Ікі чонны культура піріктірген
08.09.2023
Хабарлар
![Ікі чонны культура піріктірген Ікі чонны культура піріктірген](/upload/iblock/7d6/17e5c2d2l4rotkka90yzs7cepbywlh1q.jpg)
В.Г.Чаптыковтың адынаң республика филармониязының чайаачылары
Алғыстас. Пӱӱл В.Г.Чаптыковтың адынаң республика филармониязының артисттері Луганск паза Новоазовск городтарда гастрольларнаң пол килгеннер. Анда олар ЛНР-ның сценазында К.Молчановтың «Зори здесь тихие» операзын турғысханнар
Спектакльда филармонияның «Каданс» хоры, симфоническай оркестрнің солисттері, ХГУ-ның филология паза искусство институдының «Шейк» ансамбльының теелбекчілері паза Лугансктың М.Матусовскийнің адының культура паза искусство академиязының режиссерлары паза актерға ӱгренчеткен студенттер араласханнар. Дирижер Хакасияның чон артизі Вячеслав Инкижеков полған.
Опера Лугансктың П.Луспекаевтің адынаң орыс драма театрының сценазында турғызылған. Ікі кӱн аразына аны пір муңа чағын кізі кӧріп алған. Олар, Сибирьдегі артисттернің чайаачы устарына морсынып, турып алып, писче минута айа сапханнар.
ЛНР-ның культура, спорт паза чииттер киректерінҷе министрі Дмитрий Сидоров, Хакасияның проектін пӧзік паалап, аның араласчыларына профессионализм, ікі регионның аразындағы хайызығны тыытчатхан паза Лугансктың культуразының паза искусствозының тилізіне хозым итчеткен ӱчӱн алғыстас пічіктерін читірген.
Лугансктың соонаң филармонияның артисттері Донецк Чон Республиказының Новоазовск городында концерт кӧзіткеннер. Хакасия культуразының саблығ тоғынҷызы Марина Штарктың устаанынаң «Каданс» хорның cолисттері паза Хакасияның чон артизі Артур Марлужоков хор концертін толдыр пиргеннер.
Пу неделяда, тізең, Хакасия пазы Валентин Коновалов чорыхха чӧр килген прай артисттерге алғыстас пічіктерін читірген паза хазнаның наа регионнар чуртағҷыларына «Зори здесь тихие» опера турғыс пирген ӱчӱн алғызын читірген.
– Мындағ ниик нимес туста искусство чонны піріктірче, оларға кӱс пирче паза аннаң андар чуртирға кӧӧктірче. Мындағ гастрольларның кирексінізі улуғ: олар ікі чонның культуразын чағыннатчалар. Луганск паза Донецк республикаларның чуртағҷылары сірернің тоғызыңарға пӧзік паалағ пиргеннер. Хакасия правительствозының паза чуртағҷыларының адынаң сірерге улуғ алғыс читірчем, – таныхтаан чооғында Валентин Олегович.
ЛНР-зар паза ДНР-зар чӧрген 30-ча артист паза филармония тоғынҷызы алғыстас пічиин алған.
– Піс чорыхха сығыбысханда, чӱрекке изі чох пілдірген, пілгебіс нооза, хайдар парчатханыбысты. Лугансктағы даа нанҷыларыбыс піc сынап килерін ікінҷілеен осхастар. Худайнаң, чорых иптіг-амыр ирткен, – сағызынаң ӱлесче Хакасияның чон артизі Вячеслав Инкижеков.
«Каданс» хорның чиит солизінің іҷезі сағысха кирче:
– Палаларыбыс чорыхха тимненчеткенде паза андар парыбысханда, піс, мында халған іҷе-пабалар, корвалол-валидолнаң чуртаабыс. Мында одырып сахтирға сидік полтыр. Палаларыбыс анда. Чорыхты тимнеен устағҷыларға алынҷа алғыс читірчем: оларға транспорт, чурт, азыранар паза даа пасха сурығларны пӧгерге киліскен. Ағаа хоза, чорых хорғыс чох поларын чахсы сағыныбызарға кирек полған. Артисттер чахсы концерт кӧзіт пиргеннер, ідӧк изен-хазых айланғаннар. Алғыс! – кӧңнін чазырбинча Мария Кондрашинаның іҷезі.
Чоохтирға кирек, чорых Хакасияның паза Россияның культура министерстволары хабазиинаң «Мы – Россия» федеральнай программа хоостыра ирткен.
Сом Дмитрий Сунчугашевти
Автор :
Оксана Сунчугашева
Пн | Вт | Ср | Чт | Пт | Сб | Вс |
26 | 27 | 28 | 29 | 30 | 31 | 1 |
2 | 3 | 4 | 5 | 6 | 7 | 8 |
9 | 10 | 11 | 12 | 13 | 14 | 15 |
16 | 17 | 18 | 19 | 20 | 21 | 22 |
23 | 24 | 25 | 26 | 27 | 28 | 29 |
30 | 1 | 2 | 3 | 4 | 5 | 6 |
Кӱн таңмазы
Хакасияда
Россияда
Тилекейде