Тилекейге саблығ маэстроның холында
25.08.2023
Хабарлар
Концерт тузында фортепиано кистінде концертмейстер Татьяна Гилюк
Концерт. В.Г.Чаптыковтың адынаң Хакас филармониязында «Осень в Саянах-2023» тиксі Россиядағы чайаачы олғаннар школазының піріктірілген хорының чайаачы иирі ирткен
Аның алнында неделя тооза Хакасияның, Хызылчар паза Алтай крайларының, Кемеров паза Иркутск областьтарының олған искусство школаларының, сарын паза хор студияларының, олған филармонияларының ӱгренҷілері паза ӱгретчілері (тиксі 80 кізі) «Хоровое академическое пение» кӧстегҷе наа пілістер алғаннар. Олғаннарны ӱгреткен Сергей Викторович Екимов. Ол – Россия композиторлары пірігізінің кізізі, «Поющий мир» чоннар аразындағы хор искусствозы фестивальының арт-директоры, Н.А.Римский-Корсаковтың адынаң музыка училищезінің хоос устағҷызы паза ипчілер хорының дирижёры, Санкт-Петербургтағы хазна культура институдының концерт хорының паза Санкт-Петербургтағох консерватория хорының устағҷызы.
Сергей Екимов оркестрлерге, ансамбльларға паза спектакльларға, фортепианонаң ойнапчатхан паза хорда сарнапчатхан олғаннарға кӧглер пасча. Аның произведениелерін Россияның прай пулуңнарында паза хырығ озаринда толдырчалар. Кӧп тоғызы хазнабыстың ӧӧн хорларының репертуарына кірче. Оларны радиоҷа ойнатчалар паза телевидениеде кӧзітчелер. Сергей Викторович хорлар паза композиторлар фестивальларында паза марығларында сыбыра жюри кнезі полча.
Пӱӱнгі кӱнде Сергей Екимов улуғласнаң тузаланчатхан кӧгҷі полча. Ол Россиядағы паза хырығ озариндағы хорларнаң тоғынча. Аның ӧмелері кӱстіг концерттер кӧзітчелер.
Хакас филармониязындағы концерт пасталар алнында Хакасияның культура министрі Светлана Окольникова прайзын алғыстаан:
– «Осень в Саянах» чайаачы олғаннар школазы 23 чыл тоғын парир. Пӱӱл ол ідӧк Хакасияның культура министерствозы, Республикадағы методика кіні паза Хакас филармониязы хабазиинаң ӧткін тоғынды. Аның салтарларын пӱӱнгі чайаачы иирде кӧріп аларбыс. Чыылған ахча Луганск Чон Республиказының Червонопартизанскай олған искусство школазына ызылар.
Светлана Анатольевна хазнаның саблығ дирижёры Сергей Екимовты, ол Хакасиязар киліп, олғаннарнаң тоғынған ӱчӱн алғыстаан. Ідӧк министр Сибирьдегі искусство школаларының, олған филармонияларының ӱгретчілеріне чылығ сӧстер читірген.
– Мин Хакасияда ікінҷі хати полдым. Мындағ чахсы ӧменең тоғынып, кӧңнім саңай толды, – теен Сергей Викторович.
Чайаачы иирні «Осень в Саянах» школаның хоры Георгий Свиридовтың «О, Родина, счастливый и неисходный час» кӧӧнең асхан, сӧстері – Сергей Есенинни. Амғы оой нимес туста Чир-суубыстаңар кӧп чоохтанарға паза сарнирға кирек теен хор устағҷызы Сергей Екимов.
Анаң олғаннар режиссёр К.Бромбергтің саблығ «Приключение Электроника» фильмінің «Крылатые качели» сарынын толдырғаннар. Пу сарынның кӧӧн композитор Евгений Крылатов чайаан. Ол кӧп совет киноларына чахсы сарыннар пас салған. Таныс ырны ис салып, филармонияның кӧрігҷілер залында одырчатхан аалҷылар хорнаң хада сарнааннар.
Сергей Викторовичтің чооғынаң, чыл сай 9 Майда ол аймах хор ӧмелерінең хада, Санкт-Петербургтың филармония сценазынзар сығып, чаа чылларына чарыдылған сарыннарны толдырчалар. Амғы концертте аның устаанынаң піріктірілген хор Чир-сууна хынысты кӧзітчеткен сарыннар ырлаан. Залдағы кӧрігҷілер К.Молчановтың «Вот солдаты идут», В.Плешактың «Мама моя, мама», Я.Дубравиннің «Россия Россией останется», М.Блантернің «Катюша» кееркестіг сарыннарын истіп алғаннар.
Концерт пір час чарым парған. Cіліг паза амыр сарыннар истіп алған соонаң прайзы чахсы кӧңніліг тарасхан.
Сом Дмитрий Сунчугашевти
Автор :
Татьяна Тютюбеева
| Пн | Вт | Ср | Чт | Пт | Сб | Вс |
| 30 | 31 | 1 | 2 | 3 | 4 | 5 |
| 6 | 7 | 8 | 9 | 10 | 11 | 12 |
| 13 | 14 | 15 | 16 | 17 | 18 | 19 |
| 20 | 21 | 22 | 23 | 24 | 25 | 26 |
| 27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде
