Аймах нациялығ чоныбысты піріктірче
25.08.2023
Хабарлар
![Аймах нациялығ чоныбысты піріктірче Аймах нациялығ чоныбысты піріктірче](/upload/iblock/f1c/ceonurf6bi2p44n4gq6w7aptmlypybxx.jpg)
Л.Р.Кызласовтың адынаң чир-суғ ӱгренҷең музей алнында
Ӱлӱкӱн. Орғах айының 22-ҷі кӱнінде Л.Р.Кызласовтың адынаң чир-суғ ӱгренҷең музей алнындағы ачыхта Россияның Хазна флагы кӱніне чарыдылған мероприятие ирткен
Ол кӱн тиксі хазнада Флаг кӱні таныхталча. Россия флагы – ол пістің пайыбыс паза хазна тании. Ол кӱн хазнабыс чуртағҷыларын піріктірче, оларның кӧңнін кӧдірче, ирткен, амғы паза полар тустың киречізі полча.
Пастағызын на ах-кӧк-хызыл ӧңніг флаг 1667 чылда суға позыдылған пастағы чаа корабльында кӧдірілген. РСФСР-ның Ӧӧркі Чӧп сессиязында 1991 чылда орғах айының 22-ҷі кӱнінде ӱс ӧңніг флаг хазна тании полча тіп санирдаңар чарадығ алылғаны хоостыра Россия президенті ол кӱнні Россияның Хазна флагы кӱні чіли календарьзар кирердеңер чарадығ алыбысхан.
Чыл сай Хазна флагы кӱнінде Хакасияда аймах мероприятиелер иртчелер, пӱӱл ол ідӧк таныхталған. Ағбанда Л.Р.Кызласовтың адынаң чир-суғ ӱгренҷең музей ачығындағы танығлығ мероприятиеде Хакасия пазы Валентин Коновалов, республиканың культура министрі Светлана Окольникова паза халых организацияларының кізілері, юнармеецтер паза хазнабыстың чир-сууна хынчатхан чуртағҷылары араласханнар. Хакасия пазы чыылған чонзар айланған. Аның чооғынаң, пӱӱн Россияның Хазна флагы кӱнін ідӧк Донецк паза Луганск Чон республикаларының, Запорожье паза Херсон областьтарының чуртағҷылары пайрамнапчалар. Россияа піріккені постарын хаҷан даа россияниннерге санаан кізілерге таңдағы кӱнге киртініс пирче, піс хада кӱстіг полчатханын таныхтапча.
– Россия флагы, хазна тании полып, тархынның илбек киректерін ундирға пирбинче. Аннаң хада пістің чааҷылар Украинада илбек хазнабыс пос алынҷа полар ӱчӱн турысчалар, – теен Валентин Коновалов. – Флаг кӧп нациялығ, пай тархыннығ чоныбысты піріктірзін! Пістің илбек чир-суубысха амыр чуртас паза ӧңненіс алғапчам, чуртағҷыларға – пик хазых, часкалығ чуртас паза таңдағызына киртініс!
Мероприятиее килгеннерге чапсых концерт кӧзіділген. «Ынархас» ӧменің араласчылары «Піс – Россия» теелбек салғаннар. Ідӧк Ирина Кулагашева ырлаан.
Анаң пістің республика чуртағҷыларынзар Луганск Чон Республиказының Свердловск, Червонопартизанск городтарының паза Свердловск аймааның чуртағҷылары видео пастыра айланғаннар. Олар Хакасияны полызығ пирчеткен ӱчӱн алғыстааннар паза, хада-пірге тудынып, чиңіс тударына паза истіг, амыр чуртас поларына ізеністерін читіргеннер.
Хакасияның культура министерствозы Червонопартизанск городтағы олған искусство школазына паза В.И.Лениннің адынаң культура ӧргезіне амғы тусха киліcтіре оборудование паза техника сыйлапчалар. Пу чағында ол ниме-ноо Луганск Чон Республиказындағы Червонопартизанск городсар ызылар. Сидік тее тус полза, чуртағҷылар чайаачыларын тилітчелер. Оларның культура учреждениелерінің чайаачы тоғыстары тохтадылбин апарыларына хабазығ иділче.
Ӱлӱкӱнге чыылысхан чуртағҷылар аразында тынағдағы Любовь Марткеева полған. Ол кӧңнінең ӱлескен:
– Мин чир-суума поғдархапчам. Мындағ ӱлӱкӱннерге хайығ салылчатханы ӧріндірче. Чир-суубысха хыныстаңар паза поғдархастаңар мероприятиелерні удаа иртірерге кирек тіп сағынчам. Амғы чииттернің чир-сууна хыныстарын тыыдарға, улуғларны улуғлирға паза кічіглерге айирға ӱгредерге кирек.
Кӱннің Культура паза тынағ паркынзар музей хыринҷа чӧрчем. Андар арығ киинең тынарға паза суғ хыринҷа пас чӧрерге парчам. Мында кӧглер ойнапчатханда, сала маңзыри пеер килгем. Чапсых концерт кӧріп алдым, кӧңнім дее чалахай пол парды. Хазнабыстың чуртағҷыларын ӱлӱкӱннең алғыстапчам.
Сом Дмитрий Сунчугашевти
Автор :
Наталья Тюкпеева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде