Мал-хус имҷілері
01.09.2023
Хабарлар
![Мал-хус имҷілері Мал-хус имҷілері](/upload/iblock/6d1/bw8aynikzgfvudadl1rt4tbp1k25esgw.jpg)
Мал имҷілерінің ӧмезі ынағ тоғынча, ідӧк тынанча
Мал имҷізі кӱніне. Таштыптағы ветстанциянаң 2011 чылдаң сығара Галина Сазанакова устап парир. Ол ӧме тоғызынаңар, специалисттерінеңер чоохтап пирген
– Пістің ӧмеде прай 37 тоғынҷы саналча, станциязар 8 участок кірче, Абазадағылар хада. Хакасияда пістің не аймахта прай участоктарда мал имҷілерінің модульлары, тоғынҷаң орыннары пар. Иң кӧп мал Ибігдегі ветучастокта санға алылча, аннаңар тӧрт кізі тоғынча. Кӧп чыл анда істен парирлар Валентина Терентьевна Шулбаева, Николай Михайлович Харитонов.
2021 чылда Ӧлең чазыда наа модуль турғызылған. Санитар полып анда илееде чыл істенче Ольга Петровна Канзычакова, фельдшер полып – Людмила Алексеевна Камалова, Пётр Сергеевич Канзычаков устағҷы полча, аның тоғыс стажы – 44 чыл!
Ӱр ниместе Пии аймаанда республика синінде иртірілген «Ветеринария – наше призвание» марығда 3-ҷі орын алып алғабыс. Пастағы чардыхта піс, ветстанцияның тархынын чарыдып, стенд тимнеебіс – иргі сомнарны тілеп, кем хайдағ чылда устағҷы полған паза пасха даа хынығ нимелер таап алғабыс. Ікінҷі чардыхта 2 специалист Ағбанзар теория саринаң пілістерін сыныхтирға чӧрген, ӱзінҷі чардыхта ветстанцияның 2022 чылдағы тоғыс салтарларын кӧргеннер, тӧртінҷізінде – спорт эстафетазында араласхабыс. Орта чоохтаза, эстафетада прай ӧме араласпинча, че піс прайзы хада парчабыс, араласчыларыбыс ӱчӱн «ағырарға» паза чир-чайаанда тынанып аларға. Андағ оңдайнаң піс Мал имҷізі кӱнін кӧмес азынада таныхтабысчабыс. Ол марығ республикада 2014 чылдаң сығара иртірілче, андада піс, иң пастағылары полып, Лада Гранта автомобиль утып алғабыс, аны мал имҷізі Мария Ивановна Байкаловаа пиргеннер.
Пӱӱлгі марығ соонаң тӧрт номинацияҷа пістің мал имҷілерібіс пӧзік паалағ алғаннар: «Молодой и перспективный» – Светлана Станиславовна Чебочакова, «За верность профессии» – Валентина Кирилловна Шулбаеванаң Пётр Петрович Куюков, «Лучший из лучших» – Пётр Сергеевич Канзычаков, ағаа аарлығ телефон сыйлап пиргеннер. Пасхалары Аарластығ пічіктернең, ахчанаң сыйыхтатханнар.
Пістің «Позарым» ӧменің капитаны полған чиит специалист Артём Валентинович Захаров, ол Хубайахта тоғынча, уғаа иптіг, маңнаныстығ, чітіг харахтығ мал хирургы, аймах операциялар идерге пілче. 2017 чылда пу аалда тоғынҷаң паза чуртаҷаң пӧліктер кӧріл парған ӧнетін модуль пӱдірілген. Анда кӧп чыл нандырығлығ мал санитары полып Иван Алексеевич Кизимов істен парир.
Любовь Алексеевна Можарова, Павел Юрьевич Чертыгашев, тізең, Таштып аалда операциялар итчелер. Пылтыр піске адайлар ахтирына 45 муң салковай пирілген, ол ахчаа піс 25-че адай льгота хоостыра ахтабысхабыс. Ол льготанаң тынағдағы кізілер, чуға чуртапчатханнар тузаланып алғаннар. Пӱӱл дее, арса, андағ ахча пирілер.
Мадырдағы ветучастокты махтабызарға сағынчам. Аның ӱчӱн мин сағыссырабинчам, анда прай ниме чахсы. Пу аалда 2017 чылда наа модуль пӱдірілген, анда істен парчалар ӧткін ипчі Евгения Викторовна Петрова паза улуғ стажтығ Михаил Алексеевич Блажнов, андар чиит специалисттер чӧптезерге тӧреміл айланчалар.
Арбыттағы ветучастокта кӧп чыл Мария Ивановна Байкалова тоғынча, стажы – 44 чыл! Аннаң хада істенчелер Любовь Владиславовна Чернова, Сергей Петрович Токмашов. Наа модуль оларға 2016 чылда турғыс пиргеннер.
Галина Еремеевна прайзын таныхтирға кӱстенген, хада тоғынчатхан кізілернің хылиин 12 чылға маңат піліп алған полбас па. Устағҷы таныхтаан – полған на модуль хыринда мал имҷілері ибдегі чіли чахайахтар одыртчалар, отты саап салчалар, прай ачыхты арығ тутчалар. Пылтыр позым Ибігдегі ветучастокта полғанда, андағы модульны хайди иптіг тутчалар тіп сизінгем – сіліг чахайахтар, ізік алнында улуғ арығ кибіс...
Мал имҷізінің тоғызы оой нимес, анзын прайзы пілче полар. Малнаң палғалыстығ сидіксіністер хараа-кӱнӧрте дее пол парарға айабас, андада аалдағылар сах андох мал имҷізінзер чӱгӱрчелер. Галина Еремеевна пір ле нимее хомзынча – мал имҷілері аразында чиит специалисттер чидіспинчеткеніне. Ол чоохтапча: «Аңчулда тоғынарға кізі городтаң ӧнетін килген, ағаа 65 час, тынаға парыбысса, кем аның орнына тоғынар? Аңчулдағы школаны 4-5 кізі тоосхан, ікі хызыҷахты мал имҷізіне ӱгренерге ноға-да албааннар. Городтағы чииттер, тізең, ӱгреніп алып, мал имнирлер бе сағынчазар? Ӧлең чазыдағы мал имҷілері ідӧк илееде чыл істен парирлар, алыстырҷаң кізі чоғыл...»
Чоохтазығны тоосчатханда, Галина Сазанакова хада тоғынчатханнарны профессия кӱнінең алғыстабысхан: «Хазых полыңар, ибде прай ниме читкіҷе ползын, пастарың ӱстӱнде хаҷан даа айас, амыр тигір ползын! Кӧңніңерні тӱзірбеңер!»
Сом авторни
Автор :
Тарина Бутонаева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде