Сӧп-сап суриин «Экопарк» пӧгер
06.09.2023
Хабарлар
Правительство чыылиинда
Ӱлгӱ. Киҷее Хакасия пазы Валентин Коновалов республика правительствозының чыылиин иртірген
Чыылығның тоғызы «Экопарк» акционер пірігізін тӧcтирдеңер республика правительствозының чарадиин аларынаң пасталған.
– Ол предприятие сӧп-сапнаң тоғынҷаң инфраструктураны тилідерін позына алып алар, – чарытхан Хакасия пазы Валентин Коновалов.
Хакасияның экология паза чир-чайаан ис-пайы министрі Владимир Лебедев 2019 чылдаң сығара республикада хатығ сӧп-сапнаң (ТКО-наң) тоғынҷаң сферада реформа иртірілчеткенін таныхтаан. Аның искіриинең, ол реформа сидіксіністерге урунған.
– Сидіксіністернің пірсі ТКО-зар кірбинчеткен артхан-халғанын (пӱдірігдегі сӧп-сап, шиналар, септиктердең сығарылған ниме-ноо паза пасхазы) чыыры региондағы операторның обязанностьтарынзар кірбинчеткені. Оларны лицензия чох тоғынчатханнарға пирібісчелер, салтарында чарадығ чох сӧп-сап орыннары тӧстелче, – чоохтаан министр.
«Экопарк» акционер пірігізі республикада сӧп-сапты чыырынаң палғалыстығ тоғысты оңдайлир, инфраструктураны тилідер кӧстегнең тӧстелче. Пірігіcтің акционері Хакасия правительствозы полар. Ол оңдайнаң «Аэросити» компания лицензиязын чідір салза, алай ол компаниянаң тоғынҷаң тус ирт парза, «Экопарк» акционер пірігізі региондағы операторны таллирынҷа марығда аралас полар.
– Акционер пірігізі сӧп-сапты чыыр, чох идер паза ибіркі чирлерні арығлир тоғыстарнаң айғазар тіп кӧрілче, – искірген Владимир Лебедев.
Ідӧк пу акционер пірігізі республикада сӧп-сапнаң тоғынҷаң завод пӱдірерінҷе тоғысты апарар тіп сахталча. Министрлер кабинеді наа акционер пірігізін тӧстирдеңер чарадығны талас чох алыбысхан.
Чыылығның ікінҷі сурии ӱгредіг чылы пасталғанына чарыдылған.
– Ӱгредіг системазы ӱгредіг чылына толдыразынаң тимде, – искірген Хакасияның ӱгредіг паза наука министрі Анатолий Бутенко.
Республика школаларында паза олған садтарында тыхтағ тоғыстары толдырылған. Хайзы муниципалитеттерде ол тыхтағ тоғыстары тоозылғалах осхас, че ол ӱгредіг апарарына харығ полбас тіп ізендірген министр.
Іди тиксі тыхтағ апарҷаң федеральнай программаҷа 2 муниципальнай пӱдіс школаларын тыхтирын тоос салғаннар – ол Алтай аймаа (Новороссийскай школа) паза Сорығ город (2№ школа). Асхыс аймаанда Оңхактағы школада (Калининдегі школаның пӧлии) тыхтағ тоғыстары 15 сентябрьға теере толдырыл парар тіп кӧрілче. Пии аймаандағы Киндірліг пилтірі аалдағы школаны 30 ноябрьға теере тыхтабызарға пӧгінчелер. Халғанҷызында иң улуғ тыхтағ тоғыстары апарылчаттыр. Министрнің чооғынаң, анда тыхтағны тоозарына республика бюджедінең 62 миллион салковай позыдарға киліскен, федеральнай ахчаа хоза.
Федеральнай кіннең иділген чӧптезігҷе прай школалар пу чылның 1 декабрьына теере тузаланысха кирілерге кирек тіп таныхтаан Анатолий Бутенко.
Ідӧк федеральнай программаҷа пӱдірілчеткен 9 спортзалдаң амғы тусха 8-зі тимде осхас. Пірсінде ле подрядчикнең сидіксініcтер сығыстыр, че ол сурығлар пу ай тоозылғанҷа пӧгіл парарлар тіп ізендірген ӱгредіг паза наука министрі. Аннаң пасха, «Ӧзіс орыннары», олар федеральнай проектче чуртасха кирілчелер, ӱгредіге толдыразынаң тимделер.
Школаларны паза олған садтарын террористтердең арачылир, ӧрттең арачыланҷаң сурығлар ідӧк пӧгілчелер.
Паза Анатолий Бутенко ирткен неделяда хайзы СМИ-ларда Хакасияда кӧп ӱгретчі тоғыстаң санасча тіп искіріг хоостыра чоох тутхан. Аның чооғынаң, ол тайма искіріг. Чайғызына пірее ӱгретчілер пенсияларын хатап санаттырып алар ӱчӱн (іди оларның пенсиялары сала хозыл парча одыр) тоғыстаң парыбысчалар. Че кӱскӱзін олар хатап тоғысха кірчелер.
Ағаа хоза республикада ӱгретчілер саны хозылчаттыр. Министрнің искіриинең, кӧзідімге, республикада ирткен чылда чайғы пасталғанынаң 270 ӱгретчі саназыбысхан полза, ӱгредіг чылы пасталарына 300 ӱгретчі тоғысха кірген. Пӱӱл андағох ӧзіс.
Ӱгредіг министрі ідӧк чал ахчазы суриин чарытхан. Аның искіриинең, Хакасияда ӱгретчілернің чал ахчазы тӧбін тӱспеен.
– Январь – август айларда школа ӱгретчілерінің ортымах чал ахчазы 41161 салковай полған. Пӱӱнгі кӱнде ол 49831 салковай. Ол статистика. Хакасия пу кӧзідімҷе Сибирьдегі регионнар аразында 3 иң чахcы регион санында. Пістің алнында Хызылчар крайы паза Иркутск облазы ла, – чоохтаан Анатолий Бутенко.
Чыылығның паза пір сурии аал хонииның кӱскӱдегі тоғыстарына чарыдылған. Пу сурығҷа республиканың аал хонии паза ас-тамах министрі Сергей Труфанов чоох тутхан. Аның таниинаң, ас чығҷаң паза малға азырал тимнеҷең тоғыстар план хоостыра апарылча, улуғ тудығлар чоғыл.
Итсе, ирткен чылнаң тиңнестірзе, от сабары сала соона халча – амғы тусха 100 муң гектарда от сабылтыр (ирткен чылда пуох тусха – 125 муң га), 90 муң тонна от тимнелтір (ирткен чылда пуох тусха – 110 муң тонна).
Сергей Труфанов отнаң сидіксініcтерні часхы соох полғанынаң палғалыстырған. От, ирткен чылдағыох чіли, Асхыс паза Ағбан пилтірі аймахтарында чидіспес осхас. Че оңдайға сығып аларбыс тіп ізендірген министр: ӱстӱнзархы аймахтардағы фермерлернең чӧптезіг иділтір. Олар сызырны чазыда артызарлар, хонҷыхтар оларны постарына тимнеп аларлар.
Халғанҷызын министрлер кабинеді город-аймахтарның хысхы тусха тимненізін ӱзӱрген. Хакасияның пӱдіріг паза ЖКХ министрі Валерий Келиннің искіриинең, республика амғы туста хысхаа тимненістің пастағы чардығында. 15 сентябрьға теере прай муниципальнай пӱдіcтер тимненіс паспорттарын пир саларға киректер. Че пӱӱнгі кӱнде ол тоғыс майың парчаттыр, хайзы город-аймахтарда сидіксіністер пар. Андағларның санында Пии паза Таштып аймахтары адалған.
Пии аймаанҷа аймах пазының тоғызын толдырчатхан Татьяна Акользина сан пиріс иткен. Аның чооғынаң, сидіксіністер амғы туста пӧгілчелер, котельнайлар тимде, прай тоғыстар 20 сентябрьға теере тоозыл парарға кирек. Тимненіс паспорттары ідӧк тимнелче. Валерий Келин Пии аймаанҷа кирек сала оңдайлан сыхханын киречілеен, пу сурығҷа оларға республика полыс сыхханы сылтаанда.
Таштып аймаанҷа сан пиріcнең аймах пазының орынҷызы тоғызын толдырчатхан Эдуард Топоев чоох тутхан. Аның искіриинең, чурт чыындызы 80%-ке тимде, котельнайлар – 90%-ке, чылығ пирҷең сетьтер – 95%-ке.
Хайди таныхталған чыылығда, август тоозылчатханда, Таштыпха модульнай котельнай пӱдіреріне республика хоза ахча позытхан. Эдуард Топоев пу чағында садығлар чарлалар, 14 сентябрьда аукцион иртірілер тіп искірген. Аның салтарларынҷа муниципальнай пӱдіс ол тоғыстарны толдырарына подрядчикнең чӧптезіг идер.
Алынҷа чоох Таштыптағы 16№ ПУ-даңар парған. Аның котельнайы ідӧк нинҷе-де тураны чылытчаттыр. Анда ідӧк тыхтағ тоғыстары апарылча осхас. Валерий Келин ирткен чылда 16№ ПУ тимненіс паспортын ал полбаанын таныхтаан, аннаңар ағаа хайығ саларға кирек.
– Мында чапчаң тоғыныбызарға кирек, 15 ноябрьға теере прай сизіндіріглерні тӱзедібізер ӱчӱн, – чоохтанған министр.
Таштып аймаана ідӧк Улуғ Арбыттағы школа пӱдіриинҷе сурығлар пар полған. Ол школаны 31 октябрьға теере тузаланысха кирібізерге кирек. Эдуард Топоевтің искіриинең, школа стенелері 80%-ке тимде, пӱдіріг хыызында парча. Че Хакасия пазын ол нандырығ чӧпсіндірбеен.
– Подрядчикті маңзырадыңар! Чӧптезігде кӧзіділген тусха хайди даа тудынарға кирек. Хараа-кӱнӧрте дее анда полыңар, че школа прай тузында пӱдіріл парзын, – кӧстег турғыс салған Валентин Коновалов.
Сом Хакасия пазы пресс-службазыни
Автор :
Альберт Толмашов
Пн | Вт | Ср | Чт | Пт | Сб | Вс |
30 | 31 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 1 | 2 | 3 |
Кӱн таңмазы
Хакасияда
Россияда
Тилекейде