Депутаттарнаң тоғазығлар
30.08.2023
Хабарлар
![Депутаттарнаң тоғазығлар Депутаттарнаң тоғазығлар](/upload/iblock/218/abuxd5bs1ac3mgjn656bn1p5du61i5df.jpg)
Валентин Коноваловнаң Николай Арефьев
Аалҷылар. Хакасиязар тоғыс хоостыра Хазна Думазының депутаттары килгеннер
Хакасия хазна программаларында ӧткін араласча
28 августта республика пазы Валентин Коновалов политик, хазна паза халыхтар деятельі, Хазна Думазының пис хығыртығ (ІІ,ІІІ, VІ – VІІІ) депутады Николай Арефьевнең тоғасхан. Николай Васильевич Хазна Думазының экономика политиказынҷа комитеді кнезінің пастағы орынҷызы полча.
Тоғазығ тузында регион устағҷызы Валентин Коновалов ол устапчатхан правительство пис чыл аразына регионның бюджет парыстарын 2,5 хати ӧскірібіскенін, хазна алымының коммерческай чардығын прай даа чох идібіскенін, ағаа хорадығларны 6,5 хати хызырыбысханын таныхтаан.
Хакасия ікінҷі чылы изере хазнаның ізестіг тиліпчеткен 35 регион санына кірче. 2017 чылдаң пасти ВРП 1,6 хати ӧс парған. Производстволар индексінҷе Хакасия Сибирьде 2-ҷі орында полча, Россияда – 13-ҷі орында. Кічіг паза ортын предприятиелер, идінҷектер саны ӧсче: халғанҷы ікі чылға олар 600-ке кӧп пол парғаннар, муңарлап тоғыс орны тӧстелген.
Регион правительствозы хазна программаларында аралазарын ӧскірче. Пис чыл аразына ол кӧстеглерге федеральнай ахчаны кирері тӧрт хати ӧскірілген. Нацпроекттер хоостыра чоллар, социальнай объекттер пӱдірілче паза тыхталча, туралар хыри, парктар паза скверлер иптелче. Хакасияда нацпроекттернің толдырылған сині – 95 %-че. Анзы Сибирьдегі паза тиксі Россиядағы синнең пӧзік.
Хакасия пазы Николай Арефьевке республикаа хайығ салчатхан, регионның пастағларын федеральнай синде тибіредеріне хабасчатхан ӱчӱн алғызын читірген.
Хазна Думазының экономика политиказынҷа комитеді кнезінің пастағы орынҷызы республикаа федеральнай хабазығ кирексіпчеткен сурығларны пӧгерінде полыс турарын узарадарға молҷаан.
Депутат тоғыс чорығы тузында республиканың предприятиелерінде паза пірігістерінде пол килерге пӧгінче. Ідӧк тоғысчы ӧмелернең паза халыхтар кізілерінең тоғазығлар иртері кӧріл парған.
Николай Арефьев закон сығарҷаң, федеральнай законнарзар тӱзедіглер кирҷең чӱзерлеп пастағның авторы паза соавторы полча. Кӧзідімге, ол приватизациядаңар законны тимнирінде араласхан. Пу законҷа ол тоғыс Федеральнай Чыылығ чарадыға алчатхан программа хоостыра апарыл сыххан. Салтарында приватизация тузындағы законны сайбапчатхан удаа тоғасчатхан оңдайлар тохтадылған.
Паза Николай Арефьев «Политика партияларынаңар», «Банкротстводаңар», «Лицензия пирердеңер» законнарзар, Чурт паза Налог кодекстерінзер тӱзедіглер кирген.
Чахсы тоғызы ӱчӱн, Россия президентінің паза Россия правительствозының алғыстас пічиинең таныхталған.
Социальнай сфераа – улуғ хайығ
Хакасия пазы Валентин Коновалов Хазна Думазының депутады Нина Останинанаң тоғазығ иртірген. Россияның саблығ политигі паза халых деятельі пу кӱннерде пазох пістің республиказар тоғысчы чорығынаң килген.
Нина Александровна Хазна Думазында сӧбіре, ипчілер паза палалар сурығларынҷа комитетнең устапча. Ідӧк ол «Россияның ізенізі» тиксі Россиядағы ипчілер пірігізінің лидері полча.
Нина Останина – социология наукаларының кандидады. Хазна Думазынзар пис хығыртығ (ІІ – V паза VІІІ) тустарына табылған. Позының закон сығарҷаң паза халыхтар тоғызында улуғ хайығны ипчілернің, іҷелернің паза палаларның праволарын арачылирына салча. Ол 50 азыра закон проектінің авторы паза соавторы полча, ол санда «Чиит сӧбірее чурт», «Кӧп палалығ сӧбірелерге хазна хабазиинаңар», «Чиит сӧбірелерге чурт политиказы сферазында хазна хабазиинаңар» закон проекттерінің.
Тоғазығ тузында Валентин Коновалов Хакасия правительствозы социальнай сфераны тилідеріне улуғ хайығ салчатханын алынҷа таныхтаан. Кізінің чахсы чуртазы – стратегияның пис ӧӧн кӧстеенің пірсі. Республиканың 2023 чылға бюджедінің улуғ чардығы кибірли социальнай сфераа кӧстелген, ол 31,2 миллиард салковай – бюджеттің прай хорадығларының 70 %-інҷе.
2017 чылдаң Хакасия правительствозы социальнай хабазыға, ол санда палаларны ӧcкіреріне турыстығ оңдайлар тӧстиріне паза кӧп палалығ сӧбірелерге полызарына, хорадығларны 2,5 хати ӧскірібіскен.
Пӱӱл регион синінде улуғ частығларға социальнай хабазығ пирҷең кӧп наа оңдайлар кирілген.
Алынҷа хайығ ӧкіс палаларға чурт пирҷең тоғысха салылча. Хакасия правительствозы ол кӧстеглерге хорадығларны план хоостыра тӧреміл ӧскірче: 2018 чылдаң пасти олар тӧрт хати ӧс парғаннар.
– Че федеральнай кіннің хабазии чох ол сурығны толдыразынаң пӧк полбас, – таныхтаан Хакасия пазы.
Нина Останина Хакасияда удаа ааллапча. Регион устағҷызы Нина Александровнаа республикаа хабасчатхан паза хайығ салчатхан ӱчӱн алғызын читірген паза улам тӱзімніг тоғыс алғаан.
Нина Останинаның региондағы тоғыс программазы алғым. Ол республиканың хайзы социальнай учреждениелерінзер пар килер, Халыхтар палатазы араласчыларынаң паза халых пірігістерінің ипчі-устағҷыларынаң тоғазар тіп кӧрілче.
Аал хонии чирлері тузаланысха айландырылча
Хакасиязар Хазна Думазының собственность сурығларынҷа, чир паза ис-пай хайызығларынҷа комитедінің кнес орынҷызы, аал хонии наукаларының докторы Алексей Корниенко ааллап килген.
Алексей Викторович Хазна Думазынзар тӧрт хығыртығ (V – VІІІ) тустарына табылған, 200 артиинаң закон сығарҷаң пастағларның, тӱзедіглернің авторы паза соавторы полча. Россия правительствозының алғыстас пічиинең таныхтатхан.
Понедельникте регион пазы Валентин Коновалов аннаң тоғазығ иртірген. Анда ӧӧн хайығ чир паза ис-пай сурығларына салылған.
Хакасия правительствозы саринаң хазна ис-пайынаң тузаланарын тӱзімніг идерінҷе планнығ тоғыс апарылча. Ол тоғыс бюджетті ӧскірерінде чахсы салтарлар пирче: хазна ис-пайынаң тузаланғанынаң бюджетсер кірген ахча сині, 2022 чылны 2018 чылнаң тиңнестірзе, ікі хати ӧс парған. Олох тусха республика бюджеді 150 миллион салковай ӱзӱрлеп алған, нинҷе-де ведомствоны арендазы сала тӧбін полчатхан алай республика собственнозында полған тураларзар кӧзіріп.
Улуғ тоғыс аал хонии чирлерін тузаланысха айландырарынҷа апарылча – Хакасия правительствозы 2019 чылдаң пасти ол тоғысты сыныхтағда тутча. Анзынаң республикадағы аал хонииның тилізі, орындағы бюджеттерзер ахча кірері, ӧрттерні тохтадары кӧнізінең палғалыстығ. Чылда ортымахти 10 муңҷа гектар андағ чир тузаланысха кирілче. Хакасия правительствозы муниципалитеттернің пу кӧстегҷе тоғызына субсидиялар пирче.
Алексей Корниенко Хакасия правительствозынаң ӧткін тоғынча, федеральнай хабазығ кирексіпчеткен сурығларны пӧгерінде полысча. Валентин Коновалов регионның пастағларына хабасчатхан ӱчӱн депутатха алғызын читірген паза республикада тӱзімніг тоғыныбызарға алғаан.
Алексей Викторович чир паза ис-пай хайызығларынҷа нинҷе-де чыылығ иртірерге пӧгінче. Оларда муниципальнай пӱдіcтернің специалисттері, депутаттар, аал-город пастары паза халых пірігістерінің кізілері аралазарлар. Депутат тоғыс чорығы тузында ідӧк хайзы предприятиелерде пол килер паза халыхтар кізілерінең тоғазар тіп кӧрілче.
Сом Хакасия пазы пресс-службазыни
Автор :
Хакасия пазының паза Хакасия правительствозының пресс-службазы
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде