Нап-наа орында ӱлӱкӱннер улам чахсы иртсін
06.09.2023
Хабарлар
«Чылтызах» ансамбль хакас сарын толдырча
Тура тойы. Асхыс аймаандағы Асхыс чоғархы аалда тыхтағ соонаң Культура туразы ізиин пайрамни асты
Пу ӧріністіг кӱнні культура тоғынҷылары, чайаачы ӧмелер паза аал чуртағҷылары чидікпин сахтааннар. 2 сентябрьда нааҷылалған тура алнында хакас кип-азахтығ абахай хыстар улуғ аалҷыларны айраннаң удурлааннар. Улуғ асты амзаан соонаң хызыл лентаны Хакасия пазы Валентин Коновалов, республиканың культура министрі Светлана Окольникова, Асхыс аймаа пазы Абрек Челтыгмашев, Асхыс чоғархы аал чӧбінің пазы Александр Окунев хыплааннар. Ӧӧн кибір толдырыл парғанда, ӱлӱкӱнге чыылысхан чон Культура туразының иркінін алтаан.
Тиксі тыхтағ тоғызы соонаң Асхыс чоғархыдағы культура туразы чарых пол парған, нап-наа осхас турыбысхан. Аны таныҷаа даа чоғыл. Иргі ағас поллар орнына керамогранит тӧзел партыр, пас чӧрерге дее истіг. Алында олаңай извёстканаң хазартылған стенелерні «алтын холлығ» пӱдірігҷілер кӧні тӱзедібістірлер. Директорның кабинеді дее истіг, чарых. Ағаа хоза, Культура туразы істінде чылығ туалеттер паза раздевалка пар. Алында андағ ниме чох полған.
Кӧрігҷілер залы, тізең, улам хандыра. Халғанҷызын анда ӱс чыл мының алнында поларға киліскен. Андада зал соох паза харасхы осхас пілдірген. Сыры сых париған ағас поллар хыдырапчатханнар. Кӧрігҷілер одырҷаң сіреелернің хайзы оодылых турчатхан. Пӱкӱлее тыхтағ тоғызы соонаң аалдағы кӧрігҷілер залын городтинаң даа тиңнестірерге чарир: чарых, истіг, чылығ, нымзах сірееліг. Таныхтирға кирек, амғы туста Ағбандағы «Нымах» кӧклӧ театрында ідӧк тиксі тыхтағ тоғызы парча. Аннаңар Хакасияның культура министрі Светлана Окольникованың кӱстенізінең «Нымах» кӧклӧ театрының сіреелерін Асхыс чоғархы Культура туразына сыйлап пиргеннер. Прай 80 азыра одырҷаң орын.
Тура тойының ӧӧн чардығы наа сценада ирткен. Залға кізі толдыра чыылыс парған: ортын паза улуғ частығ чуртағҷылар, хуҷахтағы палалығ іҷе-пабалар, олған-узах. Итсе, олғаннарның кӧбізі тасхар ойнап халған. Клуб хыриндағы футбол чазызында улуғ батут турғыс салғаннар нооза. Оолахтар паза хызыҷахтар анда сегіріп, ойнап, ӱтертінчеткеннер.
Ол туста клубтың сценазында Асхыс чоғархы саарбах хызыҷахтар аарлығ аалҷыларны сіліг «Чазы» теелбекнең удурлааннар. Аалдағы Культура туразында чайаачы хызыҷахтарны теелбекке чиит специалист Антонина Андреевна Сунчугашева ӱгретче. Позы ол ӱр ниместе, Н.Ф.Катановтың адынаң Хакас хазна университедін тоозыбызып, тӧреен-ӧскен кічіг чир-суунзар айланып, Асхыс чоғархы аалдағы школада тархын паза обществознание предметтерні апарча, олох туста аалдағы клубта олғаннарны теелбектенерге кӧніктірче. Антонина Сунчугашева студент тузында саблығ «Кӱн чахайағы» ансамбльзар чӧрген. Пу ӧменең хада тиксі Россияның паза Хакасияның прай аал-городтарын ибір салған, аннаңар аның чайаачы узы пӧзік.
– Пӱӱн сынап танығлығ кӱн. Тыхтағ тоғызы соонаң наа Культура туразы азылча. Пу тура 40 чыл нааҷылалбаан. Россия президенті Владимир Путиннің чахиинаң нацпроекттер, чуртасха киріліп, ӧткін тоғынчалар. 2019 чылдаң сығара «Культура» нацпроектче піс республикада 40 азыра культура туразын нааҷылабысхабыс. Асхыс чоғархыда пӱӱн ӱлӱкӱн. Культура туразы – аалның тынызы. Мин ізенчем, мында чуртас хайнир, чуртағҷыларның чайаачызы тилир. Прайзына часка, пик хазых алғапчам! Ӱлӱкӱннең! – алғыстаан Хакасия пазы Валентин Коновалов.
Регион пазы Культура туразына сыйыхха 350 муң салковай салған. Ол ахчаа клуб устағҷызы Ольга Петровна Сунчугашева сценаа паза кӧзенектерге кӧзеңелер алар. Валентин Олегович тыхтағ тоғызында араласхан кізілерні Хакасия правительствозының алғыстас пічіктерінең таныхтаан.
Ідӧк аал чуртағҷыларына чылығ сӧcтер республиканың культура министрі Светлана Окольникова читірген:
– Тыхтағ тоғызы пасталар алнында, Асхыс чоғархыдағы культура туразының стенелері ле халған. Амды піс наа тураның ізиин астыбыс. Пӱӱн сценада кӧг тириин кӧрбинчем. Хаҷан-да Египеттегі саблығ пианист Мохаммед Салех килеріне Асхыс чоғархы клубха ӧнетін фортепиано алғабыс. Мында аның концерті ирткен. Ол чайаачы иирні кӧрерге пабамны ағылғам. Минің пабам олған тузында Асхыс чоғархыдағы кічіг ағас школада ӱгренген. Мохаммед Салехтің концертінде пабамнаң хада ізіг айа сапхабыс. Ідӧк Египеттегі пианистнең хада тахпахтар сарнаабыс. Амды нааҷылалған Культура туразынзар пасха даа саблығ артисттер кил турарлар. Асхыс чоғархыда чахсы чон чуртапча. Мин мында удаа полчам.
Ідӧк директор Ольга Петровна Сунчугашеваны таныхтирға кирек. Тыхтағ тоғызы парчатханда, ол пу клубта чуртаан тиирге чарир. Мин иртен килзем, ол тоғыста полча. Орай иирде Асхыстағы алай Таштыптағы пірее мероприятиедең айланчатсам, пазох Асхыс чоғархызар кірчем, че Ольга Петровна Культура туразында ла полча.
Чоох тутхан соонаң культура министрі Светлана Анатольевна Ольга Петровнаа микрофон сыйлап пирген. Хайди ол теен, пу тирігнең олғаннар тузалан турарлар. Аны «Нымах» кӧклӧ театрының устағҷызы Игорь Окольников сыйлап пирерге чахығ пиртір.
Тура тойында аарлығ аалҷыларға хоос устағҷы Оксана Антоновна Сербигешеваның «Чылтызах» ансамбльы кееркестіг хакас сарыннар ырлаан. Постарыох чатханнаң, хомыснаң, хобырахнаң ус ойнааннар. Кӧрерге дее ӧкерсіністіг. Анаң клубтың звукорежиссёры, ырҷы Сергей Николаевич Толмашов залдағы чонның алнынзар «Читі хыс» сарыннаң сыххан.
– Алындағы чылларда клубтың чылығ пирҷең системазы уйан полған, хысхызын соох полҷаң. Концерттер иртсе, кӧрігҷілер залда киптіг, пӧріктіг одырҷаңнар. Пол ағас полған. Ам аны керамограниттең ит салғаннар. Тыхтағ тоғызы тузында хыр алыстырылған. Пӱдірігҷілер клубты ибіре чылығлааннар, анаң профлистнең чабысханнар. Стенелерін наа технологияларнаң тӱзедіп, потолоктарын сіліг ит салғаннар. Сцена пӱкӱлее алыстырылған. Чарытхы эмектері нааҷылалды. Клубтың істінде паза тастында видеокамералар турғызылды. Вентиляция системазына чидіндібіс. Ікі туалет паза раздевалка иділ парды, – чоохтаан Культура туразының директоры Ольга Сунчугашева.
Асхыс чоғархыдағы клуб 1980 чылда пӱткен. 43 чыл аразына анда алғым тыхтағ тоғызы иділбеен полған.
Тыхтағ тоғызына тиксі 13 миллион 822 муң 64 салковай позыдылған: 4 миллион 676 муң салковай – федеральнай бюджетти, 6 миллион 519 муң 56 салковай – республикани, 2 миллион 515 муң салковай – Асхыс аймаа бюджедіни, 113 муң салковай – Асхыс чоғархы аал чӧбіни. Клубты «Дарт-Строй» ООО нааҷылаан. Аның устағҷызы Оганез Погосович Нагапетян полча. Тура тойында ағаа кӧп алғыстас сӧзі читірілген. Позы даа ол мындағ улуғ тоғыс тӱзімніг толдырыл парғанына ӧрінізін чазырбаан, пасха даа объекттерде тоғынарға тимдезін искірген.
Ӱлӱкӱн соонаң піc аал чуртағҷыларының кӧңнін пілібіскебіс.
– Пӱӱн уғаа ӧрініcтіг кӱн. Піcтің школада актовай зал даа, спортзал даа чоғыл. Прай ӱлӱкӱннерні, пайрамнарны Культура туразында иртірчебіс. Кӧрген поларзар, ам сценада саңай пістің палаҷахтар сарнадылар, плесет салдылар паза кӧг тиріглерінең ойнадылар. ФГОС хоостыра уроктағы нимес ӱгредіглерге, кружоктарға ӱгренҷілерібіс Культура туразынзар чӧрчелер. Школаның прай мероприятиелерін, Наа чыл ӱлӱкӱнні, хакас чонның пайрамнарын клубта иртірчебіс. Пастағы сентябрьда линейка полза, оборудованиені Культура туразыох пирче. Клубтағы тоғынҷылар школада кружоктар апарчалар. Іди піc пик палғалыс тутчабыс. Ам тыхтағ тоғыстары соонаң клуб чарых паза истіг пол парды. Кӧрчем, музыка оборудованиелері олох халтыр. Ізенчем, соонаң наа тиріглер паза кӧзеңелер аларына ахча позыдылар, – таныхтаан Асхыс чоғархыдағы школа директоры Татьяна Юрьевна Межекова.
– Мин сӧбіремнең хада Асхыс чоғархыда пис чыл чуртап парирбын. Позым Пии аймаандағы Маткичіг аалда тӧреем-ӧскем, хонғаным Астап Саражаков – Казанов аалдаң. Клубта тыхтағ тоғызы парчатханда, мин мында тоғынарға маңнанғам, ипчілернең хада кӧзенектер чуғабыс, пол чысхлаабыс. Культура туразы азыл парғанына ӧрінчем. Ол ам улам чарых пол парды. Піс хонғанымнаң хада сигіс пала ӧскірчебіс. Пу Культура туразында сарын паза теелбек кружоктары иртче. Палаларымның кӧңнілері полза, чайаачы кирекнең дее айғазарлар, – кӧңнінең ӱлескен Асхыс чоғархы аалның чуртағҷызы, кӧп палалығ іҷе Ольга Саражакова.
Нааҷылалған турада ӱлӱкӱннер удаа иртсін, сарын-кибеліс чайылзын паза ойын-теелбектер пайрамнарны чазазын. Анзы андағ полар, Асхыс чоғархыда чайаачы кізілер чуртапча нооза. Сергей Николаевич Толмашов тиксі Асхыс аймааның «чылтызы» полча. Евгений Филиппович Мамышев позы сарыннар паза кӧглер пасча. Олар кӧг культуразын пӧзік синге кӧдір парчалар.
Сомнар Хакасия пазы пресс-службазыни
Автор :
Татьяна Тютюбеева
Пн | Вт | Ср | Чт | Пт | Сб | Вс |
29 | 30 | 1 | 2 | 3 | 4 | 5 |
6 | 7 | 8 | 9 | 10 | 11 | 12 |
13 | 14 | 15 | 16 | 17 | 18 | 19 |
20 | 21 | 22 | 23 | 24 | 25 | 26 |
27 | 28 | 29 | 30 | 31 | 1 | 2 |
Кӱн таңмазы
Хакасияда
Россияда
Тилекейде