Наа ӱгредіг программазы кирілче
30.08.2023
Хабарлар
![Наа ӱгредіг программазы кирілче Наа ӱгредіг программазы кирілче](/upload/iblock/94f/594vgf927j92inxfn3x6gvzuu4i13xtd.jpg)
Министр орынҷызы Юрий Сагалаков, Индіркі Тӧӧдегі школа директоры Лилия Ултургашева, Асхыстағы «Тирегес» олған садының устағҷызы Ирина Селигеева, Асхыс аймааның ӱгредіг устанызының ӧӧн специализі Дмитрий Чебодаев
Конференция. Ирткен неделяда Асхыста ӱгретчілернің орғах айындағы кибірліг тоғазии ирткен
Асхыс аалдағы Культура туразынзар ӱгретчілер прай аймахтаң чыылыс парғаннар. Ідӧк анда Хакасияның ӱгредіг паза наука министрінің орынҷызы Юрий Сагалаков, Асхыс аймааның устағ-пастаа араласханнар.
Хайди таныхтаан Юрий Сагалаков, пӱӱл Россияның ӱгредіг системазынзар алызығлар киріл парғаннар.
– Ӱртӱн айының пастағы кӱнінең прай хазнада пірге ӱгредіг программазы чуртасха кирілер. Анзы федеральнай хазна стандарттарынзар алызығлар кирілгенінең палғалыстығ полча. Аны хоостыра ӱгретчілер предметтерҷе пірге тоғыс программаларынҷа тоғынарлар. Ӱгренҷілер, тізең, пірге учебниктерҷе ӱгренерлер. Ідӧк ӱртӱн айының пастағы кӱнінең ӱгренҷілерні ӧскірер пірге программа кирілер. Андар чир-сууна хынар кӧстеглер киріл парғаннар. Аны хоостыра школаларда директорның воспитаниеҷе чӧпчізі должность кирілче, олар палаларны орта ӧскірерге полызарлар, – таныхтаан Юрий Гаврилович.
Ідӧк школаларда олғаннарны тоғысха кӧніктірерлер, олар халыхха тузалығ тоғыснаң айғазарлар. Пірге учебниктер тархын, орыс тілі, обществознание предметтерҷе кирілер. Пис чыл аразына прай школалар пірге кинделерге килерге киректер.
Конференция азылғанда, ӱгретчілерге алғыс сӧстері читірілген, олар турыстыра тоғыcтарынаң чир-суубыстың сабланызын ӧскірчелер. Ӱгретчілер постарының сидік тоғызына сын полчалар.
Ідӧк ӱгретчілер конференциязында Россияның просвещение министрі Сергей Кравцовтың айланызы улуғ экранда кӧзіділген. Аның сӧстерінең, прай пӧгіннер пірге толдырылчалар. Ӧменең тоғынып, ӱгредіг системазының тоғынҷылары пӧзік салтарларға читчелер. Пӱӱл Ӱгретчі паза ӱгредіг кӧстегҷізі чылы чарлал парған. Аны хоостыра аймах акциялар иртірілче, оларның пірсінҷе полған на кізее ӱгретчілерге алғыс читірер оңдай пар.
Пӱӱнгі кӱнде чииттер ідӧк ӱгретчі профессиязын таллапчалар. Педагогика вузтарынзар 355 муң сурыныс пічии кірген. Аны тоосханнар, школаларзар айланып, Ада чир-суубыстың ӱгредіг системазының кибірлерін узарадарлар.
Анаң ӱгретчілерні алғыстирға Асхыс аймаа пазы Абрек Челтыгмашев сыххан. Аның чооғынаң, Асхыс чирінде ӱгредіг тилізі аймахтың чуртас-экономика тилізінің чардығы полча. Аймах бюджедінің улуғ чардығы ӱгредіге позыдылча. Мында 22 школа, 17 олған сады паза хоза ӱгредіг учреждениезі саналча. Аймах устағ-пастааның пӧгіні – прай учреждениелерні истіг тоғысха тимнеп салары. Пӱӱл ол кирекке тиксі 47 миллион артиинаң салковай позыдылған.
– Полған на ӱгретчінің пӧгіні – палаларыбыстың таңдағы кӱні пар полар ӱчӱн тоғынары. Мин Асхыс аймааның ӱгретчілеріне хаҷан даа поғдархапчам, – таныхтаан Абрек Васильевич.
Юрий Сагалаков, ӱгретчілерні алғыстап, чоохтаан:
– Пӱӱн хазнабыс амыр чуртазын арачылапчатханда, чир-суубысха хынары, сӧбіре пастағы орында турчалар. Ол сылтағнаң ӱгретчі тоғызына аарлас ӧсче. Президенттің чахии хоостыра палаларны ӧскірерінҷе педагогтарның тоғызы алғыдылған. Олар палаларны чир-сууна хынарға, тоғысха нандырығлығ хайарға ӱгредерлер. Ідӧк школада ӱгренҷілерге профориентацияҷа тоғыс апарылар. Ӱгредіг системазының тилізі Хакасия правительствозының хайиинда сыбыра турча. Іди ӱгретчілерге пір хати ахчалығ тӧлеглер пирілче, ідӧк чал ахчазы ӱртӱн айынаң хозыл парар. Чиит ӱгретчілерге чурт алылча, Асхыс аймаана ол пӧгінге 6 миллион артиинаң салковай позыдылған. Ідӧк аймахта сигіс школаның спортзалы нааҷылалған. Аннаң пасха, школаларда спорт клубтары тӧстелген. Хакасияның ӱгредіг паза спорт министерстволары школалар аразында спорт лигазын иртірчелер, Асхыс аймаа иң пастағыларның санында турча. Халғанҷы чылларда мындағы 13 школада «Ӧзіс орны» проект хоостыра кіннер тӧстел парған. 2024 чылда ол проектке хоза 10 школа кирілер.
Асхыс аймаа пазының пастағы орынҷызы Евгений Костяков ӱгредіг киреенде хайдағ федеральнай проекттер толдырылчатханнаңар чоохтап пирген.
Пайрамнығ мероприятиеде кӧп ӱгретчее паза олған садының воспитательіне алғыстас пічіктері читірілген. Наа ӱгредіг чылы ӱгретчілерге наа чидіглер, ӱгренҷілерге наа пілістер ағылзын.
Сом Анатолий Ковригинни
Автор :
Антон Чертыков
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде