Чоллар пӱдіриине – наа оңдайлар
08.09.2023
Хабарлар
![Чоллар пӱдіриине – наа оңдайлар Чоллар пӱдіриине – наа оңдайлар](/upload/iblock/a27/rihw60ziaxyq2zp12x18yaqcsy9iun4l.jpg)
Хакасия пазы Валентин Коновалов наа заводнаң танысча
Пӱдіріг. Таштып аалда 5 сентябрьда наа асфальт-бетон заводы азылды. Аны пос ахчазына Таштыптағы чоллар тыхтаҷаң устаныс пӱдірген
Кирек тиріглерні июньда ағылғаннар (олар Хыдатта тимнелгеннер), Самара городтаң ӧнетін специалисттер килгеннер, олар заводты тӧстирге, чыырға полысханнар, амды орындағы тоғынҷыларны тиріглернең тузаланарға ӱгретчелер. Заводтың тоғызын 5 кізі толдырча.
Ӱлӱкӱнде Хакасия пазы Валентин Коновалов, республиканың транспорт паза чол хонии министрінің тоғызын толдырчатхан Олег Емелин, Таштып аймаа пазының орынҷызы Елена Алексеенко, Таштыптағы ДРСУ-ның устағҷызы Николай Тюгаев араласханнар.
Республикада чылдаң чылға наа чоллар пӱдірии хозылча, аннаңар наа завод уғаа чахсы хозым. Николай Тюгаев чарытча: «Сығарылчатхан асфальт ГОСТ сертификадына нандырча. Пістің иргі заводыбысты хыйа алыбызарбыс, неке. Ол 40 чыл азыра тоғын салған, пір часта 25 – 30 тонна асфальт сығарҷаң. Наа завод, тізең, ол кӧзідігні 2 хати ас парыбысча – 80 тонна асфальт пір часха тимнебісче. Чир-чайаанны хайраллиры даа ӧзібӧкче, Россия Федерациязында алылған стандарттар хоостыра тоғынча, киизер тасталчатхан тозынның, сууластың сині хай-хай чабыс.
Хызыл лентаны хыплир алнында аалҷыларға операторның тоғыс орнын кӧзіт пиргеннер, анда пір компьютернең прай заводтың тоғызын апарарға, аймах кӧзідіглерні сыныхтирға чарир. Лентаны Валентин Коновалов, Олег Емелин, Николай Тюгаев хыплааннар, анаң кибір хоостыра республика пазын шампанскайны заводтың наа тӧзінзер оодыбызарға сурынғаннар. Анаң аалҷылар, заводтың пастағы асфальт сығарызын кӧріп алып, Таштып аал чуртағҷыларынаң тоғазарға парғаннар.
Тоғазығ Культура туразында ирткен. Чон кӧрігҷілер залына толдыра чыыл парған. Тоғазығда ідӧк араласханнар Ӧӧркі Чӧп кнезі Владимир Штыгашев, Таштып аал чӧбі пазы Рустам Салимов. Пастағы сӧсті Владимир Николаевичке пиргеннер, ол Хакасия ирткен пис чылға хайдағ чидіглерге чидіп алғанын чарыт пирген. Уғаа чахсы кӧзідіглер, чоохтирға чарир, аннаң андар іди тудынза, чуртас маңат ла полып одырар. Чуртағҷылар устағ-пастаға аймах сурығлар пиргеннер. Олар имнег киреене, чиит специалисттернің хабазиина, сӧп-сап чыырына, спорт тилізіне паза пасха даа сурығларға теелгеннер.
Сом авторни
Автор :
Тарина Бутонаева
Пн | Вт | Ср | Чт | Пт | Сб | Вс |
27 | 28 | 29 | 30 | 31 | 1 | 2 |
3 | 4 | 5 | 6 | 7 | 8 | 9 |
10 | 11 | 12 | 13 | 14 | 15 | 16 |
17 | 18 | 19 | 20 | 21 | 22 | 23 |
24 | 25 | 26 | 27 | 28 | 29 | 30 |
Кӱн таңмазы
Хакасияда
Россияда
Тилекейде