Туристтерге истіг оңдайлар тимнелер
01.09.2023
Хабарлар
![Туристтерге истіг оңдайлар тимнелер Туристтерге истіг оңдайлар тимнелер](/upload/iblock/417/30awik2vh91w0xn9k34teqyrmfrcrb1m.jpg)
Ольга Петровна Доможакова
Чидіг. Ольга Доможакова «Аран Чула» халых организациязының паза «Сафьянов» ТОС-тың кнезі полча. Ӱр ниместе ол, гранттар мариинда аралазып, чиңісчілер санында полыбысхан
«Аран Чула» нинҷе-де чыл мының алнында тӧстелген. Аның араласчылары грант ахчазына ӱртӱн айының 2-ҷі кӱнінде Асхыс аймаандағы Индіркі Тӧӧ аалда чииттернің «Тэнгри Эль» этнофестивальын иртірерге пӧгінчелер. Мындағ пайрам Хакасияда пастағызын на иртер. Сағам улуғ тимнегліг тоғыстар апарылча. Пу фестиваль кӧс чӧрчеткен полар, килчеткен чылда ол пасха аймахта паза аалда иртірілер.
Андар ӧнетін Хызылчардағы ди-джейлер хығыртылғаннар. Олар постарының кӱстіг аппаратураларынаң килерлер. Чағдапчатхан чылларда орындағы ди-джейлер паза республиканың чайаачы чииттері анда устарын кӧзідерлер.
«Сафьянов» халыхтарның орындағы пос устанызы «Хан Куль» чонның хазиин пиктир программаны чуртасха кирче. Грант ахчазына Ольга Доможакова аны аннаң андар алғыдарға пӧгінче.
«Аран Чула» паза «Сафьянов» пірігістерге 500-ер муң салковай пирілер.
– Гранттар улуғ нимес халых организацияларына сағынған сағыстарын толдырып аларға чахсы оңдай пирче. Ағаа хоза, олар пістің тоғынар кӧңнібісті кӧдірчелер,–таныхтаан чооғында Ольга Доможакова.
Грант мариинда ідӧк пос киреенең айғасчатханнар чиңісчі полыбысханнар. Елена Владимировна Минчак 2010 чылдаң шоколад конфеттерін сығарарынаң айғасча. Аның товары Хакасияда тарадылча паза маркетплейстер пастыра пасха регионнарзар ызылча. Халғанҷы ікі чылда садығ чахсы парчатханда, 200 азыра квадрат метрде тоғынарға тарғынҷах полыбысхан.
– Піс хаҷанох хоза цех пӱдірерге сағынғабыс, чирібіс тее пар, че производстводаң 8 – 10 миллион салковай сығарып аларға оой ла нимес. Аннаңар піс грант мариинда араласхабыс. Утып алған ахчаа, кӧмес постин хозып, наа чылға теере наа цех пӱдіріп аларбыс. Андада тиліс чолы ниик парар паза позыбыссар туристтерні хығырарға уйадыстығ полбас. Экскурсиялар, мастер-класстар иртір турарбыс, кӧзідіглерде аралазарбыс, – ӧрінізін чазырбинча идінҷек.
«Мраморка» экстрим-парк 2019 чылдаң тоғынча. Аның устағ-пастаа регион паза федеральнай синнерде иртчеткен грант марығларында сыбыра араласча. Пирілген ахчаа машиналар турғысчаң орын иптелген паза пӱкӱлее парк нааҷылалған. Че итчең тоғыс ам даа илееде. Пу наада Хакасияның правительствозы иртірген грант мариинда «Мраморка» экстрим-парктың проекті ідӧк чиңісчілер санында полыбысхан. Ахчалығ сыйыхха устағҷы Александр Жигалов визит-кін пӱдірерге пӧгінче. Анзы парктың аалҷыларына паза туристтеріне Хакасияның турист орыннарынаң танызарға оңдай пирер.
Пӱӱл марығда аралазардаңар 12 кӧстегҷе 50-ҷе сурыныс пічии кірген. Грант сині 400 муң – 7,5 миллион салковай полған.
– Туризм Хакасия правительствозының ӧӧн кӧстеглерінің пірсі полча. 2017 чылнаң тиңнестірзе, піс аның тилізіне ахчаны 30 хати кӧдірібіскебіс. 9,4 миллион салковайдаң 274,6 миллион cалковайға теере. Туризмнең айғасчатхан идінҷектернің саны даа хозыл парған. Амды пу сферада 1200 идінҷек істенче. Хабазығның салтарын ӱр сахтирға киліспеен – ирткен чылда пістің регионда пір миллион азыра турист пол парыбысхан! Ол син аалҷы республиказар хаҷан даа килбеен полар.
Ідӧк піс иң артых проекттерні чуртасха кирер ӱчӱн грант марығларын иртірчебіс. Пӱӱл ағаа 60 миллион салковай позытхабыс. Аның чардығы республиказар «Туризм и индустрия гостеприимства» нацпроектче читірілген. Хакасия пастағы регион пол парған, хайзы пу кӧстегҷе федеральнай кіннең хабазығ алған, – таныхтаан чооғында Хакасия пазы Валентин Коновалов.
Гранттар хабазиинаң Хакасияда наа турист маршруттары, визит-кіннер паза модульнай комплекстер азылар, турист объекттері, чоллар иптелер, ӧнетін оборудованиелер паза тиріглер алылар паза даа пасхазы. Ӧӧні – ол тынанарға килген чуртағҷыларға паза туристтерге истіг оңдайлар тимнеп пирері.
Сом Дмитрий Сунчугашевти
Автор :
Оксана Сунчугашева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде