Хакасия табығларға тимде
08.09.2023
Хабарлар
![Хакасия табығларға тимде Хакасия табығларға тимде](/upload/iblock/c12/8cr39ltflvhgchjqlihuiah0yfzmokqo.jpg)
– Табығларны иртіреріне прай ниме тимде, – таныхтаан Хакасияның Табығ комиссиязының кнезі Александр Чуманин
Табығлар-2023. Хакасияның Табығ комиссиязы республиканың участковай табығ комиссиялары (УИК-тар) хайди тоғынарларын кӧзіт пирген
Республиканың Табығ комиссиязы специалисттері УИК-тар пу табығларда хайди тоғынарларынаң таныстырғаннар: хайди ӱн пиріс иртер, хайди бюллетеньнер хайраллалар паза саналар. Анзына Ағбан городтың Олған чайаачызы кінінде орныхчатхан 33№ табығ участогында «Модельліг табығ участогы» тимнелген. Мероприятиеде Хакасияның Халыхтар палатазының, политика партияларының кізілері паза хабарҷылар араласханнар.
Наа нимені алза, республикада пастағызын на «Стоп-дубль» система тоғын сығар. Ол системанаң сыныхтағлығ оңдайнаң Ағбанның 60 табығ участогында тузаланарлар. Наа система табығҷаа ікі хати ӱн пирерге оңдай пирбес.
Полған на табығ участогында видеокамералар тоғынар, аннаңар табығлар тузындағы сайбағларны сах андох ілезіне сығарҷаң оңдай пар полар. Бюллетеньнерні хайраллаҷаң сейф видеокамера алнында тӧреміл турар.
Бюллетеньнер салҷаң харачахтар ӱc кӧрімге чарылчалар: станционарнай (ӧтіре кӧрінчеткен), хаап чӧрҷең (ибдең сых полбинчатхан кинектерзер комиссия араласчылары постары чӧрерлер) паза КОИБ (табығ бюллетеньнерін хығырчатхан комплекс).
Бюллетеньнерні хайраллаҷаң оңдай ідӧк ӱс: ӧнетін сейф-пакетте (андар хаап чӧрҷең паза станционарнай харачахтағы бюллетеньнерні сығарып, санап саларлар), станционарнай харачахта (че ол харачахтың чікті чапчаң ӧнетін чабии пар поларға кирек, хайзынзар пломба турғызылар), КОИБ іcтінде.
– Полған на сейф-пакеттің позының номері пар паза ол ӧнетін хызыл лентанаң арачылалған, – чоохтаан Хакасияның Табығ комиссиязының хабарлар пӧлии пасығы Дмитрий Кирсанов. – Сейф-пакетті азарға кӱcтенген алай асхан ползалар, ол лентада пазылған буквалар кӧрін килче.
Табығ участоктарында халыхтар сыныхтағҷыларына, аккредитациялығ хабарҷыларға, сомҷыларға паза видеооператорларға ӧнетін орыннар пар полар. Ол орыннардаң ӱн пиріс хайди иртчеткені прай кӧрінер тіп ізендіргеннер Хакасияның Табығ комиссиязының специалисттері.
– Прай кирек сурығлар пӧгілген, бюллетеньнер табығ участоктарынзар читірілген, видеокамералар прай турғызылған, – салтарлар идіп, таныхтаан Хакасияның Табығ комиссиязының кнезі Александр Чуманин. – Табығ участоктарында прай кирек оборудование пар, халыхтар сыныхтағҷыларының списоктары піске читірілген. Тиксі алза, республика табығларға тимде.
Таныхтирға кирек, пӱӱл республикадағы табығлар 3 кӱн иртер – 8, 9 паза 10 сентябрьда. Хакасия чуртағҷылары республика пазын паза Ӧӧркі Чӧп депутаттарын табарлар. Ідӧк хайзы муниципальнай пӱдістернің пастарына паза депутаттарына табығлар иртер.
Сом Дмитрий Сунчугашевти
Автор :
Альберт Толмашов
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде