Полған на палаа танығлығ кӱн
06.09.2023
Хабарлар
Гимназия ӱгренҷілеріне наа ӱгредіг чылының пастағы саңы сыңыраан
Піліс кӱні. Пӱӱлгі Піліс кӱні Ағбандағы ӱгренҷілернің сағызында ӱрге халар, неке. Чайғының халғанҷы кӱні чалахай кӱніҷектің чараанынаң ӧріндірген полза, 1 сентябрьда школаларда пайрамнығ линейкалар иртер тусха чӱзе наңмыр чаап пастабысхан. Аннаңар школа устағҷыларына оларны иртірер оңдайларны маңзыраста алыстырарға киліскен. Че, андағ даа полза, чир-чайаанның мындағ «сыйии» пастағы саң ӱлӱкӱнінің кӧңнін тӱзірбеен
Н.Ф.Катановтың адынаң национальнай гимназияда ӱгредіг чылы пасталарын алғым таныхтирға тимненчеткеннер. Че наңмыр чаабысхан сылтаанда линейканы спорт залында иртіргеннер. Пайрамнығ чыылығ Россияның паза Хакасияның флагтарын киргенінең, хазна паза республика гимннері толдырылғанынаң пасталған.
Чыылғаннарзар пастағы сӧснең гимназия директорының тоғызын толдырчатхан Лилия Ахпашева айланған. Ол ӱгренҷілерге, ӱгретчілерге наа ӱгредіг чылы хынығ, тузалығ иртсін тіп алғаан. Ідӧк устағҷы ӧріністіг хабарнаң ӱлескен – RAЕХ агентство тимнеен рейтинг хоостыра пӱӱл Н.Ф.Катановтың адынаң Хакас гимназия Хакасия школалары аразында пастағы орында пол парған. Мында школа тоосханнар хазнабыстың иң артых вузтарынзар кіргеннерін санға алчалар. Ідӧк гимназия Россияның иң артых школаларының санына кирілген.
Гимназия ӱгренҷілерін Піліс кӱнінең алғыстирға аарластығ аалҷылар кил парғаннар – Хакасия пазы Валентин Коновалов, Хазна Думазының депутады, Хазна Думазының СНГ киректерінҷе комитедінің кнезі Леонид Калашников, республиканың ӱгредіг паза наука министрі Анатолий Бутенко паза аның пастағы орынҷызы Марина Сагатаева.
Пӱӱл гимназиязар ӱс пизінҷі класс алылған. Кибір хоостыра 11 класстағылар оларға «Пілістер чыындызын» читіргеннер. Ол гимназияның иң кічіг ӱгренҷілеріне ӱгредіг организациязының тархынынаң, кибірлерінең танызарға полызар. Ідӧк пайрамнығ чыылығда Хакасияның олған искусство школазының ӱгренҷілері чайаачы сыйыхтарынаң ӧріндіргеннер.
Анаң олғаннарны парталар кистінзер хығырчатхан наа ӱгредіг чылының пастағы саңы истілген. Аны 11 класстың ӱгренҷізі, гимназияның президенті Руслан Боргояков паза 5 класстағы Валентина Татарова сыңыратханнар. Ӱлӱкӱн гимназияның гимні толдырылғанынаң тоозылған. Ӱгренҷілер класс частарына тарасхлааннар. 5 класстағы олғаннарға, тізең, гимназияҷа экскурсия иртіргеннер, ӱгретчілернең, кабинеттернең таныстырғаннар.
2023 чылның 1 сентябрьы Ағбанның паза пір школазына танығлығ полған – ол 32 № школа. Пу кӱн наа пӱдірілген школа пастағы ӱгренҷілерін удурлаан. Аны «Ӱгредіг» нацпроектче, «Амғы школа» федеральнай программаҷа пӱдіргеннер. Пу кӧстеглерге федеральнай, республика, Ағбан город бюджеттерінең 330 млн салковай хорадылған.
Школанаң Валентина Кызласова устапча. Ӱгретчілер ӧмезінде 30 азыра кізі саналча. Сменада 250 олған ӱгренер тіп кӧрілген школада 600 пала ӱгренер. Оларны пастағы ӱлӱкӱннерінең алғыстирға кил парғаннар Хакасия пазы Валентин Коновалов, Ағбан город пазы Алексей Лёмин.
Ідӧк 1 сентябрьда Харатастағы отрасльлар технологияларының техникумында «Профессионалитет» федеральнай проектче ортын профессиональнай ӱгредігдегі «Педагогика» кӧстегҷе ӱгредіг кластері пайрамни азылған. Мындағ танығлығ кӱннең аның тоғынҷыларын, студенттерін алғыстирға Хакасия пазы Валентин Коновалов кил парған. Ӱгредіг кластері – ол пір чирде орныхчатхан хайдағ-да кӧстегҷе хада-пірге тоғынчатхан ӱгредіг организацияларының ӧмезі. Харатаста ол ӱгретчілерні тимнирінең палғалыстығ ортын профессиональнай заведениелерінің ӧмезі. Пеер ідӧк тоғыс пирчеткеннер кірчелер. Мындағ оңдайнаң кирек пілістіг, тоғынарға парар орнынаң таныс чиит специалисттерні тимнепчелер.
Пӱӱл часхызын Хакасияның ӱлгӱлері полызиинаң Харатастағы отрасльлар технологияларының техникумы Россияның просвещение министерствозы иртірген марығның чиңісчілер санына кір парған паза «Педагогика» кӧстегҷе ӱгредіг кластерін тилідеріне 60,5 млн салковай алған. Ол ахчаа кабинеттер пір кӧрімніг ползыннар тіп тыхтағ тоғыстары иртірілген, амғы тустың кирексіністеріне нандырчатхан оборудование алылған.
Сом Дмитрий Сунчугашевти
Автор :
Татьяна Кыштымова
| Пн | Вт | Ср | Чт | Пт | Сб | Вс |
| 1 | 2 | 3 | 4 | 5 | 6 | 7 |
| 8 | 9 | 10 | 11 | 12 | 13 | 14 |
| 15 | 16 | 17 | 18 | 19 | 20 | 21 |
| 22 | 23 | 24 | 25 | 26 | 27 | 28 |
| 29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде
