Хазна хырығларын хадарарға пӱткен аал
23.08.2023
Хабарлар
![Хазна хырығларын хадарарға пӱткен аал Хазна хырығларын хадарарға пӱткен аал](/upload/iblock/2b6/yiu9zr8u099rlqzdipwg9lzeznqu4t6l.jpg)
Хакасия Ӧӧркі Чӧбінің кнезі Владимир Штыгашев кӧп чыл ӱгретчі полып тоғын салған Ольга Токмашоваа Аарластығ пічік читірче
Пайрам. Ирткен субботада Таштып аймаандағы Арбыт аал 255 чылын таныхтады. Ол Таштып аалнаң тиңе пӱткен
Арбыт 1768 чылда тӧстелген. Россия хырығлары хыринда хыдаттарның чааҷы отрядтары чыыл сыхханда, Буринскай чӧптезіг тобыра хыдаттар ӱстӱнзархы Сибирь чирлерін постарының хазналарына хозыбызарлар тіп хорғыс полған. Андада чарадығ алылған – Хызылчардағы паза Томсктағы казактарны Сойан сынын паза Хара-Сабын чааҷы чолы хыриндағы чирлерні хадартарға.
Пӱӱнгі кӱнге Арбытта 800-ке чағын кізі саналча. Анда ынағ чуртапчалар аймах чоннар: орыстар, хакастар, армяннар, украиннер, литвалар, немецтер. Аалда пӱӱл наа школа пӱдірии пасталыбысхан, иргі школада спортзал даа чоғыл. Арбытта пӱӱн тоғынчалар – ортымах школа, «Колокольчик» наа олған сады, «Казачья усадьба» музей, почта пӧлии, «Хакасский ЛПХ-2» ООО. 2016 чылда тигіриб пӱдірілген, ол чуртағҷыларның, идінҷек Виталий Чучалиннің, Сипкиннер родының ахчазына кӧдірілген. Ідӧк пӱдіріге позының ахчазын (150 муң салковай) Хакасия Ӧӧркі Чӧбінің депутады Василий Шулбаев хосхан, ӱлӱкӱн тузында Арбыт аал чӧбінің пазы Сергей Чебодаев ағаа алғыстас пічиин читірген.
Ӱлӱкӱнні школаның чирінде иртіргеннер, хыриндағы орамада арбыттағылар пай кӧзідіг тимнеп салтырлар, ол «Казачьи традиции» паза «Кустарные промыслы и ремесла казаков» республика синіндегі фестиваль-марығларға чарыдылған. Орамалар чуртағҷылары паза ӧмелер, татхыннығ чиистер тимнеп, аалҷыларны сыйлааннар. Иң аарлығ аалҷыларны сарыннарнаң удурлааннар. Ӱлӱкӱнге килгеннер: Таштып аймаа пазы Николай Чебодаев, Хакасия Ӧӧркі Чӧбінің кнезі Владимир Штыгашев, депутады Василий Шулбаев, аал хонии министрі Сергей Труфанов, национальнай паза территориальнай политика министрінің пастағы орынҷызы Виталий Кунучаков.
«Хакасияа чахсы киректері ӱчӱн» орденнең Ольга Киргинекова сыйыхтатхан. Ольга Петровна Арбыттағы ағас хонии ӧмезі устағҷызының орынҷызы полып кӧп чыл тоғын парир, аалдағылар аны ӧткін хылии ӱчӱн улуғлапчалар. 2018 чылда аны «Хакасияның істеніс сабланызы» медальнаң таныхтааннар. Ӱлӱкӱнде читі кізі Хакасия пазының алғыстазынаң сыйыхтатхан – Валентина Торокова, Наталья Липина, Виктор Эрбес, Сергей Чебодаев, Надежда Тюкпиекова, Ирина Соловьева, Елена Прибыткова. Ӱс кізі Хакасия правительствозының алғыстас пічіктерін алған – Татьяна Алферова, Елена Митрофанова, Александр Лебедев. Ідӧк Ӧӧркі Чӧптең, аймах паза аал чӧбі устағ-пастаанаң Аарластығ пічіктер илееде полған.
Владимир Штыгашев алғыстас чооғында таныхтаан:
– «Арбыт» хакас тіліне «арығ, чарых орын» чіли тілбестелче, Москвада андағох аттығ ачых пар. Пісті прайзын илбек орыс тілі піріктірче... Мыннаң 500 азыра кізі Илбек Ада чаада чат халған, арбыттағылар матыр хылыхтығлар, хас-хаҷаннаң олар, сӧбірелерін азырап, пу чирні тиліткеннер. Совет тузында мында герефорд тӧлліг малларны ӧскірҷең завод тоғынҷаң, пуғдай, тамах, сула салҷаңнар, ағас хониинда улуғ чидіглер полҷаң. Амғы туста Арбыт аал чӧбінде наа тоғыс орыннарын азарға, аал хониин тилідерге кирек, андағ оңдай хайди даа табылар. Пос чиріне пик тудынчатхан, иптіг чуртапчатхан ӱчӱн сірерге поғдархапчабыс.
Ӱлӱкӱнде спорт марығлары иртірілген, олғаннарға аймах ӱтертістер полған. Иирде чуртағҷыларны салют паза дискотека сағаан.
Сом авторни
Автор :
Тарина Бутонаева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде