парыс» турнирде ікінҷізін араласты. Чыған саннар хоостыра Дмитрий Скосырский чиңіс тутхан, Петр Мартыненконың кӱмӱс медаль. Ӱзінҷізі Евгений Гавриленко полыбысхан. Турнир араласчыларынаң пу иң саблығ спортсмен полтыр. 37 частығ Гавриленко – тилекей чемпионадының кӱмӱс призеры. Аның пасха даа чидіглер пар. Кӧрігҷілерге марығ пір тыныснаң ирткен тиирге чарир. Спортсменнер чыл сай Ағбанда турнирге чыылызарға пӧгінчелер.
Сом Валерия Тамбовцевани
Автор :
Майя Кильчичакова
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде