Сайбағҷы табылған
30.08.2023
Хабарлар
![Сайбағҷы табылған Сайбағҷы табылған](/upload/iblock/1a3/o7pysvjshhwv7v6uyy11h42p73s26r1r.png)
Табығлар-2023. Ағбанда сосханаң провокация иткен кізі ілезіне сығарылған паза хатығлатхан
Орғах айының 18-ҷі кӱнінде кем-де Ағбанның орамаларынзар тіріг сосханы позыдыбысхан. Аның оң cаринда Хызыл Знамяның паза СССР гербінің тании – орғах паза масха хоосталых полған, сол саринда пазылған: «Сосхалар ӱр чуртапчатханы ӧсче».
Мындағ видео чуртағҷыларны ӧкпелендірген. Республика чуртағҷыларын ол туста пілдістіг полбаан политика кӱстерінің табығлар алнындағы мындағ чӧрімі тың ӧкпелендірген. Хайди кізілер чоохтааннар, олар пыролығларны ілезіне сығарар істезіг постары апарарға тимделер. Кӧбізіне орғах паза масха – ызых танығлар, Рейхстаг ӱстӱнде кӧдірілген знамяда ол танығлар полған нооза. Политика ноо сарин даа алчатса, Чиңіc таниин піди тӧбін тӱзіргені – иң чабал ниме.
«Хакасия» хабарлар агентствозы искіриинең, пастағызын сосхалығ чӧрімні толдырған Таштып аймааның Попов фамилиялығ чуртағҷызы тутырған. Ол, сосханы позытчадып, камераларға кір парған. Пастағы сурастырығда Попов чахығ пирген кізіні адабысхан. Ол Михаил Биюн полтыр, Запорожье облазында тӧреен, ам Саратовта чуртапча, политолог паза пиарщик. Ахча тоғынып алар сағыс тудып, Биюн табығ кампаниязы парчатхан Хакасиязар килген осхас.
Поповтың чооғынаң, сосхалығ чӧрім алнында ағаа, ЛДПР-ҷа пір партия кізізі полчатхан оңдайнаң, Биюн сығдыратхан. Ол газельканаң полыс пирерге сурынған, Попов хабас пирген.
Биюнны, Хакасиядаң тизіп, Саратовта полғанда, тудып алғаннар. Позын ол хазна флагын аарлапчатхан кізее санапча. Пасхаҷыл даа, андағ кізі хазна таниин піди тӧбін тӱзіргені. Орғахтығ паза масхалығ знамя ӱчӱн миллионнар кізі чуртазын пир салған нооза.
Чарғыда Михаил Биюн пырозын позына алынған, алығ хаалағ ит салғам тіп чоохтаан. Ағырчатхан іҷезіне сылтанып, позын тың хатығлабасха сурынған.
Салтарында, чӧрімні тимнеп иртірген кізі сайбағ иткенінде пыролыға саналған, чарғы чарадиинҷа Биюнға 20 муң салковайға штраф салылған.
Автор :
Тимнеен Николай Султреков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде